Jafonji 9 - KITAWO MALEŊ

Ter kwo paka bino

¹ Gime je atieko ketho i cunyan, kikaŋasa je, nger ma joma timo gim'otire gi jomariek kodi tim pajo je nitie i cingi Were, obedi mar kosa dakirok dhano kiŋey. Kisi gima nitie ruwaŋ jo obedo pilok.

² Gimoro acel timere ri joma timo gim'otire gi ri jokidakana, ri jomabeyo, ri jom'olony gi jomakoc, ri joma miyo cowirok gi ri joma kimiy cowirok. Paka ŋataber nitie, ameno apaka ŋatarac nitie, ŋata kwoŋere cal ŋata lworo kwoŋirok.

³ Me obedo raco ma timere i pendi waŋceŋ, ni gimoro acel timere ri kisi dhano. Aka bende, cuny ji je opoŋ gi raco, aka neko nitie i cuny jo kafodi jokwo, aka rumacen jokadho bongi jom'otho.

⁴ To ri ŋat'oriwere gi jomakwo je nitie gi geno, kole gwoki makwo ber loyo simbwor m'otho.

⁵ Jomakwo joŋeyo ni jolatho, to ongoye gima jom'otho joŋeyo, jongoye gi kemba, aka wiy ji wil gi jo.

⁶ Mar pajo, dakirok pajo gi nyeko pajo je otieko rere woko cango con, kucel jok'obedi kendo gi migew cil gi cil i gimoro je ma timere i pendi waŋceŋ.

⁷ Kadhi, icami cemo perin gi kisangala, aka imadhi vini perin gi kisangala i cunyin; kole Were otieko yeyo gim'itimo cango con.

⁸ Weyi nangin perin jowobedi matar hongo je, ikir'iwey m'ikiwiro mo i wiyin.

⁹ Neni ni icamo kwo gi dhako m'imaro, hongo je ma kwo perin ma pilok m'otiek miyin i pendi waŋceŋ, rupiri meno obedo kemba perin i kwo gi tic perin m'iol gine i pendi waŋceŋ.

¹⁰ Gimoro je ma cingin nwaŋo atima, tim gi meni perin, kole ongoye tic kosa paro kosa ŋeyo kosa rieko i piny pa jom'otho, kam'ikadh'iye koro.

¹¹ Awire t'aneno i pendi waŋceŋ ni, ŋwec kibedi ri joma dwir, kosa lweny kibedi ri jomatek, kosa cemo k'ibedi ri jomariek, kosa ŋaŋo ri joma niaŋ, kosa wor ri jondijo; to hongo gi silwany bedo ri joje.

¹² Kole dhano okuya hongo ma teko. Paka rec m'imako i bwo, kosa paka winyo ma moko i kilara, apaka bende iciko dhano i bwo i hongo ma teko, ka podho kwoŋ jo abwap.

Rieko dwoŋ loyo miŋo

¹³ Atieko neno bende i pendi waŋceŋ, aka ocale ran gimadwoŋ swa.

¹⁴ Oyido nitie tindi madwoŋ madiny gi cwo manok'iye. Kere madwoŋ obino kwoŋe, to thoko mako, to geto gigeŋo madwoŋ thoko.

¹⁵ Onyo onwaŋere jacwo moro ma jacandi mariek, aka go gi rieko pere to botho tindi madwoŋ. Kucel ongoye ŋat'opoyo jacwo ma jacandi no.

¹⁶ Kenyo awaco ni, “Rieko ber loyo meni, kucel icayo rieko pa jacwo ma jacandi, aka kiwinji wac pere.”

¹⁷ Wac pa ŋatariek manyaliŋliŋ iwinjo, loyo kihola pa jadhum i dier jomamiŋ.

¹⁸ Rieko ber loyo gilweny ma lweny, to ŋatarac acel reyo woko bero kweth.