Kwan 17 - KITAWO MALEŊ

Luth pa Aron ma woth

¹ Rwoth oluwo gi Musa ka waco ni:

² Luw gi Joisiraili aka ikwany ludhe apar g'ario kwoŋ jo, acel ri kisi jatel ma nono, kwoŋ jotel je ma udi pa kwarere pajo. Ndiki nyingi kisi jacwo i luth pere,

³ aka indiki nyingi Aron i luth pa Jolevi. Bino bedo luth acel ri kisi jatel ma nono.

⁴ Ikethi jo i Wema ma romo ruwaŋ sanduku ma cikirok kam'arom'iye kodi win kenyo.

⁵ Luth pa ŋat'anoyer bino kitula; ameno abino ketho i gike kigeŋisa pa Joisiraili ma kisi hongo joketho kwoŋin.

⁶ Musa oluwo gi Joisiraili; to jotel pajo je jomiyo go ludhe, acel ri kisi jatel, cungo kwoŋ udi pa kwarere pajo, ludhe apar g'ario; aka luth pa Aron oyido nitie i dier jo.

⁷ Ameno to Musa ketho ludhe no i kayindi ruwaŋ Sanduku ma Cikirok pa Rwoth.

⁸ Yawere mere, munyo Musa okidho i Wema, luth pa Aron ri nono pa Jolevi oyido otula. Oketho boke, olikalika, to nyak nyandere m'ocek.

⁹ Kenyo Musa owodho woko ludhe je ruwaŋ Rwoth ri Joisiraili je; joneno, to kisi jatel kwanyo luth pere.

¹⁰ Rwoth owaco ri Musa ni, “Kethi luth pa Aron ruwaŋ Sanduku ma Cikirok, wokan paka ranyuth ri Joisiraili ma jogwenyirok, ni jowowey kiŋunyaŋunya kodan, ka k'obedo ameno jolatho.”

¹¹ Musa otimo ameno; otimo paka Rwoth oyido otieko miyo go or.

¹² Joisiraili jowaco ri Musa ni, “Watho woko ka warumo, warwenyo, wajoje warwenyo!

¹³ Kisi dhano m'ocore cegin gi tabenakulo pa Rwoth latho. Wajoje walarere woko!”