Biblia Todo Logo
Bìoball air-loidhne

- Sanasan -

Isaya 50 - KITAWO MALEŊ

1 Me apaka Rwoth waco, Wiparo ni ariemo woko ji paran, paka jacwo ma riemo woko cege? Nikune, ere papila ma turo nywomirok? Wiparo ni atana win i twec, paka jacwo tana nyithindho pere paka ŋecin? Neni, wikadho bedo i twec ro reco mewin; aka ro kibenga mewin oriem min win.

2 Raŋo munyo abino akinwaŋo dhano? Raŋo munyo alwoŋo, ongoye ŋat'odwoko? Cingan cek ma kinyal botho? Kosa angoye gi meni ma botho? Gi or paran athwo woko nam, aloko malawin opalipat; rec pajo joŋwe ro ngoye pa pi, aka jotho ro riyo.

3 Anyalo loko polo macol, t'aloko kutiya paka gium pajo.


Litho gi both pa ŋeca pa Were

4 Rwoth otieko miyan, lew joma jofonjere, ŋey anyal ŋeyo nger ma miyo meni, ri ji ma jolacere. Kisi odikin go cewan, cewo ithan, winjo paka ji ma jofonjere.

5 Rwoth otieko yawo ithan, aka akigwenyere, akigiki acen.

6 Amiyo ŋeyan ri jono ma jogoyan, gi pindan ri jono ma jojwaco ye tikan, akipano waŋan, munyo joyetan to joŋulo kwoŋan law.

7 Rwoth Were konyan, riameno wickwot k'omakan, aketho waŋan paka cuk mac ma cot, aka aŋeyo ni wickwot k'omakan.

8 Kole Were nitie cegin aka lawaco ni abu banja. Nitie ŋata nyalo temo kelo banja kwoŋan? Weyi wakadhi i kapido kanyacel! Ŋa m'obedo jakwor paran? Weyi go wocore cegin kodan.

9 Ere neni, Rwoth Were ama konyan. Neni, joje jolati paka nanga, masirigi lacamo jo woko.

10 Ŋa kwoŋ win ma lworo Rwoth, aka winjo dwondi ŋeca pere, ma wotho i mudho, aka ongoye gi lero, kucel ketho geno i nyingi Rwoth, aka goŋere kwoŋ Were?

11 Ere neni, wijoje ma wimoko mac, to wiketho kasik mac. Woth win i lero ma mac mewin, gi kasik mac ma witieko moko! Me a gima wilanwaŋo wok i cingan, wilanindo piny i litho.

Dhopadhola DC Bible © Bible Society of Uganda, 2018.

Bible Society of Uganda
Lean sinn:



Sanasan