Kwan 1 - KITAWO MALEŊ

Kwano ji marapena i Isiraili

¹ Rwoth oluwo gi Musa i thim ma Sinai, i Wema ma romo, i ndelo marapena ma dwe mar'ario, i oro mar'ario munyo jotieko wok i piny Misir. Go owaco ni:

² “In kodi Aron kwan win ji ma Isiraili, nonin pajo gi pecin, cungo kwoŋ kwan ma nyingi jo. Indiki nyingi kisi jacwo;

³ cako i oro piero ario kadho malo, kisi dhano i Isiraili manyalo kidho i lweny. In kodi Aron wilandiko jo muma gi muma.

⁴ Jacwo acel i kisi nono ripo bedo gi win, kisi jacwo ma telo udi pa kwarere pere.”

⁵ Me a nyingi cwo ma jolakonyo win: Wok kwoŋ Ruben, Elizur wod pa Sedur

⁶ Wok kwoŋ Simeo, Selumiel wod pa Zurisaday.

⁷ Wok kwoŋ Yuda, Nason wod pa Aminadab.

⁸ Wok kwoŋ Isakar, Nethanel wod pa Zuar.

⁹ Wok kwoŋ Zebulun, Eliab wod pa Helon.

¹⁰ Wok kwoŋ wot Yozefu: Wok kwoŋ Efrayim, Elisama wod pa Amihud; Wok kwoŋ Manase, Gamaliel wod pa Pedazur.

¹¹ Wok kwoŋ Benyamin, Abidan wod pa Gideon.

¹² Wok kwoŋ Dan, Ahiyeza, wod pa Amisaday.

¹³ Wok kwoŋ Aser, Pagiel wod pa Ociran.

¹⁴ Wok kwoŋ Gad, Eliasaf wod pa Duwel.

¹⁵ Wok kwoŋ Nafital, Ahira wod pa Enan.

¹⁶ Me a jom'oyer i kitipa, jotel ma nono pa kwarere pajo, jotel ma nonin ma Isiraili.

¹⁷ Musa kodi Aron jokwanyo cwo me m'oyido otiek yero jo gi nyingi jo.

¹⁸ I ndelo marapena ma dwe mar'ario, jocoko kitipa ma lwak ji me je kanyacel, m'ondiki jo gi pecin ma udi pa kwarere pajo, gi kwan ma nyingi jo, cako oro piero ario kadho malo. Kisi dhano okwan,

¹⁹ paka Rwoth onwaŋo otieko wodho or ri Musa. Ameno to go kwano jo i thim ma Sinai.

²⁰ Nyikway Ruben, anywola marapena pa Isiraili, bol ma nywolirok pajo, i nonin pajo, gi udi pa kwarere, cungo kwoŋ kwan ma nyingi jo. Kisi dhano, kisi jacwo cako oro piero ario kadho malo. Kisi dhano manyalo kidho i lweny.

²¹ Jom'ondiki jo i nono pa Ruben obedo ji 46,500.

²² Nyikway Simeo, bol ma nywolirok pajo, i nonin pajo, gi udi pa kwarere pajo, kwoŋ jo m'okwan, cungo kwoŋ kwan ma nyingi jo, kisi dhano, kisi jacwo wok i oro piero ario kadho malo, kisi dhano manyalo kidho i lweny.

²³ Jono m'ondiki jo i nono pa Simeo onwaŋo nitie ji 59,300.

²⁴ Nyikway Gad, bol ma nywolirok pajo, i nonin pajo, gi udi pa kwarere pajo, cungo kwoŋ nyingi jo, wok oro piero ario kadho malo, kisi dhano manyalo kidho i lweny.

²⁵ Jono m'ondiki jo ma nono pa Gad onwaŋo nitie ji 45,650.

²⁶ Nyikway Yuda, bol ma nywolirok pajo, i nonin pajo, gi udi pa kwarere pajo, cungo kwoŋ kwan ma nyingi jo, cako oro piero ario kadho malo; kisi jacwo manyalo kidho i lweny.

²⁷ Jono m'ondiki nyingi jo ma nono pa Yuda onwaŋo nitie ji 74,600.

²⁸ Kwoŋ nyikway Isakar, bol ma nywolirok pajo, i nonin pajo, gi udi pa kwarere pajo, cungo kwoŋ kwan ma nyingi jo, cako oro piero ario kadho malo, kisi jacwo manyalo kidho i lweny.

²⁹ Jono m'ondiki nyingi jo ma nono pa Isakar onwaŋo nitie ji 54,400.

