Isaya 56 - KITAWO MALEŊ

Nonin je jolabedo ji pa Were

¹ Me apaka Rwoth waco: Kur win tiro, aka witim gim'otire, kole both paran cegin bino, aka gony paran lanyuthere.

² Jasilwany a ŋata timo gime, ŋata mako matek swa, ŋata kuro sabato, ma kikoc, aka cinge kitim reco moro je.

³ Jopath ma jolaman jokiri jowowaci ni, “Rwoth kilayeyan lamo go kanyacel gi ji pere.” Jacwo ma lur wokiri wowaci ni, “Neni, abedo yath m'othwo.”

⁴ Kole me apaka Rwoth waco ama: Ri cwo ma lur, ma jokuro Sabato paran, ma joyero gigipiny ma sangala an, aka jokuro cikirok paran,

⁵ alamiyo wopoy nyingi jo i ot paran, gi i dier ji paran, loyo k'oyido jonitie gi nyithindho mayac gi manyir. Alamiyo nyingi jo wopoy kicutho, ma kilarere woko.

⁶ Jopath ma joriwere bongi Rwoth, tic rigo, maro nyingi Rwoth, gi bedo ŋecin pere, moro je m'okur sabato, aka kikoc, to kuro cikirok paran;

⁷ Alakelo jo wi got paran maleŋ, t'amiyo jo kisangala i ot paran ma kwayo. Alajolo mic awaŋa pajo gi cowirok pajo i wi migam paran. Kole ot paran ilalwoŋo ni ot ma kwayo ri ji je.

⁸ Me apaka Rwoth Were waco ama: Go ma coko kanyacel Joisiraili ma jonitie woko. Alamedo coko joman rijo, medo kwoŋ jono m'atieko coko.

Were lamiyo jotel pa Joisiraili gir'acula

⁹ Kisi ogwaŋ madudi, biye winyul, win kisi ogwaŋ ma lul!

¹⁰ Jokur pa Isiraili waŋin otho joje jongoye gi ŋeyo; joje jobedo gwokere m'obadha, ma jokinyal gwe, jomaro swa rierok piny gi lek, jomaro swa nur.

¹¹ Gwokere jothoth gi woro, to jokinwaŋ gima romo jo. Jokwath bende jokiniaŋ, joje jowire i yo pajo wegi, kisi acel i magowa pere won, acel aka joje.

¹² Jowaco ni, “Biye, weyi wanwaŋ vini, weyi wamadhi math matek ma romo wan, dikin lacale konon, madit ma kiwacere.”