Kitawo mar'ario mapa Musa m'ilwoŋo ni Wok 9 - KITAWO MALEŊ

Tho p'ogwaŋe

¹ Kenyo Rwoth owaco ri Musa ni, “Kidhi bongi Farawo iwaci rigo ni, Rwoth, Were pa Joebulaniya waco ni, ‘Weyi ji paran jokadhi, ŋey jowolaman.

² Kole k'inokwer weyo jo kadho kendo,

³ neni, abino miyin gir'acula gi dhiro two kwoŋ ogwaŋe mewin je; kayina mewin, ŋamia, dhok, rombo, kodi diegi.

⁴ To Rwoth bino ketho pokirok i dier ogwaŋe pa Joisiraili kodi apa Jomisir, ŋey wongoye kad'acel kwoŋ ogwaŋe pa Joisiraili ma wotho.

⁵ An, Rwoth, aketho dikin paka ndelo m'abino timo iye gime.’ ”

⁶ I ndelo ma yawere Rwoth otimo paka owaco, aka ogwaŋe pa Jomisir je jotho, to ngoye ogwaŋ kad'acel pa Joisiraili ma otho.

⁷ Aka Farawo openjo gim'otimere t'iwaco rigo nike ongoye ogwaŋ kad'acel pa Joisiraili ma otho. To go fodi obedo gi wictek aka k'oweyo ji kadho.

Bur

⁸ Aka Rwoth owaco ri Musa gi Aron ni, “Jow win buru adhoŋ cingi win wok i mac malieth, aka weyi Musa woywoy i koyo ruwaŋ Farawo.

⁹ Buru no bino ywore pa rudino m'onuŋere i lowo ma Misir gibe, aka kisi kamoro jolanywolo bur ma lokere adhola kwoŋ ji g'ogwaŋe.”

¹⁰ Ameno jokwanyo buru moro to jocungo ruwaŋ Farawo; aka Musa oywoyo i koyo; to buru no nywolo bur m'olokere adhola kwoŋ ji g'ogwaŋe.

¹¹ Jothieth jok'onyalo neno ruwaŋ Musa kwoŋbedo kwoŋ jo bende oyido oumere gi bur paka Jomisir man.

¹² To Rwoth omiyo Farawo bedo gi wictek paka Rwoth oyido owaco, aka Farawo k'owinjo Musa gi Aron.

Pe

¹³ Kenyo Rwoth owaco ri Musa ni, “Cew dikin odikin maŋic, icungi ruwaŋ Farawo aka iwaci rigo ni, Rwoth, Were pa Joebulaniya waco ni, ‘Weyi ji paran jokadhi, ŋey jowolaman.

¹⁴ Kole rume, aladhiro thoyamo paran kwoŋin, jodhum perin kodi ji perin, ŋey inyal ŋeyo nike ongoye ŋata cale an i piny gibe.

¹⁵ Kabedi nende atiŋ cingan t'agoyin gi ji perin gi two nundu, dinyo wijoje wirere kicutho.

¹⁶ T'aweyo wikwo r'atoŋa me, nyutho meni paran, ŋey nyingan wotuci i piny gibe.

¹⁷ Kucel fodi itiŋere malo kwoŋ ji paran aka ikwero jowokadhi.

¹⁸ Neni, dikin kapa sawa me, abino miyo pe mapek swa cwe, nger m'oyido fodi k'ocwe i Misir wok con.

¹⁹ Onyo riameno wodhi or, ŋey ogwaŋe mewin gi kisi gima nitie kam'othangere wokethi i ot. Pe bino cwe kwoŋ ji kodi ogwaŋe ma jodoŋ woko, aka jobino tho.’ ”

²⁰ Megi kwoŋ jodhum pa Farawo lworo omako jo ro gima Rwoth oyido owaco, aka jokelo ŋecin pajo g'ogwaŋe pajo i udi.

²¹ To megi ma jok'odewo kwoŋ wac pa Rwoth joweyo ŋecin pajo g'ogwaŋe kam'othangere.

²² Aka Rwoth owaco ri Musa ni, “Riey cingin yupolo, ŋey pe wocwe i lowo ma Misir gipi, kwoŋ ji, ogwaŋe, kodi cemo ma ndelin je.”

²³ Kenyo Musa orieyo luth pere yupolo, aka Rwoth odhiro mwoc koth, pe, aka lithkoth ogoyo piny. Rwoth odhiro

²⁴ pe mapek gi lithkoth ma kicoki. Manago obedo pe m'oyido fodi k'ocwe i Misir wok con.

²⁵ I Misir gipi pe ogoyo kisi gimoro m'oyido nitie kam'othangere, kiri gi ji kodi ogwaŋe. Pe ogoyo piny cemo i ndelin to turo woko yen je.

²⁶ Nyaka iy'adec ma Gosen, kama Joisiraili oyido jobed'iye ama pe oyido ongoye.

²⁷ Kenyo Farawo ooro wolwoŋi Musa gi Aron, aka owaco rijo ni, “Rume atimo reco; Rwoth otire aka an gi ji paran wakom.

²⁸ Kway win Rwoth! Mwoc koth gi pe me onyo joasere, abino weyo win kadho, wikiripi bedo ka kendo.”

²⁹ Musa owaco rigo ni, “Tekin aweyo tindi madwoŋ, abino rieyo cingan ri Rwoth; mwoc koth bino coki, aka pe bino ngoye, ŋey inyal ŋeyo nike piny obedo apa Rwoth.

³⁰ T'aŋeyo nike in gi jodhum perin wikibino lworo Rwoth Were.”

³¹ Yath ma timo nanga mafoth m'ilwoŋo ni flakis m'oyido thiwo kodi bale m'oyido jocek jonyekere.

³² To ongoye ŋano m'onyekere kwoŋbedo jogalo gi cek.

³³ Ameno Musa oeye bongi Farawo wok i tindi madwoŋ, aka orieyo cinge ri Rwoth, aka mwoc koth, pe, kodi koth ocoki.

³⁴ To munyo Farawo oneno ni koth, pe, kodi mwoc koth ocoki, otimo reco kendo. Go kodi jodhum pere jodoŋ gi wictek paka con

³⁵ aka, paka Rwoth oyido owaco luwo i Musa, Farawo k'onyalo weyo Joisiraili kadho.