Kitawo mar'ario mapa Musa m'ilwoŋo ni Wok 7 - KITAWO MALEŊ

¹ Aka Rwoth owaco ri Musa ni, “Neni, akidho lokin Were ri Farawo, aka Aron omin in bino luwo rin paka jatuci wac Were perin.

² Waci ri Aron kisi gim'awodho or rin kwoŋe, aka go wowaci ri Farawo wowey Joisiraili jowowoki i piny pere.

^3-4 T'abino miyo Farawo bedo gi wictek aka go k'owinjin makada nende anotim gir'anyutha gi gir'aura kweth i Misir. Kenyo abino kelo gir'acula matek i Misir to atelo nonin pa ji paran wok i lowo me.

⁵ Nyaka Jomisir jobino ŋeyo ni An Abedo Rwoth, k'anotiŋ cingan kwoŋ jo to awodho Joisiraili wok i piny pajo.”

⁶ Aka Musa gi Aron jotimo paka Rwoth omiyo jo or.

⁷ I hongo ma joluwo iye gi Farawo, Musa oyido jaoro piero aboro, aka Aron piero aboro g'adek.

Luth pa Aron

⁸ Aka Rwoth owaco ri Musa gi Aron ni,

⁹ “Ka Farawo owaci riwin ni wiridhi wac mewin gi gir'aura, kenyo wac ri Aron wobol luth pere piny ruwaŋ Farawo aka bino lokere thwol.”

¹⁰ Ameno Musa gi Aron jokidho bongi Farawo aka jotimo paka Rwoth omiyo jo or. Aron obolo piny luth pere ruwaŋ Farawo gi jodhum pere, to lokere thwol.

¹¹ Kenyo Farawo olwoŋo cwo pere mariek gi jothieth pere, aka bende jotimo ameno.

¹² Jobolo piny ludhe pajo to jolokere thwole. To luth pa Aron omwonyo woko apajo.

¹³ To Farawo obedo gi wictek paka Rwoth oyido owaco, aka k'onyalo winjo Musa gi Aron.

Malawa Nayil lokere remo

¹⁴ Kenyo Rwoth owaco ri Musa ni, “Farawo nitie gi wictek swa, okwero weyo ji jowokadhi.

¹⁵ Ameno kadhi irom gi go odikin ka go kidho i malawa Nayil. Kadhi gi luth m'olokere thwol, aka ikuri go i thengi malawa.

¹⁶ Aka iwaci rigo ni, ‘Rwoth, Were pa Joebulaniya ooran waco rin iwey ji pere jowokadhi, ŋey jowonyal lamo go i thim. To kiri pama fodi ikiwinjo.

¹⁷ Onyo Rwoth waco ni, ibino ŋeyo ŋata go obedo gi gima go kidho timo. Neni, akidho goyo wi malawa gi luth me, aka pi gibe bino lokirok remo.

¹⁸ Aka rec ma pi jobino tho to malawa ŋwe swa ma Jomisir jok'onyal madho pi mere.’ ”

¹⁹ Rwoth owaco ri Musa ni, “Waci ri Aron wokwany luth pere woriey i wi malawa, waŋ pi, kodi kidiwin je i Misir. Pi bino lokirok remo, aka remo bino bedo i lowo gipi, kiri iy'agwatin ma mbawo gi ma telin.”

²⁰ Musa gi Aron jotimo paka Rwoth omiyo jo or. Aka Aron orieyo luth pere to goyo gine wi pi i malawa ruwaŋ Farawo gi jodhum pere, aka pi olokere remo.

²¹ Rec m'oyido nitie i malawa jotho aka malawa oŋwe marac swa ma Jomisir jok'onyalo madho pi mere. Remo oyido nitie kisi kamoro i Misir.

²² Kenyo jothieth pa Farawo bende jotimo gimoro acel, aka Farawo obedo gi wictek paka con, to kwero winjo Musa gi Aron paka Rwoth oyido owaco.

²³ Kwanyowoko owire to gik i ot pere ma k'odewo kwoŋ gime je.

²⁴ Jomisir je jokunyo thoko thengi malawa ri pi amadha, kole jok'onyalo madho pi wok i malawa.

²⁵ Ndelo abirio orumo munyo Rwoth otieko goyo malawa Nayil.