Isaya 37 - KITAWO MALEŊ

Kere kwayo rieko pa Isaya

¹ Munyo kere Hezekia owinjo radwok pajo, oyeco nangin pere i rem to ruko kutiya, aka okidho i Ot pa Rwoth.

² Ooro Eliakim m'oyido obedo jadwoŋ ma muluwir, Sebina jandiko ma kapido, gi jatuci wac Were m'otegino, to joruko kutiya, bongi Isaya wod pa Amoz.

³ Me a mikwenda m'omiyo jowaco ri Isaya ni, “Konon obedo ndelo ma kidamba, imiyo wan gir'acula aka wanitie i wickwot. Wacal dhako m'oyikere nywol, to meni loyo ma colo nyathi.

⁴ Kere ma Asiria ooro jadhum pere madwoŋ yeto Were makwo. Weyi Rwoth Were perin wowinji yet me, aka womiy joma joluwo gir'acula. Riameno kway ri ji mawan ma jodoŋ.”

⁵ Munyo ŋecin pa kere Hezekia jobino bongi Isaya, Isaya owaco rijo ni,

⁶ “Waci win ri jadwoŋ mewin ni, ‘Me apaka Rwoth waco. Ikir'ibwoki ro atise ma ŋecin pa kere jowaco rin ni Rwoth kinyal bothin.

⁷ Neni, alaketho cuny i go, ŋey go wowinji pokopoko ma bino miyo go gik i piny pere won; aka alamiyo go wotho g'abor i piny pere won.’”

Joasiria jodhiro atise man kendo

⁸ Rabisake to dok, aka onwaŋo ni kere ma Asiria oyido lwenyo gi tindi madwoŋ Libina, rupiri oyido otieko winjo ni kere oyido otieko ay Lakis.

⁹ Aka munyo kere ma Asiria owinjo ni kere Tirihaka ma Ethopiya oyido bino monjo jo, odhiro balwa ri kere Hezekia ma Yuda ni,

¹⁰ “Me a gim'ila waco ri kere Hezekia ma Yuda. Ikir'iyey Were perin m'igeno wowondin ka cikin ni k'okethi Yerusalem i cingi kere ma Asiria.

¹¹ Neni, itieko winjo gima kere ma Asiria otimo ri piny je m'oreyo jo kicutho. Iparo ni inokwale?

¹² Nitie ye werin ma piny mogo m'otieko botho jo, piny ma kwarere paran joreyo woko, paka Gozan, Haran, Rezef, gi ji ma Eden m'oyido jonitie Telesar?

¹³ Kerin ma tindin madongo Hamath, Aripad, Sefarivayim, Hena, gi Iva jonikune?”

Kwayo pa Hezekia

¹⁴ Kere Hezekia ojolo balwa wok i cingi jomikwenda to soma. Kenyo okidho i Ot pa Rwoth to ketho balwa no ruwaŋ Rwoth,

¹⁵ aka okwayo ni,

¹⁶ “Awi Rwoth pa lwak jolweny, Were pa Isiraili m'obedo i wi cwec ma jobwombi gin, in kende a Were, ma dhumo kerin je ma i piny. Icweyo polo gi piny.

¹⁷ Onyo Rwoth, winji wan aka neni gima timere riwan. Cik ithin iwinji gima Senakerib waco je ma yetin, Were makwo.

¹⁸ Adieri Rwoth, kerin ma Asiria jotieko reyo piny kweth, to josika woko lowo pajo,

¹⁹ jowaŋo woko werin pajo m'oyido jok'obedo werin kada to cal ma yen gi telin ma ji ama joyiko gi cingi jo, riameno orey woko jo.

²⁰ Riameno Rwoth Were mawan, akwayin, both wan kwoŋ Joasiria, ŋey nonin je ma piny jowoŋey ni in kende a Rwoth.”

Mikwenda pa Isaya ri Kere

²¹ Kenyo Isaya wod pa Amoz odhiro mikwenda ri kere Hezekia ni, Rwoth, Were pa Isiraili waco. Rupiri itieko kwayo t'awinjo kwayo perin ma mako kwoŋ Senakerib kere ma Asiria.

²² Me wac ma Rwoth otieko luwo ma mako kwoŋ Senakerib. Ji ma Yerusalem jocayin aka jotimo ginyero kodin. Jonyero yu dieŋeyin, nyar Yerusalem.

²³ Senakerib, ikwoŋan, ikoko ran, t'ipeko waŋin kwoŋan, kwoŋ Were pa Isiraili madwoŋ loyo!

²⁴ Iweyo jodhum perin joyetan, Rwoth. Aka me a gim'iwaco. Atelo cawilin paran kweth, tundo i ŋawirok ma gote ma Lebanon. Aluthere i lul mere, aka aŋolo piny yen sida mere maber loyo gi yen madongo maboyo ma jo boke kweth.

²⁵ Akunyo jwombe t'amadho pi, t'acwiyo woko jwombe ma mol je ma Misir g'ofuny tiendan wok i jwombe ma an won akunyo.

²⁶ Fodi oyido ikiwinjo ni acano gime con? Acano wok i hongo macene, gim'onyo amiyo wotundi i kare, ni winyal timo tindin madongo m'otinda, woŋinyere i wic gundin,

²⁷ kucel ji pajo jolacere, jobedo gi nyawin madwoŋ. Jocale mawuwa madudi, kosa lum mayom, paka lum madongo i wi ot, to jothwo mafodi jok'otegino.

²⁸ T'aŋeyo gima mako kwoŋin je, kiri gi nger m'imako nge swa kodan.

²⁹ Kwoŋbedo inigi keme kodan, aka nge perin madit otieko tundo i ithan, onyo abino ketho siraget i umin, gi nyweny paran ma lekin i dhokin, to nyaka adwokin, kam'iwok'iye.

³⁰ Kenyo Isaya owaco ri kere Hezekia ni, “Me ranyuth ma gima kidho timere. Oro me gi oro ma luwo ibino bedo gi ŋano madudi acama, to i oro mar'adek ibino nyalo cwoyo ŋano t'ikeco, aka ibino pidho yen vini t'icamo olemo mere.

³¹ Aka ji ma joboth i Yuda jobino pidhirok pa yen ma jorwako fuc piny i lowo aka jonyak ranyak.

³² Kole bino bedo ji ma jobino both i Yerusalem gi Got Zayon kwoŋbedo Rwoth omiyere miyo gime timirok.”

³³ Riameno me a gima Rwoth owaco kwoŋ kere ma Asiria. Go kiladonjo i tindi madwoŋ me kosa celo asere kad'acel kwoŋe. Ongoye jolweny ma jonigi kwote ma jobino core cegin gi tindi madwoŋ, aka jok'othoki mako.

³⁴ Go bino gik gi royo acel m'obino gine, ma k'odonjo i tindi madwoŋ me. An Rwoth, atieko waco.

³⁵ Kole abino kikwonga tindi madwoŋ me t'abotho, ro an won gi cikirok m'atimo ri ŋeca paran Daudi.

³⁶ Aka wor no won malaika pa Rwoth okidho i kambi pa Joasiria to neko jolweny 185,000 aka munyo ji jocewi odikin joneno mulambin.

³⁷ Kenyo Senakerib kere ma Asiria owire to gik Ninivi.

³⁸ Ndelo acel munyo go oyido lamo i ot pa were pere Nisrok, wote ario, Adramelek kodi Sareza joneko go g'abor pajo to joringo i piny Ararat. Aka wode man Esarhadon olunjo go paka kere.