Isaya 7 - KITAWO MALEŊ

Mikwenda ri Kere Ahaz

¹ I hongo pa Ahaz wod Yotham aka nyakwar Uziya kere ma Yuda, Rezin kere ma Siria gi Peka wod pa Remalia, kere ma Isiraili, jomonjo Yerusalem, to jok'onyalo kikengila.

² Munyo okow ri ker ma Yuda ni Siria oyido jonitie i riwirok gi Isiraili, cuny go gi ji pere opodho aka jokirin paka yen ma yengere ro kudho pa koyo.

³ Kenyo Rwoth owaco ri Isaya ni, “Kadhi gi wodin Sear Yasub aka irom gi Kere Ahaz. Ilanwaŋo go i royo kama jokwoc nangin jotiy'iye, i gike ma fereji ma kelo pi wok i kidiwa ma malo kidho i kisawe pa jalwok nangin.

⁴ Waci rigo wogwokere, wobedi liŋ, aka wokiri wobwoki kosa cunye wopodhi ro kasik mac ario ma duny yiro me, i nge pa Kere Rezin gi Siria gi wod Remalia.

⁵ Kwoŋbedo Siria kanyacel gi wod pa Remalia jotimo can marac kwoŋin, ka jowaco ni:

⁶ ‘Weyi wakidhi wakedhi Yuda, wabwok to wakengila wobedi amawan, aka ŋey wokethi wod pa Tabel bedo kere mere.’ ”

⁷ Riameno Rwoth Were waco ama: Kilacungo, aka kilatundo i kare.

⁸ Kole wic Siria obedo Damasiko, aka wic Damasiko obedo Rezin. (I oro piero aucel g'abic Isiraili (Ker ma Yumalo) latur mathindho thindho ŋey wongoye gi ji.)

⁹ Wic Isiraili obedo Samaria, aka wic Samaria obedo wod pa Remalia. K'ikicungo matek i yeyo, ik'ocungi kada mathin.

Ranyuth pa Manwer

¹⁰ Rwoth oluda luwo gi Ahaz ka waco ni,

¹¹ “Kway Rwoth Were perin womiyin ranyuth. Weyi wobedi maluth paka piny pa jom'otho kosa mabor paka polo.”

¹² Ahaz odwoko ni, “Akilakwayo, aka akilatemo Rwoth.”

¹³ Kenyo Isaya owaco ni, “Onyo winji, Awi ker pa Daudi. Obedo gimathin swa riwin joko ji; ma wijoko Were paran bende?

¹⁴ Riameno Rwoth won gipi lamiyo win ranyuth. Neni, nyako mambula lagamo iye to nywolo wode aka ilacwoko nyinge ni Manwer.

¹⁵ Go lamadho cak to camo mo kic cuka tundo i hongo ma go oŋey'iye kwero raco kodi yero bero.

¹⁶ Kole kafodi jayac k'oŋeyo kwero raco gi yero bero, lowo no ma wilworo kerin pajo ario ilajwango woko.”

¹⁷ “Rwoth kidho kelo kwoŋ win, ji mewin, gi kwoŋ ot pa kwarere mewin ndelo mafodi k'otundo wok cuka ker ma Isiraili tiakere woko kwoŋ Yuda, go lakelo kere ma Asiria.”

¹⁸ “I ndelo no, Rwoth lalwiyo ri ji ma Misir ma jocale lwaŋino manitie i waŋ pi ma Misir, gi ri ji ma Asiria ma jocale kic.

¹⁹ Jolabino to jogeto i milelo gi ŋungu tele, i wi kudhin je, kodi i wi lum je.”

²⁰ “I ndelo no, Rwoth lalielo gi kamweso m'opangisa yu kalo Malawa, kere ma Asiria, ye wi jo gi yer ma tiendi jo, aka bende lawaro woko ye tik jo.”

²¹ I ndelo no, nyatoro lakuro dhiaŋ ma roya gi rombo ario,

²² aka rupiri jolacwero cak i dito, go lamadho cak, kole jono ma jodoŋ i piny, jolamadho cak gi mo kic.

²³ “I ndelo no, ndelo vini m'oyido nitie yen vini gana acel, ma welo mere feza gana acel, lalokere okure gi kudhin.

²⁴ Dhano moro je lakidho kenyo dwar g'atum abor kodi aserin. Ey, lowo gipi lapoŋ, kudhin gi dudi.

²⁵ Tendere je m'oyido ifur'iye cemo lakisika gi kudhin m'ongoye ŋata lanyalo kidho kenyo. Ladoŋ nyaka kakwath pa dhok gi kama rombo nyono.”