Kitawo mar'ario mapa Musa m'ilwoŋo ni Wok 6 - KITAWO MALEŊ

¹ To Rwoth waco ri Musa ni, “Onyo ikidho neno gim'abino timo ri Farawo. Abino romo go weyo ji paran jowokadhi. Adieri abino romo go riemo jo wok i lowo me.”

Were lwoŋo Musa

² Were owaco ri Musa ni, “An abedo Rwoth.

³ Amenyere ri Abraham, Isaka, kodi Yakobo paka Were Majameni je, to akinyuthere rijo gi nyingan maleŋ, Rwoth.

⁴ Abende atimo gi jo cikirok miyo jo lowo ma Kanan, lowo ma jobed'iye paka jopath.

⁵ Onyo atieko winjo ywak pa Joisiraili ma Jomisir jomako i twec aka apoyo cikirok paran.

⁶ Riameno wac ri Joisiraili ni, ‘An abedo Rwoth, abino botho win t'agonyo win wok i twec pa Jomisir. Abino tiŋo cingan ma dimeni kelo gir'acula madongo kwoŋ jo.

⁷ Abino loko win ji paran, aka abino bedo Were mewin. Wibino ŋeyo ni An Abedo Rwoth Were mewin k'anogony win wok i twec i Misir.

⁸ Abino kelo win i lowo m'akwoŋere miyo Abraham, Isaka, kodi Yakobo, aka abino miyo win paka lim mewin. An abedo Rwoth.’ ”

⁹ Musa owaco gime ri Joisiraili, to jok'owinjo go kwoŋbedo cuny gin oyido otur gi twec mager.

¹⁰ Kenyo Rwoth owaco ri Musa ni,

¹¹ “Kadhi aka iwaci ri Farawo kere ma Misir, wowey Joisiraili jowowoki i lowo pere.”

¹² To Musa odwoko Rwoth ni, “Neni, Joisiraili jok'owinjan; to Farawo owinjan nedi. Akibedo jaluwo maber.”

¹³ To Rwoth omiyo Musa gi Aron cik ni, “Waci win ri Joisiraili gi Farawo kere ma Misir nike amiyo win or telo Joisiraili wok i Misir.”

Nyikway Musa gi Aron

¹⁴ Ruben, wod pa Yakobo marapena oyido nitie gi wote aŋwen; Hanok, Palu, Heziron, kodi Karim, jobedo kwarere mewin nonin ma jolwoŋere gi nyingi jo.

¹⁵ Simeo oyido nitie gi wote aucel; Jemwel, Yamin, Ohad, Ohar, kodi Saulo, wot dhako Jakanan; jobedo kwarere mewin nonin ma jolwoŋere gi nyingi jo.

¹⁶ Levi oyido nitie gi wote adek; Gerisom, Kohath, kodi Merari; jobedo kwarere mewin nonin ma jolwoŋere gi nyingi jo. Levi okwo ma oro 137.

¹⁷ Gerisom oyido nitie gi wote ario; Libini, kodi Simey aka jolimo nyikway jo kweth.

¹⁸ Kohath oyido nitie gi wote aŋwen; Amram, Izar, Hebron, kodi Uziel. Kohath okwo ma oro 133.

¹⁹ Merari oyido nitie gi wote ario; Mali kodi Musi. Me nonin pa Jolevi gi nyikway jo.

²⁰ Amram onywomo nyamin bamere, m'onywolo rigo Aron gi Musa. Amram okwo ma oro 137.

²¹ Izar oyido nitie gi wote adek; Kora, Nefeg, kodi Zikiri.

²² Uziel oyido nitie gi wote adek; Misael, Elizafan, kodi Sitiri.

²³ Aron onywomo Eliseba, nyar Aminadab nyamin Nason, aka onywolo rigo Nadab, Abihu, Eliazar, kodi Ithamar.

²⁴ Kora oyido nitie gi wote adek; Asir, Elikana, kodi Abiasaf. Jobedo pecin mapa jonono pa Kora.

²⁵ Eliazar, wod pa Aron, onywomo acel kwoŋ nyir pa Putiel m'onywolo rigo Finehas. Jo am'oyido wic pecin kodi nonin pa Jolevi.

²⁶ Aron kodi Musa ama Rwoth owaco rijo ni, “Tel win nonin pa Isiraili wok i Misir.”

²⁷ Jobedo cwo ma jowaco ri Farawo gonyo Joisiraili wok i Misir.

Cik pa Were ri Musa gi Aron

²⁸ I ndelo ma Rwoth oluwo gi Musa i lowo ma Misir,

²⁹ owaco ni, “An abedo Rwoth. Waci ri Farawo kere ma Misir kisi gim'awaco rin.”

³⁰ To Musa odwoko ni, “Iŋeyo paka akibedo jaluwo maber, Farawo owinjan nedi?”