Kwan 31 - KITAWO MALEŊ

Lweny Maleŋ kwoŋ Jomidian

¹ Rwoth oluwo gi Musa ka waco ni:

² Cul kwor ri Joisiraili kwoŋ Jomidian, aka rumacen icoki ji kanyacel.

³ Musa owaco ri ji ni, “Yer win cwo ma jolweny, ŋey jowomonji Jomidian nyalo culo kwor pa Rwoth kwoŋ Midian.

⁴ Wilayero cwo gana acel wok i kisi nono ma Isiraili kadho lweny.

⁵ Ameno joyero cwo gana acel wok i kis nono, aka kanyacel cwo gana apar g'ario joyikere lweny.

⁶ Musa ooro jo lweny kanyacel gi Finehas wod pa Eliazar jacway ri Were i wi migam, g'atewe ma Ot pa Were kodi gwarin ma kudho i cinge.

⁷ Jolwenyo gi Midian, paka Rwoth oyido owodho or ri Musa, aka joneko kisi jacwo.

⁸ Joneko kerin ma Midian abic, Evi, Rekem, Zur, Hur kodi Reba medo i wi joman ma joneko; to joneko bende Balam wod pa Bewor g'abor.

⁹ Joisiraili jomako mon ma Midian kodi nyithindho pajo paka jotwec, jonyaga dhok pajo je, mwendi pajo, kodi gigipiny pajo je.

¹⁰ Jowaŋo woko tindin pajo je m'oyido jobed'iye kodi kambi je.

¹¹ To jotero gigipiny pajo ma jomako kanyacel gi jotwec kodi ogwaŋe je.

¹² Kenyo jokelo jotwec je kodi gigipiny ma jonyaga ri Musa, Eliazar jacway ri Were i wi migam kodi lwak pa Isiraili i kambi i kam'obipere ma Mowab i thengi Yordan i Yeriko.”

Jolweny jodwoko

¹³ Musa, Eliazar jacway ri Were i wi migam kodi jotel pa lwak jowok romo gi jolweny woko ma kambi.

¹⁴ Musa omako nge gi jotel pa jolweny, jomituka ma ganin kodi jomituka ma miyin m'oyido jodwoko wok i lweny.

¹⁵ Musa openjo jo ni, “Wiweyo mon je doŋ ma jokwo?

¹⁶ Mon me, ma Balam omiyo jo rieko, jomiyo Joisiraili timo maker kwoŋ Rwoth i wac ma mako kwoŋ Pewor, ŋey thoyamo opodho kwoŋ ji pa Rwoth.

¹⁷ Onyo riameno, neki win nyithindho mayac je i dier jo kodi mon je ma jotieko nindo gi jacwo.

¹⁸ To nyir mambula wey win jo makwo riwin.

¹⁹ Bedi win woko ma kambi ma ndelo abirio, kisi ŋat'oneko dhano moro je kosa omako delkwoŋ gim'otho, jowolonyere kodi jotwec mewin i ndelo mar'adek kodi i ndelo mar'abirio.

²⁰ Wiripo lonyo law je, kisi gim'otim gi pien je, kisi gim'otim gi yer diel, kodi kisi gim'otim gi mbawo.”

²¹ Eliazar jacway ri Were i wi migam owaco ri ji m'oyido jowok i lweny ni, “Me fonji ma cik ma Rwoth owodho or ri Musa kwoŋe.

²² Zahabu, feza, ywel, cuma, nyweny kodi waya,

²³ kisi gima kinyal waŋ i mac, iripo rewo i mac aka labedo m'olony. T'iripo bende lwoko gi pi, aka kisi gima nyalo waŋ i mac, ilalwoko gi pi.

²⁴ Wiripo lwoko nangin mewin i ndelo mar'abirio, aka wilabedo m'olony, rumacen to widwoko i kambi.”

