Jafonji 6 - KITAWO MALEŊ

Kwo m'ongoye kisangala

¹ Nitie gimarac m'atieko neno i pendi waŋceŋ, aka timere swa kwoŋ ji.

² Nyatoro je ma Were miyo go lim, ŋaŋo gi dwoŋ, ma kicandi gima kwo pere gomba, kucel Were kiyey go winjo cwe ma gigipiny me, to jakicar ama lawinjo cwe mere. Me bende obedo pilok, kodi litho marac.

³ Dhano nyalo nywolo nyithindho 100 to kwo ma hongo kweth; to kada oro pere obedi kweth nedi, ka go k'owinjo cwe ma gigipiny mabeyo ma kwo, kosa k'oyiki go, awaco ni, ici apodha woko ber loyo go.

⁴ Kole bino i pilok to kadho i mudho, aka i mudho nyinge umere.

⁵ Medo kwoŋ meno fodi k'oneno waŋceŋ kosa k'oŋeyo gimoro, kucel nwaŋo ywomirok loyo ŋati ca mere.

⁶ Makada nende go medi kwo oro gana ario, to k'oneno gigipiny mabeyo, joje jokikidhi i kabedo acel?

⁷ Olo pa dhano je obedo ri iye, kucel awanya kiyeŋ.

⁸ Ŋatariek loyo jamiŋo g'aŋo? Aka jacandi nitie g'aŋo, go m'oŋeyo nger ma kwo ruwaŋ jomakwo?

⁹ Ber swa gima waŋ neno loyo awanya ma waya; me bende obedo pilok gi riemo koyo.

¹⁰ Gim'otieko bedo, otiek cwoko nyinge, aka oŋeyere gima dhano obedo, aka ni go kinyal piem gi ŋata jameni loyo go.

¹¹ Wac kweth, bedo pilok kweth, onyo ober ri dhano nedi?

¹² Rupiri ŋa m'oŋeyo gimaber ri dhano i kwo i hongo pere ma kwo ma pilok, ma dhano luw'iye paka tipo? Kole ŋa manyalo waco ri dhano gim'obedi ka go otieko ngoye i pendi waŋceŋ?