Habakuk 3 - KITAWO MALEŊ

Kwayo pa Habakuk

¹ Me kwayo pa Habakuk jatuci wac Were paka Sigionoth ondiko.

² Awi Rwoth, atieko winjo radwok perin, aka lworo omakan, awi Rwoth, kwoŋ tic perin, dwoki i dier oro, weyi imiy woŋeyere i dier oro, i keme mondo poyi timo ŋono.

³ Were obino wok i Teman, Ŋataleŋ wok i Got Paran. Dwoŋ pere umo polo, aka piny opoŋ pak pere.

⁴ Menyin pere ocale lero; menyin ma lero ma wok i cinge, kenyo a kama meni pere opond'iye.

⁵ Two nundu otelo ruwaŋe, aka thoyamo oluwo cegin gi tiende.

⁶ Go cungo to yengo piny; go oŋiyo to miyo nonin kirin. Gote ma cil gi cil jokedhere, tendere ma cil gi cil joriewere piny, yo bedo ma cil gi cil.

⁷ Aneno wemin ma Ethopiya i kumo; nangin ma umo wema ma piny ma Midian jokirin.

⁸ Keme perin oyido liel kwoŋ malawin, awi Rwoth, kosa nge perin kwoŋ malawin, kosa keme perin kwoŋ nam, munyo igweyo kayinin perin, i wi cawilin perin maloyo?

⁹ Iyikere oro gibayo asere perin, iyikere celo aserin perin. Ibaro piny gi malawin perin.

¹⁰ Gote jonenin, to jodwanyere; mikula pi omol; lutho owodho dwonde, aka ŋawirok otiŋo malo cinge.

¹¹ Waŋceŋ kodi dwe jocungo liŋ i kabedo pajo ma malo, i lero mar'asere perin jokadho, i lero ma lithkoth mar'abor perin.

¹² I keme iŋanjo i piny, i nge inyono nonin.

¹³ Iwok botho ji perin, botho jom'owir perin. Iŋidho jatel ma ot pa jokidakana, ireyo woko joma luwo go kicutho.

¹⁴ Icwowo wic jolweny pere g'abore perin, jobino paka asur kedhan, forok pajo cale cuto joma candere i kabedo m'opondo.

¹⁵ Iŋanjo i nam gi kayinin perin, i ulok pa pi madwoŋ.

¹⁶ Awinjo to iyan kirin, dhokan okirin ro derino. Topo donjo i cokin paran, aka kam'akalo okirin i ŋangan. Akuro nyaliŋliŋ cuka ndelo ma teko, bino kwoŋ ji ma jomonjo wan.

¹⁷ Makada nende makuyu kithiw, aka ongoye olemo wi yath vini; makada nende olemo ma yath oliv kibedi, aka ndelin kinyak cemo, makada nende mwendi orey woko wok i sidwol, aka dhok ongoye i cel.

¹⁸ Kucel alafore i Rwoth; alakisangala i Were, jaboth paran.

¹⁹ Rwoth, Were, obedo meni paran; go timo tiendan paka tiendi apol, aka miyan awotho i kabedo paran m'oŋawere.