Ezekiel 15 - KITAWO MALEŊ

Ageca kwoŋ yath vini

¹ Wac pa Rwoth obino ran ka waco ama:

² Awi wod dhano, raŋo mbawo vini loyo mbawin man? Kosa raŋo jangi yath vini loyo yen man ma lul?

³ Mbawo bende iranda wok i yath vini ma payo gimoro? Kosa dhano nyalo yedho luth wok'iye ma liero gimoro je?

⁴ K'okethi i mac woliel, ka thenge mere ario je owaŋ to diere bende waŋ, inyalo oro ri giman?

⁵ K'inen kinyal oro ma timo gimoro je ka nitie gikululu, onyo mac otieko waŋo woko, inyalo oro ma timo gimoro kendo?

⁶ Riameno Rwoth Were waco ama: Paka mbawo yath vini i dier yen ma lul, m'atieko miyo mac owaŋo woko to liel, ameno apaka alatimo ri ji ma jobedo i Yerusalem.

⁷ Atieko como waŋan kwoŋ jo, aka makada nende jokwale kwoŋ mac, mac fodi lareyo woko jo. Kenyo wilaŋeyo ni An Abedo Rwoth, k'acomo waŋan kwoŋ jo.

⁸ Alamiyo piny doŋ nono, kwoŋbedo, jok'otimo gir'adieri, Rwoth Were waco.