Jothum Banja 9 - KITAWO MALEŊ

Dhum pa Abimelek

¹ Abimelek wod pa Gideon okidho i Sekem pa ney go to waco rijo kodi jonono pa min je ni,

² “Luw win i ithi ji ma Sekem je ni, ‘Aŋo maber riwin, nike wot Gideon piero abirio je jowodhum win, kosa nike acel ama wodhum win?’ Poyi win nike abedo coko mewin aka del mewin.”

³ Ameno jopa ney go joluwo wac me je i ithi cwo je ma Sekem; aka cuny jo omiyere luwo Abimelek. Kole jowaco ni, “Go obedo omin wan.”

⁴ Jomiyo Gideon nusu ma feza ma both romo kilo wok i ot pa Bal Berith, aka Gideon ooro ma kipangisa cwo ma bukony ma joworo luwo go.

⁵ Abimelek okadho peco pa bamere i Ofira, to neko wutmin go, wot pa Gideon piero abirio, i wi tele acel. To Yotham ocoko pa Gideon obothi, ato go opondo.

⁶ Kenyo jodhum je ma Sekem kodi ma Bethmilo je, jokadho to joketho Abimelek bedo kere, i thengi yath madwoŋ ma siro i Sekem.

Ageca ma yen

⁷ Munyo owaci ri Yotham, go okidho to cungo wi got Gerizim. Aka oywaki malo to waco rijo ni, “Winjan win, win jodhum ma Sekem, ŋey Were wonyali winjo win.”

⁸ “Cango yen jowok wiro kere dhumo jo. Jowaco ri yath oliv ni, ‘Dhum wan.’

⁹ To yath oliv dwoko jo ni, ‘Anowey nywolo mo paran ma miyo werin kodi ji jolimo dwoŋ, t'akadho dhumo yen?’

¹⁰ Kenyo jowaco ri yath makuyu ni, ‘Biye idhumi wan.’

¹¹ To makuyu dwoko jo ni, ‘Anowey nyak mito paran kodi olemo paran mamit, t'akadho dhumo yen?’

¹² Kenyo yen jowaco ri yath vini ni, ‘Biye idhumi wan.’

¹³ To yath vini dwoko jo ni, ‘Anowey nywolo vini paran ma miyo werin kodi ji yodirok, t'akadho dhumo yen.’

¹⁴ Kenyo yen jowaco ri kudho ni, ‘Biye idhumi wan.’

¹⁵ To kudho dwoko jo ni, ‘K'inen wiwiran bedo kere adieri, biye wibwok i tipo paran, to k'inen be, weyi mac owok iy'okudho aka worey woko yen sida je ma Lebanon.’ ”

¹⁶ “Onyo riameno, k'inen witimo adieri kodi dwoŋ munyo wiketho Abimelek bedo kere, aka k'inen witiyo maber gi Gideon kodi peco pere, aka witimo rigo gima tim pere ripo gine,

¹⁷ kwoŋbedo baba olwenyo riwin, aka ojwango kwo pere to botho win wok i cingi Jomidian.

¹⁸ To wiay kwoŋ peco pa baba ndelo me, aka witieko neko wote, cwo piero abirio i wi tele acel, onyo wiketho Abimelek, wod ŋeca pere madhako, kere pa jodhum ma Sekem, kwoŋbedo go obedo okewo mewin.

¹⁹ K'inen onyo witimo g'atoŋa maber kodi dwoŋ ri Gideon kodi peco pere ndelo me, ere fore win i Abimelek, aka weyi go wofore i win.

²⁰ To ka be, weyi mac owok kwoŋ Abimelek, aka orey woko jodhum ma Sekem kodi Bethmilo; aka weyi mac owok kwoŋ win, orey woko Abimelek.”

²¹ Kenyo Yotham oringo woko, to kadho i Ber, kama go obed'iye bor ruwaŋ Abimelek.

Podho pa Abimelek

²² Abimelek odhumo Isiraili ma oro adek.

²³ Rwoth odhiro cuny marac i dier Abimelek kodi jodhum ma Sekem; aka jodhum ma Sekem jotiyo akor gi Abimelek.

²⁴ Gime otimere ŋey gwayo m'otimo ri wot Gideon piero abirio ocul kwor mere aka remo pajo wobedi i wi omin jo Abimelek, m'oneko jo, kodi jodhum ma Sekem, ma jomiyo cingi meni go neko wutmin go.

²⁵ Jodhum ma Sekem jotega go wi gote. Jonyaga jono je ma joluwo i royo no; aka oosa ri Abimelek.

²⁶ Gal wod pa Ebed obino i Sekem gi wutmin, aka jodhum ma Sekem jogeno go.

²⁷ Jokadho i ndelin pajo, aka jofono nyingi vini i ndelo vini pajo, jodhiŋo to jocamo kalima. Kenyo jodonjo i ot were pajo, jocemo, jomedho, to jokwoŋo Abimelek

²⁸ Gal wod pa Ebed openjo ni, “Abimelek obedo ŋa, aka wan Josekem wabedo jokune ma waripo tiyo rigo? Kere cango wod pa Gideon kodi Zebul jatel jolweny pere k'otiyo ri cwo ma Hamor ba Sekem? Raŋo nyo waripo tiyo rigo?

