Kwan 12 - KITAWO MALEŊ

Imiyo Miriam gir'acula

¹ Munyo fodi jonitie i Hazeroth, Miriam kodi Aron joluwo marac kwoŋ Musa ro dhako Jaethopiya m'oyido go onywomo (kole oyido go adieri onywomo dhako Jaethopiya).

² Jowaco ni, “Rwoth otieko luwo gi Musa kende? Go fodi k'oluwo gi wan bende?” To Rwoth winjo.

³ Musa oyido obedo jal mamwol swa, loyo dhano moro je ma piny ka.

⁴ To Rwoth waco abwap ri Musa, Aron kodi Miriam ni, “Wok win woko, wi jadek, i Wema ma romo.” Ameno to jadek no jowok woko.

⁵ Kenyo to Rwoth loro piny i siro ma pondeponde, to cungo i dhiot ma kayindi, to lwoŋo Aron kodi Miriam; to joje jobino yuwiye.

⁶ To waco rijo ni, “Mondo winji win wac paran: Ka nitie jatuci wac Were i dier win, An a Rwoth, amiyo ŋeyirok paran rijo i menyirok; aluwo gi jo i lek.

⁷ K'ameno gi ŋeca paran Musa; go ama amiyo go kuro ji paran je Isiraili.

⁸ Aluwo gi go awaŋ g'awaŋ i lero, makiweno i sikoiyiko; to go neno paka Rwoth cale. Raŋo ma wikilworo luwo marac kwoŋ ŋeca paran Musa?”

⁹ To nge pa Rwoth gaga kwoŋ jo, to go kadho.

¹⁰ Munyo pondeponde oleny woko i wi kayindi, Miriam oyido otieko lokere jadhowo, matar pa pe. Aron owire bongi Miriam to neno ni go oyido obedo jadhowo.

¹¹ Kenyo to Aron waco ri Musa ni, “Awi jadwoŋ paran, ikir'imiy wan gir'acula ri reco ma watimo amiŋa.

¹² Mondo ikir'iwey go wocale gi ŋat'otho, ma del pere adec ocamere woko gi iy min.”

¹³ To Musa ywak ri Rwoth ni, “Awi Were bothi go.”

¹⁴ To Rwoth waco ri Musa ni, “Bedi bamere ŋul law i waŋe, di go k'onyalo bielo wickwot pere ma ndelo abirio? Weyi wocegi go woko ma kambi ma ndelo abirio, aka k'orumo inyalo kelo go i iye kendo.

¹⁵ Ameno t'icego Miriam woko ma kambi ma ndelo abirio; aka ji jok'onyalo ay woth cuka orwaki Miriam i iye kendo.

¹⁶ Rumacen to ji joay wok Hazeroth, to joketho kambi i thim ma Paran.”