Isaya 13 - KITAWO MALEŊ

Rwoth lamiyo Babilon gir'acula

¹ Mikwenda ma teko ma mako kwoŋ Babilon ma Isaya wod Amoz oneno.

² Tiŋi malo bendera ma lweny i wi tendere m'othangere, ywak malo rijo, tiŋi malo cingin rijo jowodonji, i waŋkace pa jodhum.

³ An won gipi atieko wodho or ri ji paran maleŋ, atieko lwoŋo jolweny paran, jowonyuthi nge paran, ji paran m'anor gi jo.

⁴ Winji win koko wi gote, paka koko pa lwak ji! Winji win, derino pa kerin, nonin ma jocokere kanyacel! Rwoth pa lwak jolweny coko jolweny, kadho i lweny.

⁵ Jobino wok i piny mabor, wok i gike ma polo, Rwoth gi gilweny ma nge pere, ma reyo piny gibe.

⁶ Ywak win, kole ndelo pa Rwoth cegin, labino paka rerok wok bongi Jameni je!

⁷ Riameno cingi joje lanyapere, aka cuny dhano je laleny,

⁸ aka jolabwok. Litho madwoŋ lamako jo, jolacale paka dhako ma ŋedi ramo. Jolaŋiyere m'ongoye kony, nyim gin laliel mac.

⁹ Neni, ndelo pa Rwoth bino, mager, gi keme kodi nge ma kelo lworo, loko piny abar, reyo woko joreco wok'iye.

¹⁰ Micalin ma i polo gi muma micalin, jokilamiyo lero; waŋceŋ lalokere macol ka wok, aka dwe kilamenyo lero pere.

¹¹ Alamiyo piny gir'acula ro reco pere, gi jokidakana ro reco pajo; alamwolo noro pa jogero, t'adwoko piny kwoto pa jomaker.

¹² Alamiyo ji bedo manok, aka ji labedo manok loyo zahabu ma Ofir.

¹³ Riameno alamiyo polo kirin, aka piny layengere wok i kabedo pere, i keme pa Rwoth pa lwak jolweny, i ndelo ma nge pere oliel.

¹⁴ Paka amudhe m'idwaro, kosa paka rombo ma jongoye gi ŋat'olek jo, kisi dhano lagik bongi ji pere, aka kisi dhano laringo i piny pere.

¹⁵ Ŋat'onwaŋ je ilacwowo, aka m'omak je ilaneko g'abor.

¹⁶ Nyithindho pajo ilaŋinyo mathindho thindho ruwaŋ jo wegi; udi pajo ilakinyaga t'inindo gi mon pajo.

¹⁷ Neni, amiyo ji ma Medes monjo Jobabilon, ma jongoye gi kony gi feza, aka jokifore i zahabu.

¹⁸ Atum bor pajo lathumo cwo, jo kilamako wor gi nyithindho maŋic, aka jolangoye gi wor ri nyithindho.

¹⁹ Aka Babilon, dwoŋ pa kerin, ŋono gi noro pa Jokaldin, lacale gi Sodom kodi Gomora, munyo Were oreyo woko jo.

²⁰ Kilaget'iye kendo, kosa bed'iye i luse je. Jowarabu jokilagero wema pajo kenyo, jokwath rombo jokilamiyo rombo pajo nindo kenyo.

²¹ To ogwaŋe madudi jolanindo kenyo, udi mere lapoŋ gi cwec ma uja, maya madhako gi diegi madudi jolamielo kenyo.

²² Ondiekere jolaywak iy'acurcur mere kodi ogwaŋe madudi i cel pa kere mere mabeyo, hongo mere ocore cegin, aka ndelo mere kilagalo.