Isaya 25 - KITAWO MALEŊ

Kwayo ma foyo Were

¹ Awi Rwoth, ibedo Were paran, alatiŋin malo, alapako nyingin; kole itieko timo gigipiny ma gir'aura, can m'itimo cene, mar'adieri aka m'otire.

² Kole itieko loko tindi madwoŋ kidhur, tindi madwoŋ m'otinda iloko gunda, muluwir pa jopath k'obedi tindi madwoŋ kendo, kilageto kendo.

³ Riameno ji matek jolamiyin dwoŋ; tindin madongo pa piny mager jolalworin.

⁴ Kole itieko bedo kapondo ri jocandi, kapondo ri ŋata bu gimoro i teko pere, kabwok kwoŋ koth gi tipo kwoŋ lietho; ka derino pa jomaker cal asur ma cwir.

⁵ Paka lietho kam'othwo. Ikweyo koko pa jokwor mawan, paka pondeponde kweyo ndelo malieth, imiyo wer pa jomaker liŋ.

Were yiko kalima

⁶ Rwoth pa lwak jolweny latimo kalima ri nonin je wi got me, kalima ma cemo maleny, kalima ma vini ma loŋo, cemo maleny m'opoŋ'iye more, vini ma loŋo, m'okenera.

⁷ Rwoth lareyo woko wi got me, gium m'obol i wi nonin, kitambala m'oyar i wi nonin.

⁸ Go lamwonyo woko tho kicutho, aka Rwoth Were layweyo woko pigi waŋ ji, to kwanyo woko wickwot pa ji pere wok i piny; kole Rwoth otieko luwo.

⁹ Ilawaco i ndelo no ni, “Neni, me Were mawan, watieko kuro go ŋey wobothi wan. Me Rwoth ma watieko kuro; weyi wasangala aka wafore i both pere.”

Were lamiyo Mowab gir'acula

¹⁰ Kole cingi Rwoth lakikwonga Got Zayon, aka lanyono piny Mowab i kabedo pere, paka inyono piny cuŋ i bur woyo.

¹¹ Makada nende go oyar cinge paka jobuk pi joyaro cingi gin buko pi; Rwoth lamwolo noro pere kanyacel gi rieko ma cinge.

¹² Kor ot pere ilaguro piny, t'ibolo woko piny i fukefuke.