Jolevi 6 - KITAWO MALEŊ

¹ Rwoth oluwo gi Musa ka waco ama:

² Ka nyatoro otimo reco kosa obenga kwoŋ Rwoth gi wondo jager pere i gim'omiy go kano kosa ociko, kosa okwalo, kosa otwodo,

³ kosa onwaŋo gim'orwenyo to twodo kwoŋe, k'okwoŋere nono iy'acel kwoŋ gigipiny me ma dhano timo, meno otimo reco.

⁴ Tekin go ŋeyo reco pere, to mito dwoko gima go okwalo kosa otwodo kwoŋe, kosa ociko, kosa gim'orwenyo ma go onwaŋo,

⁵ kosa giman je m'ikwoŋere kwoŋe nono, iripo culo ma ripo kodi adec man i wiye. Iripo culo won mere tekin iŋeyo banja perin.

⁶ Aka ilakelo bongi jacway ri Were i wi migam, paka mic ma banja ri Rwoth, wod rombo m'ongoye gi ŋolo wok i mwendi perin, kosa gima rom gine, ri mic ma banja.

⁷ Jacway ri Were i wi migam latimo cowirok ma cwako reco perin ruwaŋ Rwoth, aka ilacwako rin ri gim'inotimi je to miyin bedo jabanja.

Kwer ma mic awaŋa

⁸ Rwoth oluwo gi Musa ka waco ama:

⁹ Miy Aron kodi wote cik k'iwaco rijo ama: Me kwer ma mic awaŋa. Mic awaŋa ripo doŋ i wi migam tundo odikin, aka mac ma migam ripo bedo ka liel.

¹⁰ Jacway ri Were i wi migam laruko law pere, i wi pale macek, aka lakwanyo buru ma mic awaŋa ma mac owaŋo, to ketho i thengi migam.

¹¹ Go lalunyo woko law pere to ruko nanga man, aka latiŋo buru to tero woko ma kambi, i kabedo m'olony.

¹² Mac ma wi migam ripo bedo ka liel, aka kiripi tho. Kisi odikin jacway ri Were i wi migam lamedo yen i wiye, laketho mic awaŋa i wiye, to waŋo bor ma mic ma siem.

¹³ Mac ripo liel i wi migam noknok, aka kiripi tho.

Kwer ma mic ma cemo manyinge

¹⁴ Me kwer ma mic ma cemo manyinge. Wot Aron jolamiyo mic ruwaŋ Rwoth, yuwaŋ migam.

¹⁵ Jolajowo moko masi cingi jo kodi mo ma mic ma cemo manyinge, kanyacel gi buban manitie i mac, aka jolawaŋo i wi migam ri ŋwece kur mamit ri Rwoth.

¹⁶ Adec ma mic m'odoŋ, Aron kodi wote jolacamo paka jocamo mugat ma buthow i Kabedo Maleŋ, i diedipo ma Wema ma romo.

¹⁷ Kiripi tedo gi thow. Atieko miyo paka adec pajo ma mic paran m'iwaŋo gi mac. Obedo adec maleŋ swa, paka mic ma cwako reco kodi mic ma banja.

¹⁸ Nyikway Aron ma cwo je joripo camo, paka adec pajo ma cil gi cil i luse pajo je, wok i mic pa Rwoth m'iwaŋo gi mac; kisi gim'ogey jo je labedo maleŋ.

¹⁹ Rwoth oluwo gi Musa ka waco ni:

²⁰ Me mic ma Aron kodi wote jolamiyo Rwoth i ndelo m'owir go gi mo. Kilo acel ma moko paka mic ma kisi ndelo, adec odikin, aka adec othieno.

²¹ Iripo timo gi mo i sapik i kendo, ilakelo m'obil maber gi pi, m'oŋiny mathindho thindho, aka ilamiyo ri ŋwece kur mamit ri Rwoth.

²² Aka jacway ri Were i wi migam, m'owir gi mo, kwoŋ wot Aron, lamiyo. Me obedo adec pa Rwoth m'iripo waŋo cil gi cil.

²³ Mic ma cemo pa jacway ri Were i wi migam je iripo waŋo, kiripi camo.

Kwer ma mic ma cwako reco

²⁴ Rwoth oluwo gi Musa ka waco ama:

²⁵ Luw gi Aron kodi wote, iwaci rijo ni: Me kwer ma mic ma cwako reco. Mic ma cwako reco ilathumo ruwaŋ Rwoth kama ithum'iye mic awaŋa; obedo maleŋ swa.

²⁶ Jacway ri Were i wi migam ma lamiyo paka mic ma cwako reco, lacamo i Kabedo Maleŋ, i diedipo ma Wema ma romo.

²⁷ Kisi gim'ogey riŋo mere labedo maleŋ, aka ka remo mere okire i nanga, iripo lwoko woko remo no i Kabedo Maleŋ.

²⁸ K'otedi i dak ma lowo iripo turo woko; to k'otedi i dak ma ywel, iripo rudo t'ilawo gi pi.

²⁹ Cwo je i dier jocway ri Were i wi migam joripo camo, obedo gimaleŋ swa.

³⁰ To ongoye mic ma cwako reco ma wocam ma remo mere ikelo i Wema ma romo ma cwako reco i Kabedo Maleŋ; iripo waŋo gi mac.