Mariko 10 - KITAWO MALEŊ

Yesu fonjo ji kwoŋ nywomirok

¹ Yesu oeye kenyo to kidho iy'adec ma Yuda kodi loka man ma Jwom Yordan. Lwak ji jobino bonge to go fonjo jo, paka ndir je oyido omaro timo.

² Jofarisayo moro jobino bongi Yesu to jopenjo go ma temo go ni, “Cik yeyo dhano riemo cege?”

³ Yesu odwoko ni, “Musa cango ooro win timo nedi?”

⁴ Jowaco ni, “Musa oyeyo jacwo ndiko balwa ma riemo cege ka pokere gine.”

⁵ To Yesu waco rijo ni, “Musa ondiko riwin cik no, rupiri cuny win tek.

⁶ To wok i cakirok pa cwec, ‘Were ocweyo jacwo gi dhako.’

⁷ ‘Am'omiyo jacwo bino weyo bamere gi min, to cwire kwoŋ cege,

⁸ to jario jolokere del acel.’ Riameno jo onyo ki del ario to del acel.

⁹ Am'omiyo gima Were otieko riwo kanyacel, wongoye nyatoro ma wopok.”

¹⁰ Munyo jogik i ot, jofonjirok pere jopenjo go kendo dwoŋ wac no.

¹¹ Aka owaco rijo ni, “Ŋata pokere gi cege to nywomo dhako man, meno timo cot,

¹² aka ameno bende, dhako ma pokere gi cwore to nywomere gi jacwo man, meno timo cot.”

Yesu miyo nyithindho silwany

¹³ Ji moro jokelo nyithindho bongi Yesu ni wogey jo, to jofonjirok pere jobwoko jo.

¹⁴ Munyo Yesu oneno ameno, nge omako go gi jofonjirok pere, to waco rijo ni, “Weyi nyithindho jowobin bongan; wikiri wicer jo, kole Ker pa Were obedo apa joma pameno.

¹⁵ Adieri awaco riwin, ŋata k'ojolo Ker pa Were paka nyathi mathin, kiladonj'iye.”

¹⁶ Gikenyo Yesu otwodo nyithindho gi cinge, oketho cinge kwoŋ jo, to miyo jo silwany.

Jal m'oŋaŋ

¹⁷ Munyo Yesu ocako woth pere kendo, jal moro obino gi ŋwec to riewere piny ruwaŋe to penjo go ni, “Jafonji maber, atim aŋo ŋey alimi kwo makirum?”

¹⁸ Yesu odwoko go ni, “Raŋo ilwoŋan ni maber? Ongoye ŋataber kwanyo woko Were kende.

¹⁹ Iŋeyo Or pa Were ma waco ni, ‘ikir'ineki, Ikir'itim cot; Ikir'ikwal; ikir'isegeya dhano nono; ikir'iwondi ji; ikir'icam gimahembi; lwor benin gi yokin.’ ”

²⁰ Jalo odwoko ni, “Jafonji, atieko mako or no je wok i thino paran.”

²¹ Gikenyo Yesu oŋiyo go gi mar to waco rigo ni, “Gimoro acel ama fodi odoŋ rin timo: Kidhi itana woko gima in gine je, pesa mere ipoki jocandi, aka ibino limo ŋaŋo i polo; aka ŋey ibin iluwan.”

²² Wac me okweyo kwoŋ jalo swa, to miyo go gut, rupiri go oyido oŋaŋ tektek.

²³ Yesu obolo waŋe oŋiyo korin gi korin, to waco ri jofonjirok pere ni, “Bino bedo matek adieri ri jaŋaŋo donjo i Ker pa Were!”

²⁴ Jofonjirok jodhier swa kwoŋ wac me, to Yesu medo waco rijo ni, “Nyithindho paran, tek swa ri joma geno ŋaŋo donjo i Ker pa Were!

²⁵ Yot ri ŋamia donjo i yore piso loyo ri jaŋaŋo donjo i Ker pa Were!”

²⁶ Jofonjirok jomedo dhier, to wegi jowaco kendi gin ni, “K'ameno onyo ŋa won manyalo both?”

²⁷ Yesu oŋiyo jo to waco ni, “Ri dhano gime kinyalere, to ki ri Were, rupiri Were nyalo gimoro je.”

²⁸ Petero to ero waco ni, “Aka wan to? Kole watieko weyo gimoro je to waluwin.”

