Ezekiel 19 - KITAWO MALEŊ

Wer ma rem

¹ Rwoth owaco ran wero wer ma rem me ri jodhum ma Isiraili.

² Waci ni, kite simbwor madhako aŋo ma min win oyido obedo i dier simbwore ma mon! Go oriere i dier simbwore ma mon mathindho ka pidho nyithindhe.

³ Go opidho nyathi simbwor pere acel m'olokere simbwor m'oripo, to fonjere dwar, aka ocamo ji.

⁴ Nonin jowinjo kwoŋe, aka omaki go i od jo, t'ikelo go gi siraget i lowo ma Misir.

⁵ Simbwor madhako oneno nike go otieko kuro aka orumo gi geno, ameno okwanyo nyathi simbwor pere acel man, to loko simbwor m'oripo.

⁶ Simbwor m'oripo no owotho i dier simbwore, to bende fonjere dwar, aka ocamo ji.

⁷ Mon tho ma tindin madongo ma go oreyo woko to sika woko lowo pajo, jopoŋ gi lworo ro derino ma kihola pere.

⁸ Nonin wok iy'adec je thoko, jociko bwo pajo kwoŋe i od jo t'imako.

⁹ Joketho go iy'agono gi siraget, to jokelo ri kere ma Babilon i twec, ŋey kendo dwonde okir wowinjere wi gote ma Isiraili.

¹⁰ Yok win cal yath vini i remo mewin, m'opidhere i thengi pi, ma nyak swa aka ojwayo jange ro dito ma pi.

¹¹ Jange mere oyido jotek, ma jolokere ludhe ma dhum pa jodhum. Yath vini odongo mabor swa malo, aka oyido nenere ro boro mere kodi jange m'ojware.

¹² To ofudhi woko i keme, obol piny i lowo, koyo ma yuwok ceŋ othwo woko, otur woko jange, jothwo woko t'iwaŋo.

¹³ Onyo opidhi i thim, i lowo m'othwo m'ongoye pi.

¹⁴ Mac owok i kore, otieko waŋo woko jange kodi olemo mere, ŋey ongoye kore matek m'odoŋ, ongoye luth ma dhum ri jodhum. Me wer ma rem, m'iwero noknok.