Isaya 39 - KITAWO MALEŊ

Jomikwenda wok i Babilon

¹ I hongo no kere ma Babilon Merodak Baladan wod pa Baladan owinjo ni kere Hezekia oyido two, ameno ooro jomikwenda gi balwa gi mic.

² Hezekia ojolo jo aka onyutho jo lim pere, feza pere gi zahabu, gigipiny maŋwe kur, gi gilweny pere. Hezekia onyutho jo lim ma ker pere je.

³ Kenyo jatuci wac Were Isaya obino bongi Hezekia to penjo go ni, “Cwo me jowok kune aka jowaco rin aŋo?” Hezekia odwoko ni, “Jowok i piny mabor swa Babilon.”

⁴ Isaya openjo Hezekia ni, “Aŋo ma joneno i muluwir?” Hezekia odwoko ni, “Joneno gigipiny je. Anyutho jo gigipiny je.”

⁵ Kenyo Isaya owaco ri Hezekia ni, “Winji wac pa Rwoth pa lwak jolweny:

⁶ ‘Neni, ndelo bino ma gigipiny je ma muluwir perin, gigipiny je ma kwarere perin jokano tundo konon, ibino tiŋo woter i Babilon. Ongoye gima bino doŋ.

⁷ Aka megi kwoŋ wotin won, m'inywolo ibino tero jo bedo cwo ma lur i muluwir pa kere ma Babilon.’”

⁸ Gikenyo to Hezekia waco ri Isaya ni, “Wac pa Rwoth m'itieko waco ber.” Kole go oyido oparo ni, “Siem gi kwe pa piny labedo i hongo pere.”