²⁹ Yesu odwoko ni, “Adieri awaco riwin, ongoye ŋat'owey ot, wutmin, nyimin, yokimere, bamere, nyithindho, kosa lowo kwoŋbedo an kodi Wac Manyen Maber,

³⁰ ma kilalimo gigipiny dimiya acel, udi, wutmin, nyimin, bacere mere, mege, nyithindho kodi lowo, kodi candirok i ndir ma pama, to limo kwo makirum rumacen.

³¹ Aka ji madit ma pama jobedo marapena ama jobino bedo macowe; aka jom'oyido macowe ama jobino bedo marapena.”

Yesu luwo ma didek kwoŋ tho pere

³² Yesu kodi jom'oyido nigi go onwaŋo jo ni royo jocomo yu Yerusalem kareno go otelo jo. Jofonjirok pere jouro wac pere; aka ji m'oyido joluwo jo bende lworo omako jo. Yesu odoko otero jofonjirok apar g'ario gicen to luwo kwoŋ gim'onwaŋo kidho timirok kwoŋe.

³³ Owaco rijo ni, “Winji win, onyo wakidho Yerusalem kam'ibino keth'iye Wod Dhano i cingi jotel pa jocway ri Were i wi migam kodi jondiko. Jobino thumo rigo banja ma tho, to joketho go i cingi Jopath.

³⁴ Jono jobino nyero go, ŋulo kwoŋe law, cwado go, gi neko go. To i ndelo mar'adek, go bino cerino.”

Yakobo gi Yohana jokwayo Yesu dwoŋ

³⁵ Yakobo gi Yohana, wot Zebedayo, jobino bongi Yesu to jowaco rigo ni, “Jafonji, nitie gima wayenyo itimi riwan.”

³⁶ Yesu openjo jo ni, “Aŋo ma wiyenyo atim riwin?”

³⁷ Jodwoko ni, “Yey wabedi ŋat'acel yu cingin maracuc, ŋatiman yuracam, i dwoŋ perin.”

³⁸ Yesu owaco rijo ni, “Wikuya gima wikwayo. Winyalo madho agwata m'anomadhi, gi batisimo m'anolimi?”

³⁹ Jodwoko ni, “Wanyalo.” Yesu owaco rijo ni, “Agwata m'anomadhi wibende wibino madho, odoko batisimo m'anolimi wibende wibino limo,

⁴⁰ to kabedo ma yu cingan maracuc kosa maracam k'obedo tic paran poko. Me kabedo pa joma otiek yiko rijo.”

⁴¹ Munyo jomoor wadi gin japar jowinjo wac no, nge omako jo gi Yakobo kodi Yohana,

⁴² omiyo Yesu olwoŋo jo bonge to waco rijo ni, “Wiŋeyo ni jodhum ma piny jodhumo ji gi maker; aka jotel pajo jodhumo gi mbaka.

⁴³ To me k'apaka ripo bedo gi win. Ka nyatoro kwoŋ win mito bedo jadwoŋ, go ripo bedo jatic ri wadi;

⁴⁴ aka ŋata mito bedo jatel i dier win, ripo bedo ŋeca pa wadi je.

⁴⁵ Kole kada Wod Dhano bende k'obino ni wotiy rigo; to obino ni wotiy ri ji ayin kodi miyo kwo pere paka gicul ma gonyo ji mathoth.”

Yesu botho Batimayo

⁴⁶ Yesu gi jofonjirok pere jotundo Yeriko. Aka munyo joay kenyo, gi lwak ji, jakwac ma waŋ'otho, m'ilwoŋo ni Batimayo, madwoŋ mere ni wod pa Timayo onwaŋo obedo piny i thengi royo.

⁴⁷ Tekin Batimayo winjo ni manago Yesu Janazareth ama kadho, to cako koko ka waco ni, “Yesu, Wod pa Daudi, tim reye wor!”

⁴⁸ Ji mathoth jobwoko go aka jooro go liŋ, to go omedo ameda koko malo ayino ni, “Wod pa Daudi, tim reye wor!”

⁴⁹ Yesu ocungo to waco ni, “Lwoŋ win go ka.” To jolwoŋo jal ma waŋ'otho no, ka jowaco rigo ni, “Ikir'irembi, ay malo, kole go dica lwoŋin.”

⁵⁰ Gikenyo go obolo nanga pere gicen, opor malo, to kidho bongi Yesu.

⁵¹ Yesu openjo go ni, “Imito atim rin aŋo?” Jal ma waŋ'otho no owaco ni, “Jafonji, yaw ran waŋan.”

⁵² To Yesu waco rigo ni, “Kadhi, yeyo perin obothin.” Piyo piyo no, waŋe oyawere, to bende luwo Yesu.