Isaya 29 - KITAWO MALEŊ

Thoko Yerusalem

¹ Kidamba ri Ariel, kidamba ri Ariel! Tindi madwoŋ kama Daudi oketh'iye kambi, oro gi oro timo kalima thoko.

² Kucel alamiyin Ariel litho, aka labedo ywak gi kiuja, go labedo ran paka Ariel.

³ Alaketho kambi thokin, alathokin makin, alageto acurcur ma thokin.

⁴ Kenyo ilaluwo wok i lutho ma piny, wok i milelo i fukefuke wac perin lawok; dwondin lawinjere wok i piny paka dwondi jwogi, aka luwo perin lalwiyo wok i fukefuke.

⁵ To lwak jokwor perin jolacale paka fukefuke mathindho thindho, lwak jogero jolakadho, abwap ma k'oniaŋere.

⁶ Rwoth pa lwak jolweny lawendo rin, gi mwoc koth kodi yengirok pa piny kodi woy madwoŋ, g'asur kodi mac ma reyo woko.

⁷ Kenyo lwak piny je ma jolwenyo gi Ariel, ma jolwenyo gi go kodi kapondo pere, aka jomiyo go litho, jolarwenyo paka lek, kosa paro ma wor.

⁸ Paka ŋata kec neko leko ni cemo, to cew munyo kec fodi neko, kosa ŋata riyo neko leko ni madho gir'amadha, to cew m'ongoye meni, ma fodi riyo neko, ameno apaka lwak piny je, ma jolwenyo gi got Zayon jolabedo.

Waŋtho gi rendirok i Isiraili

⁹ Miŋere win aka bedi win mamiŋ, rwenyi win aka weyi waŋ win wotho! Mer win, to ki gi vini; tangatanga win, to ki gi medho matek!

¹⁰ Kole Rwoth okonjo kwoŋ win cuny ma nindo, go oumo waŋ win, jotuci wac Were, to umo wiy win, win ma wineno gima latimere yuwiye.

¹¹ Menyirok mere je ocale riwin wac m'omwon i kitawo. K'omiy ŋat'oŋeyo ndiko t'iwaco ni “Mondo soma gime.” Go ladwoko ni, “Akinyali kisoma, kole omwon.”

¹² To k'omiy ŋat'okuya ndiko t'iwaco ni, “Mondo soma gime.” Go lawaco ni, “Akinyali ndiko.”

¹³ Rwoth owaco ni: “Kwoŋbedo ji me jocore cegin adhok, joworan gi wac nono, kucel cuny jo nibor kodan, aka lworo pajo ran obedo or pa ji ma jopoyo.

¹⁴ Riameno, neni, atimo kendo gi dhier gi ji me, gigipiny ma miyo jo bwok aka gidhier. Rieko pa jorieko pajo larere, aka niaŋ pa joma niaŋ lapanere.”

¹⁵ Kidamba riwin ma witemo pano can mewin kwoŋ Rwoth, ma tim pajo nitie i mudho, ma jowaco ni, “Ŋa ma neno wan? Ŋa m'oŋeyo wan?”

¹⁶ Wiwiro gigipiny nyatarotaro, jacwec dak orom gi dak? Cwec bende owaci ri jacwec mere ni, iŋat'ikicweyan? Kosa gim'oŋin bende waco ri ŋat'oŋino ni, ongoye gi niaŋ?

¹⁷ K'odoŋ hongo macek ama, to lul ma Lebanon lokere ndelo olemo, aka ndelo olemo lalokere lul?

¹⁸ I ndelo no joma ithi jo otho jolawinjo, wac ma kitawo, aka joma waŋ jo otho m'oyido jobedo i mudho, waŋ jo layawere to joneno.

¹⁹ Jomamwol jolanwaŋo kisangala i Rwoth, aka jocandi jolafore i Ŋataleŋ pa Isiraili.

²⁰ Kole jogero gi jodhaw jolarwenyo kicutho; aka ilareyo woko jono je ma jokuro timo reco,

²¹ ma jothumo banja ri dhano gi wac, jociko bwo ri jathum banja i waŋkac, aka jowire githenge ŋata timo gim'otire m'ongoye atoŋa.

²² Riameno, Rwoth, m'obotho Abraham waco ama kwoŋ ot pa Yakobo: Yakobo kilabedo i wickwot kendo, waŋe kilataro kendo.

²³ Kole ka go onen nyithindho pere, tic ma cingan i dier go, jolatero nyingan maleŋ; jolamiyo Ŋataleŋ pa Yakobo dwoŋ, aka jolalworo Were pa Isiraili.

²⁴ Aka jono je ma jotimo gi komo i cuny jolaniaŋ, jono je ma joŋunyaŋunya, jolayeyo fonji.