Jofilipi 2 - KITAWO MALEŊ

Bwonirok pa Kristo kodi dwoŋ pere

¹ Ka kwo mewin i Kristo nyalo medo win miseni, kosa mar pere nyalo dwoko cuny win, kosa winyalo riwirok i Cuny, kosa winitie gi wor kodi cwako jowoti win,

² onyo sangala win an munyo wibedo gi paro acel, gi mar acel, kareno wibedo acel i cuny win kodi i paro mewin.

³ Wikiri witim gimoro munyo wilaro dwoŋ, kosa wiyumere kicar; to bedi win gi bwonirok i waŋ jowoti win, munyo witero jo paŋini joloyo win gi dwoŋ.

⁴ Aka kisi dhano kwoŋ win wopar kwoŋ gima jowote joyenyo, makiweno gima go ama yenyo.

⁵ Paro mewin ripo bedo paka ma Yesu Kristo oyido nitie gine:

⁶ Kada cal pere oyido nitie i madala pa Were, go k'otemo oro meni no, kada nende go oyido rom gi Were.

⁷ Kucel go oketho meni no gicen, to kwanyo kabedo pa ŋeca, munyo onywol go i cal pa dhano. Aka munyo go onwaŋere i cal pa dhano,

⁸ obwonere aka owinjo Were cuka oyeyo kiri tho; tho wi musalaba!

⁹ Am'omiyo, Were otiŋo go malo i kabedo madwoŋ loyo, to miyo go nyinge madwoŋ loyo nyingi jo je.

¹⁰ Cwec je ma i polo, kodi piny, kodi i pendi piny, jobino goyo congi jo piny gi miyo nyingi Yesu dwoŋ.

¹¹ Aka lew jo je bino tuco ni Yesu Kristo obedo Rwoth, ma miyo Were Bamere dwoŋ.

Liel paka lero i piny

¹² Am'omiyo, wutmera, paka noknok wiwinjo or, ki nyaka ruwaŋan kende, to tektek paka onyo angoye, tiyi win ri both mewin gi lworo kodi kirin.

¹³ Kole Were ama tiyo i win, ma miyo wiyeyi aka winyal timo atoŋa pere.

¹⁴ Tim win gimoro je m'ongoye kiŋunyaŋunya kosa piem,

¹⁵ ŋey wibedi ma wingoye g'apuse, ma witire paka nyithindho pa Were ma jongoye gi raco i dier luse ji m'okom kendo mareco, ma wiripo liel i dier jo paka micalin ma menyo piny.

¹⁶ Ka wicwire i mikwenda ma kwo, aka anobedi g'atoŋa ma yumirok gi win i Ndelo pa Kristo. Kole meno bino nyutho ni tekirok paran je kodi tic k'otho nono!

¹⁷ To kad'onyo cale p'ikonjan woko pa vini m'imedo wi cowirok man kodi tic ma wok i yeyo mewin, je fodi asangala, aka apoko kisangala paran no gi wijoje.

¹⁸ Riameno, wibende sangala win aka wipoki kodan siem mewin.

Timothe kodi Epafrodito

¹⁹ Ageno i Rwoth nike abino dhiro riwin Timothe mayot, ŋey alimi miseni i wac ma kwoŋ win.

²⁰ Angoye gi ŋatiman kwanyo woko go, ma bende iy'adieri dewo kwoŋ win.

²¹ Ŋati man je tho kwoŋ wac pere won, makiweno kwoŋ apa Kristo Yesu.

²² Aka wiwegi wiŋeyo paka Timothe otieko nyutho nyalo pere, rupiri paka nyathi gi bamere, go otieko tic kodan kanyacel i fonjo Wac Manyen Maber.

²³ Ageno oro go bongi win, tekin aŋeyo paka gigipiny obedi ran.

²⁴ Aka ageno i Rwoth ni awon abino tundo bongi win mayot.

²⁵ Odoko aparo nike ripo adhiri riwin omin wan Epafrodito bende, m'otieko tic gi lwenyo ruŋetan, aka otieko kiri tic paka jamikwenda mewin i konyan.

²⁶ Go yenyo swa neno wijoje, aka cunye ramo swa rupiri wiwinjo ni go oyido two.

²⁷ Adieri go oyido two m'oyido cegin tho, to Were mako wor gine; aka ki gi go kende, to gi an bende, ŋey akir'abedi gi litho mathoth i cunyan.

²⁸ Am'omiyo ayikere oro go bongi win, ŋey wisangala ka wineno go kendo, to litho ma cunyan mojere woko.

²⁹ Am'omiyo, joli win go gi kisangala je, paka omin win i Rwoth, odoko wor win ji ma pameno,

³⁰ rupiri go ojala kwo pere, aka oboth'otho ro tic pa Kristo, kendo omiyan kony ma wiwegi di wikinyalo cowo.