Kwan 27 - KITAWO MALEŊ

Nyir pa Zelofehad

¹ Nyir pa Zelofehad, Mala, Nowa, Hogla, Milika kodi Tiriza jonyuthere. Zelofehad oyido obedo wod pa Hefer, wod pa Giliad, wod pa Makir, wod pa Manase, wod pa Yozefu, janono pa Manase.

² Jocungo ruwaŋ Musa, Eliazar jacway ri Were i wi migam, jotel, kodi Lwak je ruwaŋ Wema ma romo, aka jowaco ni,

³ “Bawan otho i thim, go oyido k'obedo acel kwoŋ jono ma jocokere kanyacel kwoŋ Rwoth, gi Kora. To go otho ro reco pere won, aka oyido ongoye gi wote.

⁴ Raŋo nyingi bawan worere woko i nono pere kwoŋbedo go oyido ongoye gi wote? Miy wan win lim i dier wutmin bawan.”

⁵ Musa okelo wac me ruwaŋ Rwoth.

⁶ Rwoth oluwo gi Musa ka waco ama:

⁷ Nyir pa Zelofehad jotire i gima jowaco. Iripo adieri miyo jo lim i dier wutmin bajo aka imiy jo lim pa bajo.

⁸ Iripo bende waco ri Joisiraili ni, “Ka jacwo otho, aka ongoye gi wote, iripo miyo lim pere ri nyir pere.

⁹ Ka go ongoye gi nyithindho manyir, iripo miyo lim pere ri wutmin go.

¹⁰ Ka go ongoye gi wutmin, iripo miyo lim pere ri wutmin ba go.

¹¹ Ka ba go oyido ongoye gi wutmin, iripo miyo lim pere ri wat macegin i nono wolunji paka lim pere.” Me labedo ri Joisiraili paka cik kodi or, paka Rwoth omiyo Musa or.

Yosuwa lunjo Musa

¹² Rwoth owaco ri Musa ni, “Idhi malo wi gote Abarim, akinen lowo m'atieko miyo Joisiraili.

¹³ K'itieko neno ilatho, paka omin in Aron,

¹⁴ kwoŋbedo wigwenyere kwoŋ wac paran i thim ma Zin munyo lwak jodhaw kodan. Ikinyutho leŋo paran ruwaŋ jo i pi.” (Me pi manitie i Meriba Kades i thim ma Zin.)

¹⁵ Musa okwayo Rwoth ka waco ni,

¹⁶ “Weyi Rwoth, Were ma won kwo, woyeri dhano telo ji.

¹⁷ Dhano ma latelo yuwaŋ jo, ma lawodho jo woko, ŋey ji pa Rwoth jokiri jowocale rombo ma bu jakwath.”

¹⁸ Rwoth owaco ri Musa ni, “Ter Yosuwa wod pa Nun, jacwo manitie gi nyalo, aka ikethi cingin i wiye.

¹⁹ Miy go cungo ruwaŋ Eliazar jacway ri Were i wi migam kodi lwak je, aka imiy go or lunjin ruwaŋ jo.

²⁰ Miy go dwoŋ perin moro, ŋey lwak pa Isiraili je jowowinji go.

²¹ Go lagoŋere kwoŋ Eliazar jacway ri Were i wi migam, ma lamiyo go ŋeyo mito paran gi Urim ruwaŋ Rwoth. I nger me Eliazar latelo Yosuwa kodi lwak pa Isiraili i kisi gimoro.”

²² Musa otimo paka Rwoth omiyo go or. Go otero Yosuwa to miyo go cungo ruwaŋ Eliazar jacway ri Were i wi migam kodi lwak pa ji je.

²³ Musa oketho cinge i wi Yosuwa to miyo go or lunjo go paka Rwoth omiyo Musa or.