Joebulaniya 10 - KITAWO MALEŊ

¹ Cik pa Joyuda obedo nyaka cal ma riprip mapa gigipiny ma labino, to k'obedo gimar'adier mere won, ma gikululu ma labino. Am'omiyo kiti cowirok no, m'imiyo ma kike oro gi oro, kinyal loko joma core bongi Were m'olony kicutho.

² Bedi kiti cowirok no oyido nyalo lonyo joma lamo Were makicutho, di ji jok'oweyo tero mic ma cowo reco, kareno jokiwinji banja i cuny jo ro reco kendo? Kole jom'onwaŋo jolamo Were di jolony dicel kicutho, m'ongoye kendo winjo banja i cuny jo.

³ To paka nitie, kiti cowirok no poyo ji reco pajo ayino kisi oro,

⁴ rupiri remo thwondhe kodi diegi kinyal kwanyo woko reco.

⁵ Ro wac me, munyo Kristo obino i piny, owaco ri Were ni, “Racow kodi mic ikiyeny, to del m'iyiko ran ayino.

⁶ Mic awaŋa ma le kodi mic ma cowo reco, ikisangala gine.

⁷ Gikenyo awaco ni, ‘Anika, a Were, ma timo gim'iyenyo ni atimi, paka ondiki kwoŋan i kitawo ma Cik.’ ”

⁸ Munyo go otieko waco ni, “Racow kodi mic awaŋa ma le kodi mic ma cowo reco ikiyeny.” (Me mic m'imiyo paka Cik yenyo.)

⁹ Gikenyo to go medo ni, “Anika, a Were, ma timo gim'iyenyo ni atim.” Am'omiyo, Were otieko kwanyo woko gi cowirok macon je to ketho manyen.

¹⁰ Aka Yesu Kristo otieko timo gima Were omito ni go wotim, am'omiyo wajoje onyo oloki wan m'olony kwoŋ reco i cowirok ma go otimo ma delkwoŋe won, dicel kende to kicutho.

¹¹ Jacway ri Were i wi migam mapa Joyuda je cungo aka timo tic pere kisi ndelo aka cwayo cowirok ma nger acel dikweth. To kiti cowirok me kinyal kwanyo woko reco.

¹² To Kristo ocwayo cowirok acel ri reco dicel kende to bedo piny yuracuc pa Were.

¹³ Wok i hongo no, go onyo kuro Were wokethi jokwor pere paka kasik ma ketho tiende.

¹⁴ Am'omiyo, gi cowirok ma go ocwayo dicel no, go otieko lonyo kicutho joma onyo pama ilonyo jo kwoŋ gimarac.

¹⁵ Kole Cuny Maleŋ bende ridho wac me. Marapena go waco ni,

¹⁶ “Me a cikirok m'abino timo gi jo: Rumacen ma ndelo no; Rwoth waco ama: Abino ketho cik paran i cuny jo, aka abino ndiko i paro pajo.”

¹⁷ Go odoko omedo ni, “Akibino odoko poyo reco pajo kodi tim pajo mareco.”

¹⁸ Aka kama reco me otiek cwak'iye, mic ma kwanyo woko reco odoko kilayenyere.

Weyi wacore cegin gi Were

¹⁹ Am'omiyo, jowotan, wanitie gi siem m'opoŋ donjo i Kabedo Maleŋ swa kwoŋ tho pa Yesu.

²⁰ Go oyawo riwan royo manyen, royo ma kwo i nanga ma geŋo kisika, m'obedo delkwoŋe won.

²¹ Paka wanitie gi jacway ri Were i wi migam madwoŋ ma kuro Ot pa Were,

²² onyo weyi wacore cegin gi Were, gi cuny wan je, gi yeyo m'ocowere, gi cuny m'otiek lonyo m'odoko kiwinji banja, gi del m'olwok gi pi m'olony.

²³ Weyi wacwire matek kwoŋ geno ma wawaco ni wan gine, rupiri ŋat'omiyo cikirok ogenere.

²⁴ Aka weyi wapar win kwoŋ jowoti wan, munyo wakonyere i nyutho mar gi timo bero ri jowoti wan.

²⁵ Wakiri wawey kite ma romo kanyacel, paka joman onyo jokethere timo. Kucel, weyi wamiyere miseni, konda ni Ndelo pa Rwoth onyo core cegin.

²⁶ Kole ongoye cowirok man m'odoko bino kwanyo woko reco ka watimo reco atoŋa ma to oyido watieko ŋeyo adieri.

²⁷ Kucel, gim'odoŋ a lworo gima bino timere: Thumo banja kodi mac mager ma bino reyo woko joma piemo gi Were.

²⁸ Kole ŋata kiwinji Cik pa Musa ineko m'ongoye wor ka otiek thumo banja loyo go, cungo kwoŋ jokony ario kosa adek ma joridho ni go otimo reco.

²⁹ Onyo wiparo ni ŋata cayo Wod Were, to tero paka gima sisiri remo ma cikirok pa Were m'oloko go maleŋ, aka miyo Cuny ma kelo nema nge, di ripi gi gir'acula marac loyo didi?

³⁰ Kole waŋeyo ŋat'owaco ni, “Abedo jaculi kwor, abino culo kwor.” Ma bende owaco ni, “Rwoth bino thumo banja ri ji pere.”

³¹ Obedo gilworo madwoŋ swa ka nyatoro opodho i cingi Were makwo!

³² Poyi win paka oyido winitie i ndir m'okadho, munyo wijolo lero pa Were, aka wicandere i royo m'omore, to lweny no k'olaco win.

³³ Ndiri megi oyeti win ruwaŋ ji to icando win; aka ruman wicungo kodi joma icando jo marac ameno.

³⁴ Wimako wor gi jom'otwey i jiera, aka munyo omay win lim mewin wiciro teko no gi kisangala, rupiri oyido wiŋeyo ni winitie gi gima beyo loyo meno, ma yindira cil gi cil.

³⁵ Am'omiyo wikiri wiboli woko miseni mewin, rupiri bino kelo riwin kemba madwoŋ swa.

³⁶ Wiripo ciro candirok, ŋey witim gima Were yenyo to wilimo gima go ociko.

³⁷ Kole ndiko waco ni, “Odoŋ nyaka hongo macek won ŋata ripo bino wobin kendo k'ogal.

³⁸ Ji paran ma jotire, jobino kwo i yeyo. Ka moro kwoŋ jo ogik cen, ak'osangala gine.”

³⁹ To wakibedo ji ma jogik cen to jorwenyo. Kucel wabedo joma bedo gi yeyo to jolimo both.