Poko gigipiny m'onyaga

²⁵ Rwoth oluwo gi Musa ka waco ni,

²⁶ In kodi Eliazar jacway ri Were i wi migam kodi jotel ma nonin wiripo kwano gigipiny m'onyaga, ji kodi ogwaŋe je.

²⁷ Pok win gigipiny kadirio, i dier ji ma jowok lweny kodi lwak je.

²⁸ Wok kwoŋ migew pa jolweny ma jowok lweny, kethi gicen misolo ri Rwoth, acel wok kwoŋ kisi gigipiny miya abic, obedi dhano, dhok, punde, rombo kosa diegi.

²⁹ Kwany kwoŋ adec pajo aka imiy Eliazar jacway ri Were i wi migam paka mic ri Rwoth.

³⁰ Kwany wok kwoŋ adec pa Joisiraili acel kwoŋ kisi piero abic, obedi ji, dhok, punde, rombo kosa diegi; wok kwoŋ ogwaŋe je aka imiy Jolevi ma jokuro Wema pa Rwoth.

³¹ Kenyo Musa kodi Eliazar jacway ri Were i wi migam jotimo paka Rwoth owodho or ri Musa.

³² Gigipiny m'odoŋ wok kwoŋ gigipiny ma jolweny jonyaga oyido romo rombo 675,000

³³ dhok 72,000

³⁴ punde 61,000

³⁵ kodi nyir ma fodi jokuya cwo 32,000.

³⁶ Migew pa jolweny m'oyido jowok i lweny obedo, rombo kodi diegi 337,500

³⁷ aka misolo pa Rwoth oyido obedo rombo kodi diegi 675.

³⁸ Dhok oyido obedo 36,000 aka misolo pa Rwoth oyido obedo dhok piero abirio g'ario.

³⁹ Punde oyido obedo 30,500 aka misolo pa Rwoth oyido obedo punde piero aucel g'acel.

⁴⁰ Ji oyido obedo 16,000 aka misolo pa Rwoth oyido obedo piero adek g'acel.

⁴¹ Ameno omiyo Eliazar jacway ri Were i wi migam misolo paka mic ri Rwoth cungo kwoŋ or ma Rwoth owodho ri Musa.

⁴² Migew pa ji ma Musa opoko kwoŋ migew pa jolweny oyido obedo,

⁴³ rombo kodi diegi 337,500

⁴⁴ dhok 36,000

⁴⁵ punde 30,500

⁴⁶ kodi ji 16,000.

⁴⁷ Wok kwoŋ migew pa Joisiraili Musa okwanyo acel kwoŋ kisi piero abic, ma ji kodi ogwaŋe, aka omiyo Jolevi m'oyido jokuro Wema pa Rwoth, cungo kwoŋ or ma Rwoth owodho ri Musa.

⁴⁸ Kenyo jotel jolweny m'oyido jotelo jolweny, jomituka ma ganin kodi jomituka ma miyin, jobino bongi Musa,

⁴⁹ aka jowaco rigo ni, “Watieko kwano jolweny je m'oyido watelo, aka ongoye kada ŋat'acel kwoŋ wan m'ongoye.

⁵⁰ Watieko kelo mic pa Rwoth ma kisi dhano kwoŋ wan onwaŋo, gigipiny ma zahabu, pogo kodi atege, petin, milomin kodi tikin, paka mic ma cul mawan ruwaŋ Rwoth.”

⁵¹ Musa kodi Eliazar jojolo zahabu wok bongi jo, je i cal ma gigipiny m'ocwey.

⁵² Zahabu je ma jomiyo paka mic ri Rwoth, wok bongi jomituka ma ganin kodi jomituka ma miyin oyido romo kilo 200.

⁵³ Jolweny wegi oyido jotieko kwanyo gigipiny ma jonyaga.

⁵⁴ Musa kodi Eliazar jacway ri Were i wi migam jojolo zahabu wok bongi jomituka ma ganin kodi jomituka ma miyin, aka jokelo i Wema ma Romo paka rapoy ri Joisiraili ruwaŋ Rwoth.