Isaya 20 - KITAWO MALEŊ

Ranyuth ma jatuci wac Were ma jakinyoro

¹ I oro ma jamituka, ma Kere Sargon ma Asiria ooro, obino monjo Asdod tindi madwoŋ ma Filistia,

² i hongo no Rwoth oluwo gi Isaya wod Amoz, ka waco ni, “Kadhi, aka iluny woko kutiya gi war perin wok i tiendin.” Isaya otimo ameno aka owotho kinyoro gi par tiende.

³ Rwoth owaco ni, “Paka ŋeca paran Isaya otieko woth kinyoro aka gi par tiende ma oro adek, me ranyuth ma gima latimere ri Misir gi Ethopiya.

⁴ Ameno apaka kere ma Asiria latero kinyoro jotwec ma go omaki wok i Misir gi Ethopiya, mathindho gi madongo, jolawoth kinyoro gi par tiendi gin, ma jok'oumo madeko gin, kelo wickwot kwoŋ Misir.

⁵ Jono ma joketho geno pajo i Ethopiya gi Misir paka ka yumirok pajo, jolanywowere to jongoye gi geno.

⁶ I ndelo no, ji ma jobedo i thengi nam ma Filistia jolawaco ni, ‘Neni, me a gim'otimere ri jono m'oyido wageno aka waparo ni jolabotho wan kwoŋ kere ma Asiria! To onyo wan, walaboth nedi?’”