Jolevi 5 - KITAWO MALEŊ

Banjin ma yenyo mic ma cwako reco

¹ Ka nyatoro otimo reco gi kwero winjo lwoŋo bedo jakony ma luwo adieri, makada nende go oyido oneno kosa oŋeyo, to kwero luwo, iripo miyin gir'acula.

² Kosa ka nyatoro ogeyo gimoro je makoc, obedi ogwaŋ makoc m'otho, kosa gigipiny ma joay gi bwombi jo makoc m'otho, ma k'oŋeyo, meno loko go makoc, aka bedo jabanja.

³ Kosa k'igeyo koco pa dhano, gimoro je ma loko dhano makoc, aka ikiŋeyo, tekin iŋeyo, ilabedo gi banja.

⁴ Ka nyatoro okwakere kwoŋirok ri atoŋa marac kosa maber, obedi dhano moro je, ma go k'oŋeyo, tekin go ŋeyo, ilabedo gi banja.

⁵ K'iŋeyo banja perin kwoŋ gigipiny me, ilatuco reco perin m'itimo.

⁶ Ilakelo ri Rwoth, paka cul ma reco m'itimo, min rombo kosa min diel, paka mic ma cwako reco. Jacway ri Were i wi migam latimo rin cowirok ma cwako reco perin.

⁷ To ka ikinyalo nwaŋo rombo, ilakelo ri Rwoth, paka cul mareco m'itimo, akuro ario kosa njiwin ario, acel ri mic ma cwako reco aka man ri mic awaŋa.

⁸ Ilakelo bongi jacway ri Were i wi migam, ma lamiyo acel paka mic ma cwako reco, to turo ŋute, ma k'ocoto woko.

⁹ Go lakiro remo moro ma mic ma cwako reco i thengi migam, aka remo m'odoŋ lacwer i tiendi migam. Me obedo mic ma cwako reco.

¹⁰ Aka mar'ario go lamiyo paka mic awaŋa cungo kwoŋ kwer mere. Ameno apaka jacway ri Were i wi migam lamiyo mic ma cwako reco perin m'itimo, aka ilacwako rin.

¹¹ To ka ikinyal kelo akuro ario kosa njiwa ario, ilakelo moko m'onuŋere swa kilo acel, paka mic ma cwako reco; Ikir'inywow gi mo kosa buban, kwoŋbedo obedo mic ma cwako reco.

¹² Ilakelo bongi jacway ri Were i wi migam, aka go lajowo masi acel paka adec mere, to waŋo i wi migam, paka mic m'owaŋ gi mac ri Rwoth. Me obedo mic ma cwako reco.

¹³ Ameno jacway ri Were i wi migam lamiyo mic ma cwako reco perin m'itimo, aka ilacwako rin. Paka mic ma cemo manyinge, m'odoŋ labedo apa jacway ri Were i wi migam.

Mic ma cul

¹⁴ Rwoth oluwo gi Musa, ka waco ni:

¹⁵ Ka nyatoro otimo reco ma go k'oŋeyo, i gigipiny maleŋ ri Rwoth, ilakelo, paka mic ma culo banja ri Rwoth, wod rombo m'ongoye gi ŋolo wok i mwendi perin, ma welo mere ripo rom gi welo feza m'ioro i Kabedo Maleŋ. Meno obedo mic ma banja.

¹⁶ Iladwoko gimaleŋ m'oyido ikiculo, aka ilamedo adec kilo i wi m'imiyo jacway ri Were i wi migam. Jacway ri Were i wi migam lamiyo mic ma cwako reco perin gi wod rombo ma mic ma culo banja, aka ilacwako rin.

¹⁷ Ka nyatoro otimo reco ma go k'oŋeyo, to timo gigipiny ma or pa Rwoth kwero, meno itimo banja, aka iripo miyin gir'acula.

¹⁸ Ilakelo bongi jacway ri Were i wi migam wod rombo m'ongoye gi ŋolo wok i mwendi perin, kosa gima rom gine, paka mic ma cwako reco, aka jacway ri Were i wi migam latimo cowirok ma cwako reco m'itimo m'ikiŋeyo, aka ilacwako rin.

¹⁹ Meno obedo mic ma banja, itimo banja ruwaŋ Rwoth.