³⁰ Kwoŋ nyikway Zebulun, bol ma nywolirok pajo, i nonin pajo, gi udi pa kwarere pajo, cungo kwoŋ kwan ma nyingi jo, cako oro piero ario kadho malo, kisi jacwo manyalo kidho lweny.

³¹ Jono m'ondiki nyingi jo ma nonin pa Zebulun onwaŋo nitie ji 57,400.

³² Kwoŋ nyikway Yozefu, meno nyikway Efrayim, bol ma nywolirok pajo, i nonin pajo, gi udi pa kwarere pajo, cungo kwoŋ kwan ma nyingi jo, cako oro piero ario kadho malo, kisi jacwo manyalo kidho i lweny.

³³ Jono m'ondiki nyingi jo ma nono pa Efrayim onwaŋo nitie ji 40,500.

³⁴ Kwoŋ nyikway Manase, bol ma nywolirok pajo, nonin pajo, gi udi pa kwarere pajo, cungo kwoŋ kwan ma nyingi jo, cako oro piero ario kadho malo, kisi jacwo manyalo kidho i lweny.

³⁵ Jono m'ondiki nyingi jo ma nono pa Manase onwaŋo nitie ji 32,200.

³⁶ Kwoŋ nyikway Benyamin, bol ma nywolirok pajo, i nonin pajo, gi udi pa kwarere pajo, cungo kwoŋ kwan ma nyingi jo, cako oro piero ario kadho malo, kisi jacwo manyalo kidho i lweny.

³⁷ Jono m'ondiki nyingi jo ma nono pa Benyamin onwaŋo nitie ji 35,400.

³⁸ Kwoŋ nyikway Dan, bol ma nywolirok pajo, i nonin pajo, gi udi pa kwarere pajo, cungo kwoŋ kwan ma nyingi jo, cako oro piero ario kadho malo, kisi jacwo manyalo kidho i lweny.

³⁹ Jono m'ondiki nyingi jo ma nono pa Dan, onwaŋo nitie ji 62,700.

⁴⁰ Kwoŋ nyikway Aser, bol ma nywolirok pajo, i nonin pajo, gi udi pa kwarere pajo, cungo kwoŋ kwan ma nyingi jo, cako oro piero ario kadho malo, kisi jacwo manyalo kidho i lweny.

⁴¹ Jono m'ondiki nyingi jo ma nono pa Aser onwaŋo nitie ji 41,500.

⁴² Nyikway Nafital, bol ma nywolirok pajo, i nonin pajo, gi udi pa kwarere pajo, cungo kwoŋ kwan ma nyingi jo, cako oro piero ario kadho malo, kisi jacwo manyalo kidho i lweny.

⁴³ Jono m'ondiki nyingi jo ma nono pa Nafital onwaŋo nitie ji 53,400.

⁴⁴ Me a ji m'onwaŋo ondiki nyingi jo, ma Musa kodi Aron jondiko nyingi jo gi kony pa jotel ma Isiraili, cwo apar g'ario, kisi ŋat'acel ocungo ri ot pa kwari mere.

⁴⁵ Ameno Joisiraili gipi, gi udi pa kwarere pajo, cako oro piero ario kadho malo, kisi jacwo manyalo kidho i lweny i Isiraili

⁴⁶ kwan pajo je onwaŋo obedo ji 603,550.

⁴⁷ To Jolevi k'okwan jo gi nono pa kwarere pajo paka wadi.

⁴⁸ Rwoth oyido otieko luwo gi Musa ni:

⁴⁹ Nono pa Levi kende ama ikir'indiki nyingi jo aka ikir'ikwan jo gi Joisiraili man.

⁵⁰ To kethi Jolevi bedo jokur ma tabenakulo ma cikirok, gi gigipiny ma mako kwoŋe je; joripo tiŋo tabenakulo gi gigipiny mere je, jobino kuro to jothoko tabenakulo.

⁵¹ K'owodhi tabenakulo, Jolevi jobino kwanyo to joketho piny, aka k'ikidho jengo tabenakulo, Jolevi jolaŋawo malo. Japath moro je m'ocore cegin gine iripo neko.

⁵² Ji ma Isiraili jobino cokere i kitipin pajo, kisi jacwo i kambi pere gi dwoŋ pere.

⁵³ To Jolevi jobino cokere thoko tabenakulo ma cikirok, ŋey keme paran okir obin kwoŋ cokirok pa ji ma Isiraili; aka Jolevi jobino bedo jokur ma tabenakulo ma cikirok.

⁵⁴ Joisiraili jotimo ameno; paka Rwoth oyido otieko wodho or ri Musa.