²⁹ Kabedi oyido ji me jonitie i cingan, dinyo akwanyo woko Abimelek; dinyo awaco rigo ni, ‘Medi jolweny perin, aka wok woko.’ ”

³⁰ Munyo Zebul owinjo jadhum ma tindi madwoŋ owinjo wac pa Gal wod pa Ebed, nge pere oliel.

³¹ Go odhiro jomikwenda bongi Abimelek i Aruma ka waco ni, “Neni, Gal wod pa Ebed kodi wutmin jobino i Sekem, aka jogeŋin kwoŋ tindi madwoŋ.

³² Onyo riameno, kadhi wor, in kodi ji ma jonitie bongin, aka ikuri i sa.

³³ Kenyo odikin, tekin waŋceŋ gulo, ay iredi i tindi madwoŋ; aka ka go kodi cwo ma jonitie gi go joay kwoŋin, inyalo timo rijo paka cingin mito.”

³⁴ Abimelek kodi ji m'oyido jonitie bonge joay wor aka jobino to jokure Sekem i kitipin aŋwen.

³⁵ Munyo Gal wod pa Ebed owok to cungo i waŋkac ma tindi madwoŋ, Abimelek kodi jolweny m'oyido jonitie bonge joay wok i dudi.

³⁶ Munyo Gal oneno jo, owaco ri Zebul ni, “Neni, ji joloro bino piny wok wi got!” Zebul odwoko ni, “Ineno tipo ma wi got paka ji.”

³⁷ Gal oluwo kendo to waco ni, “Neni, ji joloro piny wok cegin gi dier piny, aka kitipa man bino wok i royo mar'ajwoka pa jamiliel.”

³⁸ Zebul owaco rigo ni, “Nikune dhokin pama, in m'ipenjo ni, ‘Abimelek obedo ŋa, ma waripo tiyo rigo?’ Me ki jolweny m'icayo? Wok pama aka ilweny gi jo.”

³⁹ Gal owok to telo jodhum ma Sekem, aka jolwenyo gi Abimelek.

⁴⁰ Abimelek oriemo Gal m'oringo, aka kweth jopodho piny ma jolimo litho kiri ruwaŋ waŋkac.

⁴¹ Ameno Abimelek obedo i Aruma, aka Zebul oriemo woko Gal kodi wutmin; ŋey jokiri jowobedi i Sekem.

⁴² Ndelo ma yawere ji jowok kadho i ndelin pajo. Munyo owaci ri Abimelek,

⁴³ go otero jolweny pere to poko jo i kitipin adek, aka jokuro i ndelin. Munyo Abimelek oŋiyo to neno ji jowok i tindi madwoŋ, go oay kwoŋ jo to neko jo.

⁴⁴ Abimelek kodi kitipa m'oyido nitie bonge joredo to jocungo ruwaŋ waŋkac ma tindi madwoŋ, aka kitipin ario joredo to joneko woko ji je m'oyido jonitie i ndelin.

⁴⁵ Abimelek olwenyo kwoŋ tindi madwoŋ ndelo gipi, omako tindi madwoŋ, oneko ji m'oyido jobed'iye; aka oturo piny to cwoyo gi cumbi.

⁴⁶ Jodhum mar'acurcur ma Sekem jowinjo, aka jodonjo i kapondo ma ot were ma Elberith.

⁴⁷ Kenyo owaci ri Abimelek nike jodhum mar'acurcur ma Sekem oyido jocokere kanyacel.

⁴⁸ Abimelek okadho malo wi got Zalmon, go kodi ji je m'oyido jonitie bonge. Abimelek okwanyo le i cinge, aka otoŋo jangi yen to liero i goke. Kenyo go owaco ri ji m'oyido jonitie bonge ni, “Gima wineno atimo, kwaki win timo paka an.”

⁴⁹ Ameno kisi dhano m'oyido nitie bonge otoŋo jangi yath to liero i goke to joluwo Abimelek. Joketho i kapondo to jocwinyo mac kwoŋe, ŋey ji je m'oyido jopondo iy'acurcur ma Sekem jotho bende. Ji ma romo mondongo kodi cwo gana.

⁵⁰ Abimelek okadho Thebez, othoko, aka omako.

⁵¹ To oyido nitie acurcur matek i tindi madwoŋ, aka ji je ma tindi madwoŋ joring'iye, cwo kodi mondongo kodi jodhum ma tindi madwoŋ joring'iye to jocegere; aka joidho malo i wiye.

⁵² Abimelek obino iy'acurcur aka olwenyo kwoŋe, ocore cegin gi thigo mar'acurcur waŋo gi mac.

⁵³ To dhako moro obolo tele wok malo i wic Abimelek, aka oŋinyo woko pado wiye.

⁵⁴ Abimelek olwoŋo piyo jayac ma tiŋo gilweny pere, aka owaco rigo ni, “Cel abor perin inekan, ŋey okir owaci nike dhako am'onekan.” Ameno jayac no ocwowo go to tho.

⁵⁵ Munyo Joisiraili joneno nike Abimelek otieko tho, jodok pecin pajo.

⁵⁶ Ameno Were oculo Abimelek ri kidakana pere m'otimo ri bamere gi oneko wutmin go piero abirio.

⁵⁷ Were bende omiyo kidakana pa cwo ma Sekem podho i wi gin, kodi kwoŋ ma Yotham wod pa Gideon olwoŋo kwoŋ jo.