Joroma 5 - KITAWO MALEŊ

Tiro gi Were

¹ Paka onyo okethi wan i tiro gi Were cungo kwoŋ yeyo, onyo wanitie i siem gi Were kwoŋ Rwodhiwan Yesu Kristo.

² Go am'okelo wan i nema pa Were ma pama wacung'iye. Am'omiyo wasangala i geno ma wanitie gine ma limo dwoŋ pa Were!

³ Maloyo meno, wasangala i candirok mawan, rupiri waŋeyo ni candirok kelo ciro,

⁴ ciro miyo Were foyo wan, aka foyo pere kelo riwan geno.

⁵ Geno me kikwoti wiy wan, rupiri Were otieko konjo mar pere i cuny wan, munyo omiyo wan Cuny Maleŋ, m'obedo mic pa Were riwan.

⁶ Munyo fodi oyido wanyap, Kristo otho ri joreco i hongo ma Were oyero. Raŋo ameno?

⁷ Kole tek swa moro tho ri ŋat'otire. Kono moro nyalo miyere to tho ri ŋataber.

⁸ To Were otieko nyutho wan paka omaro wan, rupiri munyo fodi wabedo joreco, Kristo otho riwan.

⁹ Paka tho pere onyo okelo wan i tiro gi Were, maloyo kenyo, go bino botho wan kwoŋ keme pa Were.

¹⁰ Wan oyido wabedo jokwor pa Were, to Were odwoko wan i tiyirok gine kwoŋ remo pa Wode. Aka paka onyo watieko dwoko i tiyirok gi Were, kwo pa Wode onyo bino botho wan kicutho.

¹¹ To ki meno kende; wasangala i Were kwoŋ Rwodhiwan Yesu Kristo, ma pama odwoko wan i tiyirok gi Were.

Adam kodi Kristo

¹² Gimarac obino i piny ka luwo kwoŋ ŋat'acel, aka gimarac pere okelo tho. Gim'owok'iye, tho olak kwoŋ dhano je, rupiri ji je jonigi gimarac.

¹³ Gimarac oyido nitie i piny mafodi k'owodhi Cik; to kama Cik ongoy'iye kikwan'iye reco ri nyatoro.

¹⁴ To wok i ndir pa Adam tundo i ndir pa Musa, tho odhumo ji je, kada jom'oyido jok'otimo reco paka Adam munyo okwero mako cik pa Were. Adam obedo cal pa ŋat'oyido kidho bino rumacen.

¹⁵ To mic pa Were ma nono no, kicale gi gimarac ma Adam otimo. K'inen ji mathoth jotho ro gimarac pa Adam ŋat'acel no, ameno nema pa Were kodi mic ma nono man nema pa ŋat'acel, Yesu Kristo, loyo meno bor swa.

¹⁶ Aka pokirok nitie i dier mic pa Were kodi gimarac pa ŋat'acel. Munyo otiek timo gimarac acel, gim'oluwo athumo banja ni, “Banja oloyo ŋato.” To munyo reco olokere madit, mic m'oyido wakiripi gine obino ni, “Okwany woko banja pa ŋato!”

¹⁷ K'inen ro gimarac pa ŋat'acel am'omiyo tho ocako dhum kwoŋbedo ŋat'acel no, meno kere adieri joma jonwaŋo nema mathoth kodi mic ma nono ma tiro bende jobino dhumo maloyo i kwo ro ŋat'acel, Yesu Kristo.

¹⁸ Am'omiyo paka kibenga pa ŋat'acel omiyo banja oloyo ji je, ameno bende ibino kwanyo woko banja kwoŋ ji mathoth ro winjo pa ŋat'acel.

¹⁹ Ato paka kibenga manyaturo cik pa ŋat'acel oloko ji kweth jogimarac, apaka bende winjo cik pa ŋat'acel miyo iloko ji kweth jom'otire.

²⁰ Munyo Cik obino, kibenga manyaturo Cik omedere; to kama reco meder'iye, nema pa Were bende medere loyo.

²¹ Am'omiyo, paka gimarac odhumo i royo ma tho, ameno bende nema pa Were dhumo i royo ma kwanyo woko banja kwoŋ ji, munyo tero jo i kwo makirum kwoŋ Yesu Kristo Rwodhiwan.