Kwan 16 - KITAWO MALEŊ

Gwenyirok pa Kora, Dathan, kodi Abiram

¹ Kora wod pa Izar nyakwar Kohath ma janono pa Jolevi, kanyacel gi Dathan kodi Abiram wot Eliab, kodi Oni wod pa Peleth nyikway Ruben jokwanyo

² cwo ma Joisiraili miya ario gi piero abic, jotel ma kweth m'oyer wok i cokirok, cwo ma joŋeyere swa, to jokidho bongi Musa.

³ Jocokere ruwaŋ Musa kodi Aron to jowaco rijo ni, “Wikadho bor swa! Kweth je joleŋ, kisi dhano kwoŋ jo, aka Rwoth nitie i dier jo. Onyo raŋo winor loyo cokirok pa Rwoth?”

⁴ Munyo Musa owinjo gino to podho gi nyime.

⁵ Kenyo to waco ri Kora kodi wadi je ni, “Odikin Rwoth lanyutho ŋat'obedo apere, kodi ŋataleŋ, kodi ŋat'ilayeyo corok bonge; ŋata go oyer, go layeyo wocore bonge.

⁶ Tim win gime: Kwany win buban, Kora gi wadin je,

⁷ aka dikin wimoki mac i jo, aka wiyar buban i wi jo ruwaŋ Rwoth; aka ŋata Rwoth oyer bino bedo ŋataleŋ. Win Jolevi wikadho bor swa.!”

⁸ Kenyo to Musa waco ri Kora ni, “Winji win pama me, win Jolevi!

⁹ Obedo gimathin riwin swa ni Were pa Isiraili opoko win kwoŋ kweth ma Isiraili, ma yeyo win corok bonge ŋey witim tic ma tabenakulo pa Rwoth, kodi cungo ruwaŋ kweth to witiyo rijo?

¹⁰ Go otieko yeyo win corok bonge, kanyacel gi wutmin win ma Jolevi ma jonitie gi win; kucel wirango bende bedo jocway ri Were i wi migam!

¹¹ Riameno in kodi wadin je witieko cokere kanyacel gwenyirok kwoŋ Rwoth. Aron bende obedo ŋa ma wiŋunyaŋunya gine?”

¹² Kenyo to Musa dhiro ni wolwoŋi Dathan kodi Abiram wot Eliab; to jowaco ni, “Wakilabino!

¹³ Iparo ni obedo gimathin swa m'omiyo iwodho wan woko i lowo ma mol gi cak kodi mo kic ma neko wan i thim, m'omiyo bende idhum wan?

¹⁴ K'obedo adieri ni ikikelo wan i piny ma cak gi mo kic mol'iye, kosa imiyo wan gir'alunja ma ndelin kodi ndelo vini. Oyido d'ineko woko waŋ cwo me? Wakilabino be!”

¹⁵ Nge omako Musa swa to waco ri Rwoth ni, “Ikir'ijol mic pajo moro je. Fodi akikwanyo kada punda acel kwoŋ jo, aka fodi akitimo ri kad'acel kwoŋ jo marac.”

¹⁶ Musa to waco ri Kora ni, “Paka ri in kodi wadin, dikin wibin bongi Rwoth, in, wadin kodi Aron;

¹⁷ aka kisi dhano kwoŋ win wokwany gitiŋo buban pere, wokethi i iye buban, aka kisi dhano wokel gitiŋo buban no ruwaŋ Rwoth, gitiŋo buban miya ario gi piero abic; in bende, kodi Aron, kisi dhano gitiŋo buban pere.”

¹⁸ Ameno to kisi dhano kwanyo gitiŋo buban pere, to jomok'iye mac to jokonj'iye buban to jocungo i dhiot ma Wema ma romo gi Musa kodi Aron.

¹⁹ Kenyo to Kora coko kweth je gwenyirok kwoŋ Musa kodi Aron i dhiot ma Wema ma romo. Abwap to dwoŋ pa Rwoth menyere ri kweth gibe.

²⁰ Kenyo to Rwoth luwo gi Musa kodi Aron ka waco ni:

²¹ Pokere win kwoŋ kweth me ŋey anyal neko jo i hongo macek.

²² Jopodho gi nyim jo, to jokwayo ni, “Awi Were, Were pa ji je, ŋat'acel otim reco to nge makin gi kweth gibe?”

²³ To Rwoth dwoko Musa ka waco ama:

²⁴ Waci ri kweth ji ni jowoeye woko kama Kora, Dathan kodi Abiram jobed'iye.

²⁵ Ameno to Musa ay to kidho bongi Dathan kodi Abiram; to jotel ma Isiraili joluwo go.

