Kwan 20 - KITAWO MALEŊ

Gigipiny m'otimere i Kades

¹ Joisiraili, kweth gibe, jotundo i thim ma Zin i dwe marapena, to ji jodoŋ i Kades. Miriam otho kenyo, t'iyiko kenyo.

² To pi ngoye ri kweth, ameno to jocokere kanyacel thoko Musa kodi Aron.

³ Ji jodhaw gi Musa to jowaco ni, “Bedi cango watho ndelo ma wade mawan jotho ruwaŋ Rwoth!

⁴ Raŋo ikelo kweth pa Rwoth i thim me ma miyo wan kodi mwendi mawan tho ka?

⁵ Raŋo iwodho wan woko ma Misir, t'ikelo wan kama rac me? Obedo kama nyingi kodhi, olemo, vini, kosa pomo jongoy'iye; kiri pi amadha je ongoye.”

⁶ Kenyo Musa kodi Aron jocore gicen kwoŋ kweth i dhiot ma Wema ma romo; jopodho gi nyim jo, to dwoŋ pa Rwoth menyere rijo.

⁷ Rwoth oluwo gi Musa ka waco ama:

⁸ Kwany luth, aka icoki kweth, in kodi omin in Aron, aka wiluw gi tele ka joneno wonyul pi mere. Ameno apaka ilakelo pi wok i tele rijo; ameno apaka wilamiyo gir'amadha ri kweth ji kodi ri mwendi pajo.

⁹ Ameno Musa okwanyo luth wok ruwaŋ Rwoth, paka oyido Rwoth otieko miyo go or.

¹⁰ Musa kodi Aron jocoko cokirok kanyacel ruwaŋ tele, to waco rijo ni, “Winji win, jogwenyirok me, wakel riwin pi wok i tele?”

¹¹ Kenyo to Musa tiŋo cinge malo to goyo tele dirio gi luth pere; to pi wok kweth, to kweth gi mwendi pajo jomadho.

¹² To Rwoth waco ri Musa kodi Aron ni, “Rupiri wikiketho geno mewin kwoŋan, ma nyutho leŋo paran ruwaŋ ji ma Isiraili, riameno ik'okeli cokirok me i piny m'atieko miyo jo.”

¹³ Oyido obedo pi ma Meriba, kama ji ma Isiraili jodhaw'iye gi Rwoth, kodi kama go bende onyutho gine leŋo pere i dier jo.

Kere ma Edom kwero Joisiraili kadho

¹⁴ Musa odhiro jomikwenda wok Kades bongi kere ma Edom. Jowaco ni, “Omin in Isiraili waco ama: Iŋeyo litho je ma watieko romo gine.

¹⁵ Paka kwarere mawan jokidho yupiny Misir, to wabedo Misir ma hongo malac; to Jomisir jodiyo wan gi kwarere mawan;

¹⁶ aka munyo waywak ri Rwoth, go owinjo dwondi wan, to dhiro malaika to fudho wan woko ma Misir; aka onyo ee wanitie ka i Kades, tindi madwoŋ ma thengi adec perin.

¹⁷ Onyo mondo yey wan waluw i piny perin. Wak'oluw i ndelo kosa i ndelo vini, kosa wak'omadhi pi ma jwom moro je, walakadho gi royo pa kere madwoŋ, ma wakiwire yuracuc kosa yuracam cuka wanocow ŋado adec perin.”

¹⁸ To Joedom jowaco rigo ni, “Ik'oluwi, kosa walabino g'abor to wamonjin.”

¹⁹ To Joisiraili jowaco rigo ni, “Walabedo i ngudo madwoŋ; aka ka wanomadhi pi perin, wan kodi mwendi mawan, walaculo gimoro. Obedo nyaka gimathin; yey wan nyaka waŋadi atiendi.”

²⁰ To go dwoko ni, “Wik'oluw.” To Joedom joay kwoŋ jo gi jolweny madwoŋ, gi gilweny kidhur.

²¹ Ameno apaka Joedom jokwero miyo Joisiraili kaluwo iy'adec pajo; onyo to Joisiraili joluwo gi kaman.

Tho pa Aron

²² Kweth gibe ma Isiraili joweyo Kades to jotundo i Got Hor,

²³ i kew kodi Edom. Kenyo to Rwoth waco ri Aron kodi Musa ni,

²⁴ Aron kikidhi donjo i piny ma cango aciko miyo Isiraili; go kidho tho, rupiri wigwenyere kwoŋ or paran i Meriba.

²⁵ Ter Aron kodi wode Eliazar wi got Hor,

²⁶ aka kenyo iluny woko law pa Aron ma tic paka jacway ri Were i wi migam aka ikethi kwoŋ Eliazar. Aron kidho tho kenyo.

²⁷ Musa otimo gima Rwoth owaco rigo. Jokadho wi Got Hor munyo kweth gibe neno.

²⁸ Musa olunyo woko law pa Aron ma tic paka jacway ri Were i wi migam to ketho kwoŋ Eliazar. Kenyo wi Got Aron otho, to Musa kodi Eliazar joloro piny.

²⁹ Kweth gibe to joŋeyo ni Aron otho, to joywako go ma ndelo piero adek.