Luka 18 - KITAWO MALEŊ

Ageca kwoŋ citho kodi jathum banja

¹ Yesu oluwo ri jofonjirok pere iy'ageca kwoŋ riwin i kwayo ma cuny jo k'oŋedhere ni:

² “Cango obedo jathum banja acel i tindi moro, ma k'olworo Were kendo k'oworo dhano.

³ I tindi no won, oyido nitie citho moro m'omena bino bonge ka waco ni, ‘Amito ithekan gi jakwor paran!’

⁴ Hongo malac okadho ma jalo fodi onwaŋo kwero akwera, to rumacen won owaco gi i cunye ni, ‘Kada nende akilwor Were kendo akiwor dhano,

⁵ to ro mijokere pa citho me, aripo miyo go gima ripo rigo, kak'ameno go bino kimena jokan tundo tho.’ ”

⁶ Aka Rwoth owaco ni, “Wineno gima jathum banja m'ongoye g'adieri no ojok owaco?

⁷ Onyo Were ama k'oneni gir'atima ri ji pere m'oyer, ma jogoyo rigo koko wor g'odieceŋ? Wiparo ni go bino galo tektek gi konyo jo?

⁸ Aridho riwin ni go bino neno gimaber wotim rijo, kendo bino timo ameno i yoto. To ceŋ ma Wod Dhano odwok'iye, onwaŋ yeyo moro i piny?”

Ageca kwoŋ Jafarisayo kodi jacoki misolo

⁹ Yesu oluwo iy'ageca ri ji ma joŋoyo ni jobeyo i cuny gin aka jocayo wadi gin ama:

¹⁰ “Ji moro jokidho jario i Ot pa Were kwayo; ŋat'acel Jafarisayo, aka ŋatiman jacoki misolo.

¹¹ Jafarisayo ocungo to kwayo ni, ‘Were afoyin nike akical jomegi ma jomay ji gigipiny, jodiy wadi gin, jocot paka ji man, aka maloyo meno akical jacoki misolo me.

¹² Ariyo kec dirio i sabiti acel; aculo acel wiy apar kwoŋ gima alimo je.’

¹³ To jacoki misolo ocungo gi bor ma k'otemo kada tiŋo wiye malo yupolo; to ogoyo kore ayino ka waco ni, ‘Were, maki kodan wor, a jagimarac.’

¹⁴ Awaco riwin, jal me odok peco munyo otire ruwaŋ Were loyo Jafarisayo no. Ato ŋata won miyere dwoŋ ibino bwono, to ŋata bwonere am'ibino miyo dwoŋ.”

Yesu miyo nyithindho silwany

¹⁵ Ji moro oyido jokelo nyithindho pajo bende ni Yesu wokethi cinge kwoŋ jo; to munyo jofonjirok joneno ameno, jobwoko jono ni jonyeko timo ameno.

¹⁶ To Yesu olwoŋo nyithindho no bonge, to waco ni, “Weyi win nyithindho jowobin bongan! Wikiri wigeŋi jo, rupiri Ker pa Were obedo apa joma pameno.

¹⁷ Adieri awaco riwin, ŋata kijol Ker pa Were paka nyathi kiladonj'iye.”

Jaŋaŋo moro

¹⁸ Acel kwoŋ jodhum pa Joyuda openjo ni, “Jafonji maber, mitere atim aŋo ŋey alimi kwo makirum?”

¹⁹ Yesu openjo go ni, “Raŋo m'ilwoŋan ni maber? Ongoye ŋataber kwanyo woko Were won.

²⁰ Iŋeyo Or pa Were me: ‘Ikir'itim cot; Ikir'ikwal; ikir'ineki, lwor benin gi yokin.’ ”

²¹ Ŋato owaco ni, “Wok i thino paran amako Or no je.”

²² Munyo Yesu owinjo gim'owaco me, owaco rigo ni, “To fodi mitere rin timo gimoro acel. Tana woko lim perin je, ipoki jocandi pesa mere, aka ibino limo ŋaŋo i polo, ŋey nyaka ibin iluwan.”

²³ To munyo ŋato owinjo wac no ogut swa, rupiri go oyido oasa ŋaŋo.

²⁴ Munyo Yesu oneno nike go ogut, owaco ni, “Tek swa ri jaŋaŋo donjo i Ker pa Were!

²⁵ Tek swa ri jaŋaŋo donjo i Ker pa Were loyo kayina donjo i yore piso.”

²⁶ Ji ma jowinjo wac me jopenjo ni, “To ŋa won manyalo both?”

²⁷ Yesu odwoko ni, “Gima kinyalere ri ji, nyalere ri Were.”

²⁸ Gikenyo Petero owaco ni, “Neni, kole watieko weyo pecin mawan waluwin.”

²⁹ Yesu owaco rijo ni, “Ey, t'awaco riwin ama: Ongoye ŋat'owey peco pere kosa cege kosa wutmin kosa jonywol kosa nyithindho pere ro Ker pa Were

³⁰ ma kilalimo gima dit loyo, i ndir ma pama kodi kwo makirum i ndir ma bino.”

Yesu luwo ma didek kwoŋ tho pere

³¹ Yesu otero jofonjirok pere gicen to waco rijo ni, “Neni win, onyo wakidho Yerusalem kama gimoro je ma jotuci wac Were jondiko kwoŋ Wod Dhano bino timer'iye.

³² Ibino bolo go i cingi Jopath, ma jobino nyero go, yeto go, gi ŋulo kwoŋe law.

³³ Jobino cwado go to joneko go, to i ndelo mar'adek ibino cerino go.”

³⁴ Jofonjirok jok'oniaŋ dwoŋ wac me; dwoŋ wac me opan rijo, aka jok'oŋeyo gima Yesu oyido luwo kwoŋe.

Yesu botho jakwac ma waŋ'otho

³⁵ Munyo Yesu oriko Yeriko, ŋatimoro ma waŋ'otho onwaŋo obedo piny i thengi royo kwayere.

³⁶ Munyo ŋato owinjo lwak ji kadho, openjo ni, “Aŋo ma timere?”

³⁷ Jowaco rigo ni, “Yesu Janazareth ama kadho i royo ka.”

³⁸ Gikenyo ŋato okoko malo ni, “Yesu, Wod pa Daudi, maki kodan wor!”

³⁹ Ji m'oyido jotelo jobwoko go to jowaco rigo ni woliŋi. To go omedo koko malo ayin ni, “Wod pa Daudi, maki kodan wor!”

⁴⁰ Gikenyo Yesu ocungo to oro jo kelo ŋata waŋ'otho no bonge. Munyo otundo cegin, Yesu openjo go ni,

⁴¹ “Imito atim rin aŋo?” Go odwoko ni, “Jadwoŋ, amito neno kendo.”

⁴² Gikenyo Yesu owaco rigo ni, “Caki neno, yeyo perin obothin.”

⁴³ Gikenyo won to ŋato cako neno, to luwo Yesu, munyo foyo Were. Munyo ji je joneno gime, jopako Were.