Hoseya 6 - KITAWO MALEŊ

Goyo koko ma ŋuto

¹ “Biye win, weyi wagiki win bongi Rwoth; kole go am'oyeco wan, aka go lacango wan; otieko rwadho wan piny, aka go latweyo riwan wonga.

² Ka ndelo ario orumo, go ladwoko riwan meni; i ndelo mar'adek, go lacerino wan, ŋey wanyal kwo ruwaŋ go.

³ Weyi waŋey, wakethi kinen ma ŋeyo Rwoth; menyirok pere obedo adieri paka ŋamba; go labino riwan paka koth ma cwe nyiknyik, paka koth cwir ma dhieko piny.”

Wictek pa Isiraili kodi Yuda ma kwero ŋuto

⁴ Anotim kodin aŋo, Awi Efrayim? Anotim kodin aŋo, Awi Yuda? Mar mewin cal pondeponde m'odikin, paka thoyo ma ware con.

⁵ Riameno atieko dhiro jotuci wac Were thumo rijo banja ma rerok. Atieko neko jo gi wac ma dhokan, aka thumo banja paran kadho pa lero.

⁶ Kole ayenyo mar makiwire makiweno cowirok, ŋeyo Were makiweno mic awaŋa.

⁷ To paka Adam, joturo cikirok; kenyo jotiyo kodan ma buyeyo.

⁸ Giliad obedo tindi madwoŋ mapa joreco, joduwere gi remo.

⁹ Paka jokwo jotimo apondi ri nyatoro, ameno bende apaka jocway ri Were i wi migam jomakere kanyacel; joneko ji i royo ma kidho Sekem, jotimo banja madwoŋ ma gir'aura.

¹⁰ I ot ma Isiraili atieko neno gima kiwacere, kidakana pa Efrayim nikenyo, Isiraili onyekere.

¹¹ Ri in bende, Awi Yuda, keco otundo, m'aladwok'iye silwany pa ji paran.