Isaya 24 - KITAWO MALEŊ

Rwoth lamiyo piny gir'acula

¹ Onyo Rwoth cegin nyeko piny to weyo nono, aka lawiyo cal mere to kedho woko ji ma jobed'iye.

² Aka labedo, paka gi ji, ameno gi jocway ri Were i wi migam; paka ri ŋeca, apaka ri jadwoŋ pere, paka ri ŋeca madhako, apaka ri dhakodwoŋ pere, paka ri jamitan, apaka ri janyew, paka ri ŋata kopa, apaka ri ŋat'okopa go, paka ri ŋata banja, apaka ri ŋat'ibanja.

³ Piny ladoŋ m'othangere aka gunda, kole Rwoth otieko luwo wac me.

⁴ Piny othwo to ner, piny gibe nyapere aka ner, polo nyapere kanyacel gi piny.

⁵ Piny oduwere, i cingi ji ma jobed'iye, joturo cik, jok'oluwo fonji, joturo cikirok m'oyido ripo bedo cil gi cil.

⁶ Riameno lam oreyo woko piny, aka ji mere jocandere ro reco pajo, ji ma jobedo i piny jowaŋ, aka odoŋ ji manok.

⁷ Vini manyen othwo woko, vini nyekere, kisi ŋat'oyido sangala onyo hamo.

⁸ Dwondi sasi ma kisangala oliŋ, koko ma kisangala orumo, dwondi tongol ma kisangala oliŋ.

⁹ Jokiwer ka jomadho vini pajo, aka vini kec ri jomedho.

¹⁰ Tindi madwoŋ ma nywowirok otur piny, aka udi ocegi m'ongoye ŋata nyalo donjo.

¹¹ Ywak winjere i royo ro ngoye pa vini kisangala ongoye kendo, forok orwenyo woko i piny.

¹² Osika woko tindi madwoŋ, aka waŋkace mere otur piny.

¹³ Ameno apaka labedo i dier piny, kodi i dier nonin, paka ijwero yen oliv kosa ndelo vini, to doŋ nono k'ifono nyingi vini.

¹⁴ Ji jotiŋo dwondi gin malo aka jowero ri kisangala, jokoko malo ri dwoŋ pa Rwoth yupodho ceŋ.

¹⁵ Riameno ji ma yuwok ceŋ miy win Rwoth dwoŋ, ji ma jobedo i thengi nam, pak win nyingi Rwoth, Were pa Isiraili.

¹⁶ Wok i gike ma piny wawinjo wer ma pak, madwoŋ ri Ŋat'otire. T'awaco ni, arumo woko, arumo woko, kidamba ran! Kole jor'akaka jotimo akaka, jor'akaka jotimo akaka swa.

¹⁷ Teko, bur, gi bwo kuro win, awi ji ma jobedo i piny!

¹⁸ Ŋat'oringi derino ma teko, lapodho i bur, aka ŋat'owok i bur, lamoko i bwo. Kole dirisin ma polo oyawere, aka kindi piny kirin.

¹⁹ Piny otur kicutho adieri, piny obare to pokere mathindho thindho adieri, piny oyengere swa adieri.

²⁰ Piny tangatanga paka jamero, yengere paka simba, reco mere pek kwoŋe, aka podho ma koay malo kendo.

²¹ I ndelo no Rwoth lamiyo gir'acula, lwak ma polo, i polo, gi kerin ma piny, i piny.

²² Ilacoko jo kanyacel, paka jotwec i bur, ilacego jo i katwec, aka rumacen ma ndelo kweth ilamiyo jo gir'acula.

²³ Kenyo dwe lalokere macol, aka ceŋ k'oliel kendo, kole Rwoth pa lwak jolweny ladhumo, wi Got Zayon kodi i Yerusalem, aka go lanyutho dwoŋ pere ruwaŋ jotel pa ji pere.