Jogalasia 3 - KITAWO MALEŊ

Cik kodi yeyo

¹ Win Jogalasia mamiŋ! Ŋat'omieno win? Kole otiti i waŋ win won paka Yesu Kristo ogur wi musalaba!

² Amito wiwaci ran nyaka gimoro acel kende: Wilimo Cuny Maleŋ pa Were i timo gima Cik waco, kosa i winjo gi yeyo gima wiwinjo?

³ Winyalo nedi bedo mamiŋ ameno! Witieko cako gi Cuny, to odoko wiyenyo cowo gi meni manyadel ayin nedi?

⁴ Candirok ma witieko nwaŋo je onyo otho nono? Adieri oyido ongoye gima di winwaŋo ye?

⁵ Were miyo win Cuny Maleŋ pere aka timo gir'aura i dier win rupiri witimo gima Cik waco, kosa rupiri wiyeyo Wac Manyen Maber ma wiwinjo?

⁶ Kole ndiko luwo kwoŋ Abraham ni, “Go oyeyo Were, aka yeyo pere am'omiyo Were ojolo go paka ŋat'otire.”

⁷ Am'omiyo, wiripo ŋeyo ni joma jonitie gi yeyo, meno a nyikway Abraham mar'adieri.

⁸ Aka ndiko oneno con ni Were d'oketho Jopath i tiro kodi go i yeyo. Am'omiyo, ndiko onyutho Abraham Wac Manyen Maber con kicutho ni, “Were bino miyo ji je silwany kwoŋin.”

⁹ Am'omiyo ji je ma joyeyo jolimo silwany paka cango Abraham olimo.

¹⁰ Aka dhano je ma cwire i winjo Cik meno nigi kwoŋ ayino i kwo pere, rupiri ndiko waco ni, “Ŋata ndir je kiwinji aka kitim gimoro je m'ondiki i kitawo ma Cik meno ŋato okwoŋ!”

¹¹ Obedo adieri ni ongoye ŋata nwaŋo tiro ruwaŋ Were cungo kwoŋ Cik, rupiri ndiko waco ni, “Jom'otire jobino kwo cungo kwoŋ yeyo.”

¹² To Cik kicungi kwoŋ yeyo; kucel waco ni, “Ŋata timo gimoro je ma cik waco bino kwo gine.”

¹³ Munyo Kristo olokere ŋat'okwoŋ ka waŋ wan, ogonyo wan woko kwoŋ ma Cik kelo, rupiri ndiko waco ni, “Nyatoro je m'olier wi yath meno ŋat'okwoŋ.”

¹⁴ Meno, aka ŋey womiy Jopath silwany ma Were ociko Abraham i Yesu Kristo, aka wanyal jolo Cuny ma Were ociko cungo kwoŋ yeyo.

Cik kodi cikirok

¹⁵ Wutmera, weyi akel ranen kwoŋ gima kisi ndelo: Ka j'ario joyere kwoŋ wac moro to jotimo cikirok i ndiko, ngoye ŋata nyalo turo cikirok no kosa medo kwoŋe gimoro.

¹⁶ I yo acel, Were otimo cikirok pere kodi Abraham gi nyakware. Ndiko kiwaci ni, “Gi nyikwaye.” Ma nyutho ni ji mathoth, to waco ni, “Gi nyakwarin.” Dwoŋ mere ni ŋat'acel, m'obedo Yesu Kristo.

¹⁷ Dwoŋ gim'awaco a me: Cik, m'obino rumacen ma oro miya aŋwen gi piero adek, kinyal turo cikirok to reyo woko gima Were ociko.

¹⁸ Kole ka lunjo lim bedo ro Cik m'otiek ketho meno nyutho ni gino k'owoki i cikirok moro. To Were i ŋono pere omiyo Abraham gima go wolunji rupiri oyido otimo gine cikirok.

¹⁹ To onyo atoŋa pa Cik oyido obedo aŋo? Owodhi Cik ro tim pa ji mareco, aka omiti ni wobedi cuka bino pa nyakwar Abraham, m'otimi gine cikirok. Jomalaika jokonyo ikelo Cik no kareno dhano am'obedo jathek ma cungo i dier ji gi Were.

²⁰ Aka jathek tiyo i dier ji ma kalo acel; Were obedo ŋat'acel manitie i thenge acel.

Atoŋa ma Cik

²¹ Meno nyutho ni Cik piemo gi cikirok pa Were? Be, k'ameno. Ato bedi wodhi cik ma d'okelo kwo ri ji, dwoŋ mere ni dhano d'onyal ketho i tiro gi Were cungo kwoŋ cik nago.

²² To ndiko maleŋ waco ni kisi gimoro nitie i meni pa gimarac, to joma joyeyo jolanyalo limo mic m'ocik cungo kwoŋ yeyo Yesu Kristo.

²³ Mafodi ndir ma yeyo k'otundo, Cik onwaŋo oketho wajoje i twec, cuka wonyuthi yeyo kamaler.

²⁴ Am'omiyo Cik am'oyido kuro wan paka jafonji ma tiro wan cuka Kristo wobin, ŋey wokethi wan i tiro gi Were i yeyo.

²⁵ Paka ndir pa yeyo onyo otieko tundo, jafonji ma tiro ji no onyo ama kikur wan kendo.

Nyithindho pa Were

²⁶ Kole i Kristo Yesu wijoje onyo wibedo nyithindho pa Were cungo kwoŋ yeyo mewin.

²⁷ Ato wijoje ma wilimo batisimo i Kristo, onyo wiruko kwoŋ win Kristo won gipi.

²⁸ Am'omiyo pokirok ongoye kwoŋ Joyuda kodi Jopath, kwoŋ ŋecin kodi joma ni siem, kwoŋ cwo gi mon: Wijoje wibedo acel i Kristo Yesu.

²⁹ Ka wibedo apa Kristo, kole meno wibedo nyikway Abraham, aka wibedo musikin ma jobino lunjo lim ma Were ociko.