Isaya 35 - KITAWO MALEŊ

Dwoŋ pa Rwoth

¹ Thim gi lowo m'othwo jolakisangala, thim lafore to jolikalika; paka mawuwa.

² Thim lawero to koko ri kisangala, labedo maŋon paka gote ma Lebanon; ma nyak cemo paka ndelin ma Kamel gi Saron. Kisi dhano laneno dwoŋ pa Rwoth, gi meni pa Were mawan.

³ Loki matek cingi joma nyap, aka loki m'ocwiny congi jo m'oregeya.

⁴ Waci ri jono ma cuny jo lwor ni, “Bedi win jomeni, wikiri wilwor! Were mewin ee, go bino botho win, go bino miyo jokwor mewin gir'acula.”

⁵ Joma waŋ jo otho waŋ jolayawere, aka joma ithi jo otho jolawinjo.

⁶ Jor'aŋolo jolapor to jomielo aka obadhin jolakoko ri kisangala. Waŋ pi lamol i opalipat;

⁷ kwoyo malieth lalokere kidiwa, aka lowo m'othwo lapoŋ gi pi. Kama ogwaŋe madudi cango jobed'iye lalokere samba, lum lalokere midole g'osege.

⁸ Royo labedo kenyo, aka ilalwoŋo ni Royo Maleŋ. Ongoye jareco ma laluw'iye, jomamiŋ jok'orweny'iye dhano.

⁹ Simbwor kilabedo kenyo, kosa ogwaŋ mager kilaluwo royo no jok'onwaŋere kenyo, to joma Rwoth otieko botho, ama jolawoth kenyo.

¹⁰ Aka jono ma Rwoth otieko botho joladok, to jobino i Zayon gi wer, kisangala ma cil gi cil labedo i wi jo; jolanwaŋo siem gi kisangala, kumo gi rem larumo woko.