²⁶ Kenyo Musa oluwo gi kweth ji ka waco ni, “Eye win woko i kayindi pa cwo ma jodakana me, aka wikiri wigeyi gimoro pajo moro je, kosa ilayweyo win woko gi reco pajo je.”

²⁷ Ameno to joeye woko kama Kora, Dathan, kodi Abiram jobed'iye; to Dathan kodi Abiram jowok woko to jocungo i dhiot ma kayindere pajo kanyacel gi mon pajo, kodi nyithindho pajo.

²⁸ To Musa waco ni, “Me apaka wilaŋeyo ni Rwoth ooran timo tic me je; k'obedo gima an won ayero:

²⁹ Ka ji me jotho m'ongoye giman m'oneko jo kwanyo woko ka Were won am'oomo jo, kosa k'agima Were won am'oyiko obin kwoŋ jo, meno Rwoth k'ooran.

³⁰ To ka Rwoth otim gimoro manyen, to piny ŋamo dhoke to mwonyo jo woko, gi gigipiny pajo je, to jokadho ma jokwo i piny pa jom'otho, nyaka wilaŋeyo ni ji me jocayo Rwoth.”

³¹ Tekin otieko waco wac me je, to piny ma jonyono bare.

³² Piny oŋamo dhoke to mwonyo woko jo, kanyacel gi gigipiny pajo ma ot; kisi ŋat'oyido luwo Kora gi lim pajo je.

³³ Ameno jo kodi gigipiny pajo je jodonjo piny ma jokwo i piny pa jom'otho; piny oumo jo, to jotho wok i dier cokirok.

³⁴ Joisiraili je ma jothoko jo joringo munyo jowinjo joywak, ka jowaco ni, “Piny bende lamwonyo wan!”

³⁵ To mac bino wok bongi Rwoth to neko woko cwo miya ario gi piero abic m'oyido jomiyo buban.

Kabangalin

³⁶ Kenyo Rwoth oluwo gi Musa ka waco ama:

³⁷ Waci ri Eliazar wod pa Aron jacway ri Were i wi migam woneki woko mac i gitiŋo buban; to kedho woko mac bor.

³⁸ Kole gitiŋo buban pa joreco me olokere maleŋ i cul ma kwo pajo. Cadhi jo i sendere mathindho thindho ma umo migam, rupiri jokelo jo ruwaŋ Rwoth to jolokere maleŋ. Ameno apaka jolabedo ranyuth ri Joisiraili.

³⁹ Ameno to Eliazar jacway ri Were i wi migam kwanyo gitiŋo buban ma nyweny ma jono onwaŋo jokelo; t'icadho paka giumo migam.

⁴⁰ Me obedo rapoy ri Joisiraili ni ongoye japath, ma k'obedo nyakwar Aron, ma wocore miyo buban ruwaŋ Rwoth, ŋey wokiri wolokere paka Kora kodi wadi paka Rwoth oyido otieko waco ri Eliazar luwo kwoŋ Musa.

Aron botho ji

⁴¹ Yawere mere, kweth gibe pa Joisiraili joŋunyaŋunya gi Musa kodi Aron ka jowaco ni: “Witieko neko woko ji pa Rwoth.”

⁴² Aka munyo kweth otieko cokere ma gwenyirok kwoŋ jo, Musa kodi Aron to jowire yu Wema ma romo, pondeponde oyido oumo to dwoŋ pa Rwoth menyere.

⁴³ Kenyo to Musa kodi Aron jobino ruwaŋ Wema ma romo,

⁴⁴ to Rwoth luwo gi Musa ka waco ni,

⁴⁵ “Eye woko kwoŋ kweth me, ŋey aneki woko jo i hongo macek.” To jopodho gi nyim jo.

⁴⁶ To Musa waco ri Aron ni, “Kwany gitiŋo buban perin, mok'iye mac wok i migam, aka ikonj'iye buban, itiŋ piyo piyo iter i dier ji, aka itimi kwer ma ŋuto rijo; rupiri keme otieko wok bongi Rwoth; thoyamo otieko cako.”

⁴⁷ Ameno to Aron timo paka Musa oyido otieko waco, to ŋweco i dier cokirok kama thoyamo oyido otieko cak'iye i dier ji. Oketho buban, to timo kwer ma ŋuto kwoŋ ji.

⁴⁸ Ocungo i dier jom'otho kodi jomakwo; to thoyamo jukere.

⁴⁹ Jono ma thoyamo oneko jo obedo 14,700 ma k'okwan jono ma jotho i gwenyirok pa Kora.

⁵⁰ Munyo otiek juko thoyamo, Aron ogik bongi Musa i dhiot ma Wema ma romo.