Isaya 18 - KITAWO MALEŊ

Were lamiyo Ethopiya gir'acula

¹ Kidamba ri lowo ma bwombi gigipiny papin iye, manitie bor kalo malawin ma Ethopiya;

² ma jodhiro jomikwenda gi malawa Nayil, iy'atewe ma toko wi pi! Kadhi win, jomikwenda ma joyilyil, i piny ma ji mere joboyo aka jofoth, bongi ji m'ilworo cegin gi bor, piny matek aka kengila piny megi, piny ma malawin poko lowo mere.

³ Awi, ji je ma piny gibe, win ma wibedo i piny, k'otiŋ malo ranyuth wi gote, neni win! K'okudhi gwara, winji!

⁴ Kole Rwoth owaco ran ni, “Alaŋiyo liŋ gi kabedo paran, paka ceŋ liel i lietho m'odieceŋ, paka pondeponde ma thoyo i lietho ma keco.”

⁵ Kole mafodi keco, ka thiwo orumo, aka mawuwa lokere nyingi vini m'ocek, Were lanyaro woko withi jo gi musalauyo ma kikolesa, to jako woko jange je.

⁶ Ilaweyo joje ri winyin ma gote, g'ogwaŋe madudi. Winyin jolacamo i milengela, aka ogwaŋe madudi jolacamo i cwir.

⁷ I hongo no ilakelo mic ri Rwoth pa lwak jolweny, wok bongi ji maboyo aka jofoth, wok bongi ji m'ilworo cegin gi bor, piny matek aka kengila piny megi, piny ma malawa poko lowo mere. Jolabino i Got Zayon, kabedo m'ilam'iye nyingi Rwoth pa lwak jolweny.