Isaya 32 - KITAWO MALEŊ

Kere ma genere

¹ Neni, kere ma timo gim'otire ladhumo, jodhum ma jotimo tiro joladhumo.

² Kisi acel kwoŋ jolabedo paka kapondo kwoŋ koyo, gi kabwok kwoŋ asur, paka waŋ pi kam'othwo, paka tipo tele madwoŋ i piny m'oloc.

³ Kenyo waŋ jono ma joneno kilatho, aka ithi jono ma jowinjo lacikere.

⁴ Cuny joma kwako niaŋ laŋeyo, aka lew joma dhombo wac lakwako luwo maber.

⁵ Jamiŋo kilamiyo wor kendo, aka ŋata bukony kilamiyo wor.

⁶ Kole jamiŋo joluwo miŋo, timo kidakana i cunye; timo gima bu Were, luwo twodo kwoŋ Rwoth, weyo kec neko ji, aka thwono joma riyo neko gir'amadha.

⁷ Gilweny pa ŋata bukony obedo ma kidakana, go timo atoŋa pere marac, reyo woko ji ma jonitie i litho, makada nende ŋata bu gimoro luw gim'otire.

⁸ To dhano m'iworo cano tim ma wor, aka cungo i gim'otire.

Thumo banja gi dwoko

⁹ Ay win malo, win mon ma wibedo i kwo mayom, winji win dwondan, win ma wiwegi wicowere, ciki ithi win ri luwo paran.

¹⁰ I ndelo ma kirom oro, wilakirin, win mon ma wibedo i kwo mayot; wikilakeco vini.

¹¹ Kirin win, win mon ma wibedo i kwo mayot, win ma wiwegi wicowere, lunyere win kinyoro, aka tweyi win kutiya i pier win.

¹² Goy win thundho mewin, ri ndelo mabeyo gi ndelin vini.

¹³ I lowo pa ji paran, kudhin g'okure ladong'iye; i wi udi ma kisangala je, kodi i wi tindi madwoŋ m'opoŋ'iye kisangala.

¹⁴ Kole ilajwango muluwir, tindi madwoŋ ladoŋ nono, tendere kodi kakur lalokere od simbwor kicutho, kisangala pa punde madudi, gi ka cemo pa mwendi.

¹⁵ Tunado kama okonji kwoŋ wan cuny wok malo, to thim lokere ndelo olemo, aka ndelo olemo lalokere lul.

Siem ma dhum pa Were

¹⁶ Kenyo tiro labedo i thim, aka timo gim'otire ladoŋ i ndelo olemo.

¹⁷ Timo gim'otire lakelo siem, lawok kudirok gi kwe piny cil gi cil.

¹⁸ Ji paran jolabedo i pecin ma siem, kam'okwe kodi i kabedo m'oliŋ.

¹⁹ Lul gi tindi madwoŋ, jolapodho kicutho.

²⁰ Josilwany a win ma wicwoyo i thengi pi, ma wigonyo tiendi dhiaŋ gi punde mewin.