Jolevi 21 - KITAWO MALEŊ

Leŋo pa jocway ri Were i wi migam

¹ Rwoth owaco ri Musa: “Luw gi jocway ri Were i wi migam, wot Aron aka iwaci rijo ni wongoye moro kwoŋ jo ma wokocere ri jom'otho i dier wade pere.

² To kende ri wat pere macegin, paka min, bamere, wode, nyare, omin,

³ kosa ri nyamin mambula macegin gine kwoŋbedo go fodi k'onywomere; ro go jacway ri Were i wi migam nyalo kocere.

⁴ To go wokiri wokocere, paka go obedo jatel i dier wade pere, ma koco go.

⁵ Jokiripi cido wi jo, kosa lielo thengi ye tik jo, kosa gwerok i delkwoŋ jo.

⁶ Joripo bedo maleŋ ri Were pajo, aka jokiri jowokoci nyingi Were pajo; rupiri jomiyo mic pa Rwoth, m'iwaŋo gi mac, kodi mugat pa Were pajo; riameno joripo bedo maleŋ.

⁷ Jokiripi nywomo malaya, kosa dhako m'otiek nindo gine; kosa dhako m'oeye kwoŋ cwore; kole go leŋ ri Were pere.

⁸ Aka witer go paka ŋataleŋ, rupiri go miyo cemo pa Were mewin; go wobedi maleŋ riwin; rupiri An Rwoth, ŋata loko win maleŋ, aleŋ.

⁹ Aka nyar jacway ri Were i wi migam, ka go okocere gi kidakana, meno koco bamere bende, wowaŋ go gi mac.”

¹⁰ “Jadwoŋ pa jocway ri Were i wi migam kwoŋ wutmin go, m'okonji i wiye mo ma wir, aka ruko law pa jacway ri Were i wi migam kiripi weyo ma k'oboyo wiye, kosa yeco nangin pere.

¹¹ Wokiri wodonji kama nitie iye delkwoŋ ŋat'otho, kosa wokocere, ri bamere, kosa min,

¹² go kiripi wok i Kabedo Maleŋ, kosa koco Kabedo Maleŋ pa Were pere; rupiri leŋo ma mo ma wir pa Were pere nitie kwoŋe. An abedo Rwoth.

¹³ Go ripo nywomo nyako mambula.

¹⁴ Citho, kosa dhako m'oeye, kosa dhako m'otiek nindo gine, kosa malaya, jome go kiripi nywomo; to go ripo nywomo dhako mambula wok i nono pere won,

¹⁵ ŋey wokiri wokoc nyithindho pere i dier ji pere; rupiri An abedo Rwoth ma loko go maleŋ.”

¹⁶ Rwoth oluwo gi Musa ka waco ama:

¹⁷ “Luw gi Aron aka i wac rigo ni: Wongoye jacwo kwoŋ nyikwayin i luse pajo gibe manitie gi ŋolo ma wocore cegin miyo cemo pa Were pere.

¹⁸ Kole ongoye ŋat'oŋol ma ripo core cegin, jacwo ma waŋ'otho kosa m'oŋol, kosa ŋata ume oban kosa ma tiende orwombere,

¹⁹ kosa jacwo ma tiende kosa cinge otur,

²⁰ kosa ŋata kore oŋol, kosa ŋat'otwil, kosa ŋata nitie g'ongula i waŋe kosa ŋata two gwenyo kosa kasengo kosa ŋata lur;

²¹ wongoye jacwo m'oŋol kwoŋ nyikway Aron jacway ri Were i wi migam ma wocore cegin miyo mic pa Rwoth m'iwaŋo gi mac; go nitie gi ŋolo, aka kiripi core cegin miyo cemo pa Were pere.

²² Go nyalo camo cemo pa Were pere, maleŋ loyo, wok i gigipiny maleŋ.

²³ To go wokiri wocore cegin gi nanga m'oliero kosa wocore cegin gi migam, kwoŋbedo go nitie gi ŋolo, ŋey go wokiri wokoc Kabedo Maleŋ paran; kole An abedo Rwoth ma loko jo maleŋ.”

²⁴ Musa owaco ri Aron kodi wote kanyacel gi Joisiraili je.