Joebulaniya 12 - KITAWO MALEŊ

Were Bawan

¹ Am'omiyo, paka onyo wanitie gi lwak jokony madwoŋ m'othoko wan ameno, onyo weyi wakwanyi woko gimoro je ma riwere riwan i royo, kodi reco ma mito moko kwoŋ wan matek,

² wakethi win waŋ wan kwoŋ Yesu ma yeyo mawan cungo kwoŋe wok i cako tundo i gike. Go ociro musalaba ro kisangala m'onwaŋo kuro go yuwaŋe; k'oparo kwoŋ wickwot ma tho kwoŋ musalaba oyido kidho kelo rigo, kendo onyo pama obedo yuracuc ma kom ma dhum pa Were.

³ Pari kwoŋ go, paka ociro kiti teko no wok kwoŋ joreco, ŋey wikiri winyapere to cuny win ŋedhere.

⁴ Kole i lweny mewin gi reco fodi wikitundo i tho.

⁵ Calo wiy win owil gi wac ma kelo miseni ma Were luwo gi win paka nyithindho pere ni, “Wodan, ikir'icay gir'acula ma Were tirin gine, aka ikir'inyocere ka go ay kwoŋin.

⁶ Kole Rwoth fonjo dhano ma go omito, aka miyo moro je ma go tero paka wode gir'acula!”

⁷ Ciri win candirok mewin paka gim'afonjo win, rupiri candirok mewin nyutho nike Were tero win paka nyithindho pere. Nitie nyathi ma bamere kimiy gir'acula ma temo tiro go?

⁸ Ka wikilimi gir'acula paka nyithindho man je, meno nyutho ni wikibedo nyithindho pere mar'adieri, to nyithindho ma woko ayino.

⁹ Aka kisi dhano kwoŋ wan onwaŋo wan gi bacere mawan ma jomiyo wan gir'acula aka wamiyo jo dwoŋ. Onyo di waripi mwolok marom nedi ri Ba cuny wan to walimo kwo!

¹⁰ Bacere wan jotemo tiro wan gi gir'acula, i hongo macek paka joneno ni otire rijo; to Were miyo wan gir'acula ma tiro wan ma bero mawan, ŋey wopok wan ye leŋo pere.

¹¹ K'imiyo dhano gir'acula ma tiro go, i hongo no gir'acula no cal rigo gimoro ma kiber, ma kelo litho ayino, to rumacen, jom'otweny jo gi gir'acula ma kite no jolimo kemba gi siem ma kwo m'otire.

Fonji kodi nyutho jo teko ma bino

¹² Tiŋi win malo cingi win m'onudere no, aka weyi win congi win wobedi m'ocwiny!

¹³ Hongo je woth win i royo m'opiele maber ri tiendi win, ŋey kam'oŋol wokiri womedi ukirok, to wocangi ayino.

¹⁴ Tem win paka winyalo bedo i siem gi ji je, gi woth i kwo ma leŋo, rupiri ongoye ŋata bino neno Rwoth ma bu leŋo.

¹⁵ Gwokere win ŋey moro wokiri wokeŋ limo nema pa Were, kendo moro wokiri wolokere pa yath makec ma medere dongo to nyeko wadi gi keco pere.

¹⁶ Gwokere win ŋey moro wokiri wolokere jacot kosa ŋata kigen Were paka cango Esau, m'otana woko silwany pere ma lunjo lim paka nyathi makayo nyaka ro cemo dicel.

¹⁷ Wiŋeyo paka go rumacen otemo yenyo silwany pa Bamere; to okwer miyo go, rupiri go k'onyalo nwaŋo royo ma wiro paro pa bamere, kad'otemo ywako kiri gi pigi waŋe.

¹⁸ Fodi wikitundo, paka Joisiraili, bongi gima winyalo geyo, paka got Sinai man gi mac maliel; fodi wikitundo i mudho gi kidisa pa piny gi koyo,

¹⁹ gi derino ma dwondi gwara, kosa kama diderino ma dwondi nyatoro, ma munyo ji jowinjo jokwayo ni jokiri jowowinji wac man kendo,

²⁰ rupiri jok'onyalo ciro gim'owaci ni, “Ka kad'ogwaŋ ogeyo got no, ripo wogoy gi tele cuka wotho.”

²¹ Gima joneno kenyo onwaŋo miyo jo lworo m'omiyo Musa owaco ni, “Kole akirin aka lworo omakan!”

²² Kucel, wibino wi Got Zayon kodi i tindi pa Were makwo, Yerusalem manyapolo, gi jomalaika mere gana gi gana.

²³ Wibino i kweth pa jom'oyeyo Kristo ma jobedo nyithindho pa Were makayo m'ondiki nyingi jo i polo. Wibino bongi Were m'obedo jathum banja ri ji je, kendo bongi cuny ji ma jotire m'olok jo maleŋ.

²⁴ Wibino bongi Yesu, m'ocano cikirok manyen, kodi gi bongi remo ma nyutho wac maber loyo remo pa Abel.

²⁵ Am'omiyo, gwokere win aka wikiri wikwer winjo ŋata luwo. K'inen joma jokwero winjo ŋat'oluwo munyo fonjo jo kwoŋ gwokirok i piny ka jok'oboth, onyo waŋati wanobothi nedi ka wawiro ŋey wan ri ŋata luwo m'owok i polo ma mito ni wagwokere!

²⁶ I hongo no dwonde oyengo piny, to i hongo ma pama go ociko ni, “Odoko abino yengo ki nyaka piny kende, to polo bende.”

²⁷ Wac me ni, Odoko, nyutho maber n'ibino yengo gi ŋilo woko gigipiny m'ocwey, aka nyaka gigipiny ma kiyengere ama bino doŋ.

²⁸ Am'omiyo, rupiri wakidho limo ker ma kinyal yengere, weyi wafoy win Were to walamo go i royo ma sangala go, gi bwonirok gi lworo;

²⁹ kole Were mawan obedo mac ma rego woko gigipiny.