Ezekiel 6 - KITAWO MALEŊ

Rwoth kwero lamo cal

¹ Wac pa Rwoth obino ran ka waco ama:

² Wod dhano, kethi waŋin yu gote ma Isiraili aka ituci wac Were kwoŋ jo.

³ Iwaci ni, win gote ma Isiraili, winji win wac pa Rwoth Were. Rwoth Were waco ama ri gote, tendere, fereji kodi milelin. An e, acegin kelo abor kwoŋ win, aka alareyo woko udi ajwoka mewin.

⁴ Migame mewin ilareyo woko, migame ma waŋo buban mewin ilaŋinyo piny; aka alabolo piny jom'onek mewin ruwaŋ calin mewin.

⁵ Alarieyo delkwoŋ Joisiraili ruwaŋ calin pajo, aka alaywoyo cokin mewin thoko migame mewin.

⁶ I kabedo mewin je, tindin madongo mewin labedo gundin, aka ilareyo woko udi ajwoka mewin to josika. Migame mewin ilaŋinyo woko aka calin mewin jolangoye, ilatoŋo piny migame mewin ma waŋo buban, t'iyweyo woko tic mewin.

⁷ Jom'onek jolapodho i dier win; kenyo wilaŋeyo nike Abedo Rwoth.

⁸ Kucel alaweyo jomegi, ŋey jomegi kwoŋ win jolaboth abor i dier nonin to jokedhere i piny.

⁹ Jono ma joboth jolapoyan i dier nonin kam'ilater'iye jo i twec koro, kwoŋbedo aol gi cuny jo matek m'ocile kwoŋan, kodi waŋ jo ma luwo calin pajo. Jolajok wegi gi wegi ro reco ma jotimo, iy'amien pajo je.

¹⁰ Jolaŋeyo nike An Rwoth, akiluwo nono timo rijo teko me.

¹¹ Rwoth Were waco ama: Goy adhoŋ gi cingin aka igoy mayindo, t'iwaco ni kidamba ri amien je ma ot pa Isiraili! Kole jolapodho g'abor, kec, kodi two nundu.

¹² Jono ma jonitie bor jolatho gi two nundu, jono ma jonitie cegin jolatho g'abor, aka jono ma jodoŋ makwo t'iweyo jo jolatho kec. Ameno apaka alacowo keme paran kwoŋ jo.

¹³ Wilaŋeyo ni An Abedo Rwoth, ka delkwoŋ jom'otho pajo joriere i dier calin pajo, thoko migame pajo, i wi kisi tendere mabor, wi gote je, i tiendi kisi yath, i tiendi olwa ma jaboke, kodi kisi kama jocower'iye ri calin pajo.

¹⁴ Alarieyo cingan kwoŋ jo, t'amiyo lowo bedo gunda kodi abar loyo thim ma Ribila i kabedo pajo je; aka jolaŋeyo ni An Abedo Rwoth.