Ezekiel 8 - KITAWO MALEŊ

Menyirok pa Were mar'ario ri Ezekiel Menyirok kwoŋ lamo cal i Yerusalem

¹ K'abic ma dwe mar'aucel, i oro mar'aucel, oyido abedo i ot paran, aka jodongo ma Yuda oyido jobedo ruwaŋan, cingi Rwoth Were ogeyan.

² Atiŋo waŋan malo, aka aneno gima cale dhano, ma wok i piere loro piny obedo mac, aka kadho malo, ocale lero ma gima pilin.

³ Go orieyo woko gima cale cingi jo, otiŋan gi ye wiyan aka cuny otiŋan i dier piny kodi polo i menyirok pa Were ri Yerusalem. Go okethan i dhiot ma waŋkac ma iye ma ŋiyo yumalo, kam'oyido nitie cal ma sigila nyeko pa Rwoth.

⁴ Dwoŋ pa Rwoth Were pa Isiraili oyido nitie kenyo, paka i menyirok m'oyido atieko neno i milelo.

⁵ Kenyo go owaco ran ni, “Wod dhano, tiŋi waŋin malo yu royo ma yumalo.” Ameno atiŋo waŋan yumalo, aka neni, yumalo ma waŋkac ma migam, i dhiot, oyido nitie cal ma sigila nyeko pa Rwoth.

⁶ Go owaco ran ni, “Wod dhano, ineno wok kwoŋ gima jotimo, amien madwoŋ ma ot pa Isiraili ka, ma rieman woko i kabedo paran maleŋ. Wire kendo, aka ilaneno amien madwoŋ loyo.”

⁷ Go okelan i dhiot ma kapido, aŋiyo, aka neni, kombe i kor ot.

⁸ Kenyo go owaco ran ni, “Wod dhano kuny kombe, akunyo, aka neni, dhiot mogo.

⁹ Go owaco ran ni, donji ineni amien ma kidakana ma jotimo kenyo.”

¹⁰ Ameno adonjo t'aneno, aka neni, kisi nger gima lak gi kore kodi ogwaŋ, kodi gimakoc, kodi cal je ma ot pa Isiraili oyido ogor i kor ot thoko iye je.

¹¹ Ruwaŋ jo ocungo jodongo ma Isiraili piero ario, gi Jazania wod pa Safan i dier jo. Kisi dhano oyido otiŋo thago i cinge aka tome pondeponde ma buban oyido duny kadho malo.

¹² Kenyo go owaco ran ni, “Wod dhano, itieko neno gima jodongo ma ot pa Isiraili jotimo i mudho, kisi dhano i kisika ma cal pere m'ogor. Kole jowaco ni Rwoth kinen wan, Rwoth otieko jwango piny.”

¹³ Go owaco ran kendo ni, “Wire aka ilaneno amien madwoŋ swa ma jotimo.”

¹⁴ Go okelan i dhiot ma waŋkac ma yumalo ma Ot pa Rwoth, aka neni, mon oyido jobedo kenyo joywak gi geregere ri Tamuz were moro.

¹⁵ Go owaco ran ni, “Wod dhano itieko neno gime. Wire kendo aka ilaneno amien madwoŋ loyo me gin.”

¹⁶ Go okelan i diedipo ma iye ma Ot pa Rwoth, aka neni, i dhiot ma Ot pa Rwoth, i dier kisika ma cokirok kodi migam, oyido nitie cwo piero ario g'abic. Jowiro dieŋey gin ri Ot pa Rwoth, aka waŋ jo oŋiyo yuwok ceŋ, ka jolamo waŋceŋ.

¹⁷ Kenyo go owaco ran ni, “Wod dhano, obedo gima sew ri ot pa Yuda nike jotieko timo amien ma jotimo ka? Jotieko poŋo i piny akaka, to jokwinyo nge paran, neni, jodienyo um gin.

¹⁸ Riameno alatimo i keme, akilaŋiyo jo gi waŋan ma wor, kosa ak'onyuthi jo wor; aka makada nende joywak i ithan gi dwondi jo malo, akilawinjo.”