Habakuk 2 - KITAWO MALEŊ

Rwoth dwoko Habakuk

¹ Alaidho wi kakur paran, t'acungo wi cel paran; alabedo waŋan neno gima Rwoth lawaco ran, kodi aŋo ma go odwoki ri kigeŋisa paran.

² Rwoth odwokan to waco ni: Ndiki piny menyirok; ithangi i telin, ŋey ŋat'osoma woŋweci.

³ Kole menyirok obedo ma hongo m'oyik; to lakwakere i cowe, aka k'obedi twodo. K'ocal pa galo, kur; adieri labino, aka k'ogal.

⁴ Kole janoro, kitim gim'otire, to joma timo gim'otire, jolakwo gi yeyo pajo.

Kidamba ri joma kitim gim'otire

⁵ Vini miyo dhano timo akor, bedo jagero ma kinyal bedo peco. Go ŋamo dwonde malac paka piny pa jom'otho; paka tho, ongoye gima yeŋ go, go otieko coko nonin je rigo won, aka otieko coko ji je rigo won.

⁶ Nonin me je jok'oluwere kwoŋe kicar, gi wer ma yet kodi sikoiyiko, ka jowaco rigo ni, “Kidamba rin in m'idhuro gima k'obedo giperin!” Kiri keraŋo ma inoyim kwoŋin bieto ma banjin?

⁷ Jobanjin perin wegi jok'oay abwap, jono ma joculin magowa, jok'ocew to jomiyin kirin? Nyaka t'ilokere gim'onyaga rijo.

⁸ Rupiri itieko kinyaga nonin kweth, jono je ma jodoŋ jolakinyaga in, ro remo pa ji m'ooy, kodi akaka m'itimo ri piny, ri tindi madwoŋ kodi jono je ma jobed'iye.

⁹ Kidamba ri ŋato ma nwaŋo ŋaŋo iy'akaka ri ot pere, ma geto peco pere kam'okwe, ma botho kwo pere i teko!

¹⁰ Itieko thumo rieko ma wickwot ri ot perin, gi reyo woko ji kweth; aka in won itieko timo reco.

¹¹ Kole tele laywak wok i kor ot, aka akor ot ladwoko go wok i mbawo ma tic.

¹² Kidamba rin m'igeto tindi madwoŋ gi remo, aka itieko nwaŋo tindi i nger m'okom!

¹³ Kiwoki bongi Rwoth pa lwak jolweny, nike nonin jotiyo nyaka ma pidhere gi mac, aka nonin jolacere ri gim'ongoye?

¹⁴ To piny lapoŋ kodi ŋeyo dwoŋ pa Rwoth, paka pi umo nam.

¹⁵ Kidamba ri ŋata miyo joger pere medho, ikonjo woko nge perin, imiyo jo mero, ŋey inyal gawo kinyoro pajo!

¹⁶ Iyeŋ gi cay loyo dwoŋ, medhi, in bende, aka ibedi paka ŋata k'othumere. Kikopo ma cingi Rwoth maracuc, labino thokin, aka wickwot laumo dwoŋ perin!

¹⁷ Kole akaka m'otimi ri Lebanon lamiyin dhier; rerok p'ogwaŋe ladwoko jo, ro remo pa ji m'ooy kodi akaka ri piny, kodi ri tindi madwoŋ kodi jono je ma jobed'iye.

¹⁸ Cal nitie gi kony aŋo, ka jatim otieko payo, cal m'oleny ma fonjo twodo? Kole ŋat'otimo ketho geno pere i gim'otimo, kada ginago obedo cal ma kinyal luwo!

¹⁹ Kidamba ri ŋata waco ri mbawo ni, “Cew!” Gi ri tele m'obadha ni, “Tiŋere malo!” Go lafonjo! Neni, oum gi zahabu gi feza m'oum, aka ongoye luya mogo je i iye kada mathi.

²⁰ To Rwoth nitie i ot pere maleŋ; weyi piny gipi woliŋi ruwaŋ go!