Ezekiel 2 - KITAWO MALEŊ

Were lwoŋo Ezekiel bedo jatuci wac Were

¹ Go owaco ran ni, “Wod dhano, ay malo icungi gi tiendin, aka alaluwo kodin.”

² Paka go oluwo kodan, cuny obino to donjo i an, aka acungo gi tiendan, t'awinjo ŋat'oluwo kodan.

³ Go owaco ran ni, “Wod dhano, aorin bongi Joisiraili, bongi nono ma jogwenyirok, ma jotieko gwenyirok kwoŋan, jo kodi kwarere pajo jotieko gwenyirok kwoŋan kiri gi ndelo won me.

⁴ Jobedo nyithindho ma jowictek, aka cuny jo tek. Aorin bongi jo, aka iwaci rijo ni, ‘Rwoth Were waco ama.’

⁵ Ka jowinji kosa jokwer winjo, kole jobedo ji ma jogwenyirok, jolaŋeyo nike jatuci wac Were obedo i dier jo.”

⁶ “To in wod dhano, ikir'ibwoki ro jo, aka ikir'ibwoki ro wac pajo. Makada nende kudhin kodi okure othokin, t'ibedo i dier thwol gwokere, ikir'ibwoki ro wac pajo, kosa idhier ro neno pajo; kole jobedo ji ma jogwenyirok.

⁷ Ilaluwo wac paran rijo, obedi ni jowinji kosa jokwer winjo; kole jobedo ji ma jogwenyirok.”

⁸ “To in, wod dhano, ikir'igwenyere paka ji ma jogwenyirok no; yaw dhokin icami gim'amiyin.”

⁹ Aŋiyo, aka neni, cingi dhano otele bongan, aka oyido nitie iye kitawo m'omin m'ondik'iye.

¹⁰ Go oyaro ruwaŋan, oyido ondiki i thenge ario je, goyo ndur, ywak kodi kidamba.