Jokolosia 3 - KITAWO MALEŊ

¹ Am'omiyo paka otiek cerino win i kwo gi Kristo, onyo kethi win cuny win kwoŋ gigipiny ma polo, kama Kristo niye aka obedo yuracuc pa Were.

² Kethi win paro mewin kwoŋ gigipiny man malo, makiweno kwoŋ ma piny ka.

³ Ato witieko tho, aka kwo mewin onyo opan g'apa Kristo i Were.

⁴ Aka ka kwo mewin, m'obedo Kristo onenere kamaler, aka nyaka wibende wibino nenere gine kanyacel i dwoŋ pere.

Kwo macon kodi manyen

⁵ Am'omiyo, wiripo neko woko awanya ma delkwoŋ win paka cot, kidakana, timo giwickwot, awanya mareco, gi woro (m'obedo lamo cal makicar).

⁶ Kole ro gigipiny me keme pa Were bino podho kwoŋ joma jokiwinji go.

⁷ Onwaŋo yado wiwotho i kwo ma pameno, munyo awanya no am'oyido dhumo kwo mewin.

⁸ To pama wiripo bolo woko kiti gigipiny ma cal meno: Nge, keme, awaca nyingi, nyeko nyingi jo, yet kodi luwo makoc.

⁹ Wikiri wiwondere i dier win, rupiri oyido witieko lunyo woko kwo macon gi kula mere,

¹⁰ aka onyo wiruko kwo manyen, ma Were, jacwec mere, hongo je loko manyen i cal pere won, ŋey wokel win i ŋeyo go maber odoco.

¹¹ Gima wok'iye, ongoye Japath kosa Jayuda, ŋat'othumere kosa ŋata k'othumere, ŋata k'ofonjere, jonono moro, joma ni cen, ŋecin, kosa ji man siem; to Kristo a gimadwoŋ, aka nitie i ji je!

¹² Am'omiyo paka wibedo ji pa Were m'oyer, maleŋ aka ma go omaro, onyo bedi win joma ramere ri wadi win, ma winigi cuny maber, bwonirok, mwolo, kodi diyo cuny.

¹³ Diy win cuny win gi wadi win, aka cwakere win ka moro kwoŋ win nitie gi kiŋunyaŋunya gi nyawote. Wiripo cwakere paka Rwoth bende otieko cwako win.

¹⁴ [Aka maloyo meno je, kethi win mar, ma riwo gigipiny je kanyacel i riwirok m'ocowere.

¹⁵ Weyi siem pa Kristo, ma olwoŋ'iye win paka adec ma del acel wodhum cuny win; Aka bedi win gi foyo Were].

¹⁶ Weyi mikwenda pa Kristo gi ŋaŋo mere je, wobedi i cuny win, munyo wifonjo aka wimedo jowoti win meni gi rieko je, kareno wiwero wer Zabuli, kodi wer ma cuny ka wifoyo Were i cuny win.

¹⁷ Gimoro je ma witimo kosa wiwaco, ripo witim i nyingi Rwoth Yesu, munyo wifoyo Were Baba kwoŋ go.

Kula ma ripo i pecin kodi i udi

¹⁸ Mon, winji win cwogi win, paka ripo i Rwoth.

¹⁹ Cwo, mari win mon mewin, aka wikiri wior liwugo rijo.

²⁰ Nyithindho, winji win jonywol mewin ndir je, rupiri meno a gima sangala Rwoth.

²¹ Jonywol, wikiri wimiy nyithindho mewin nge, rupiri cuny jo nyalo ŋedhere.

²² Ŋecin, winji win jodongo mewin i gimoro je, aka witiy, ki nyaka munyo joneno win, ma miyo jo kisangala, to tiyi win gi cuny win acel, kareno wiworo Rwoth.

²³ Gimoro je ma witimo, tim win gi cuny win acel, pa witiyo ri Rwoth, makiweno ri dhano.

²⁴ Poyi win nike wibino limo kemba ma Rwoth okano riwin. Kole Kristo a Jadwoŋ ma witiyo rigo.

²⁵ Aka jatim reco je ibino culo go tim pere mareco no, rupiri Were tero dhano je marom.