Kitawo mar'ario mapa Musa m'ilwoŋo ni Wok 39 - KITAWO MALEŊ

Timo ruk pa jocway ri Were i wi migam

¹ Jokwoyo ruk pa jocway ri Were i wi migam gi yer rombo manyabululu, manyarangi ariŋo kodi m'obokere ma ruko ka jotiyo i Kabedo Maleŋ. Jokwoyo ri Aron paka Rwoth oyido omiyo Musa or.

² Jokwoyo law pa jocway ri Were i wi migam gi nanga mafoth; yer rombo manyabululu, manyarangi ariŋo, m'obokere kodi uzi ma rangi ma zahabu.

³ Jocadho boke ma zahabu aka joŋado i uzi tic gine i yer rombo manyabululu, manyarangi ariŋo kodi m'obokere.

⁴ Jotimo thondhe ario ma goki jo ri law pa jocway ri Were aka jokwoyo i bute ŋey wonyali tweyo.

⁵ Thol m'okwoy maŋon gi gimoro acel oriw i law pa jocway ri Were i wi migam ŋey jowobedi acel gine, paka Rwoth oyido omiyo Musa or.

⁶ Joyiko telin m'ilwoŋo ni onys aka jojengo i zahabu m'ocan; oyido ogor'iye nyingi wot Yakobo apar g'ario.

⁷ Okethi jo i thol ma goki law pa jocway ri Were i wi migam cungo ri nonin apar g'ario ma Isiraili, paka Rwoth oyido omiyo Musa or.

Mugowa ma ketho giŋeyo mito pa Were

⁸ Jotimo mugowa ma ketho giŋeyo mito pa Were gi ndijo paka ma law pa jocway ri Were i wi migam gi yer rombo manyabululu, ariŋo, m'obokere kodi nanga mafoth m'okwoy.

⁹ Oyido thenge je rom aka odol kadirio, boro mere inci abuŋwen aka laco mere inci abuŋwen.

¹⁰ Jocano bol aŋwen ma telin ma welo i iye. I bol marapena jocano tele m'obokere, tele manyatongweno, kodi tele manyarangi aremo.

¹¹ I bol mar'ario jocano tele manyarangi nam, tele manyabululu kodi diamondi.

¹² I bol mar'adek jocano tele m'obokere ma nyamicungwa, tele m'oruwo rangi matar g'akwaro, kodi tele manyarangi ariŋo.

¹³ Aka i bol mar'aŋwen jocano telin manyarangi nam, tele m'obokere, kodi tele manyaboke pendi. Ocan jo i miango ma zahabu.

¹⁴ Kisi tele kwoŋ telin apar g'ario me oyido ogor'iye nyingi wot Yakobo acel paka jonywole ŋey jowocungi ri nonin apar g'ario ma Isiraili.

¹⁵ Ri mugowa ma ketho giŋeyo mito pa Were jotimo lijegere gi zahabu macil m'otudi p'adasa.

¹⁶ Jotimo miangin ario gi petin ario aka joriwo petin ario i kisi sonda ario ma malo ma mugowa ma ketho giŋeyo mito pa Were.

¹⁷ Jotweyo adasin ario ma zahabu m'otudi i petin ario,

¹⁸ aka jotweyo gike ario man mar'adasin i miangin ario aka i nger me joriwo yuwaŋe i thondhe ma goki law pa jocway ri Were i wi migam.

¹⁹ Jotimo petin ario gi zahabu aka joriwo i kisi sonda ario ma piny ma mugowa m'iketh'iye giŋeyo mito pa Were, i gike ma iye cegin gi law pa jocway ri Were i wi migam.

²⁰ Jotimo petin ario man gi zahabu to joriwo piny yuwaŋ thondhe ario ma law pa jocway ri Were i wi migam, cegin gi bwombe kodi i wi del m'okwoy.

²¹ Jotweyo petin ma mugowa ma ketho giŋeyo mito pa Were i petin ma law pa jocway ri Were i wi migam g'adasa manyabululu, ŋey mugowa ma ketho giŋeyo mito pa Were wobedi malo aka del wokiri wolwogere paka Rwoth oyido omiyo Musa or.

Timo ruk pa jocway ri Were i wi migam man

²² Kanzu m'iruko piny ma law pa jocway ri Were i wi migam otim gi yer rombo manyabululu kende.

²³ Hoŋ m'irwak'iye wi jo oridhi gi waya m'otudi ma cero go yec.

²⁴ Thoko rinda ma kanzu jokwoyo cal ma pomo gi yer rombo manyabululu, manyarangi ariŋo, m'obokere, kodi nanga mafoth.

²⁵ Jotimo bende olaŋere gi zahabu mangil aka joketho i dier cal ma pomo thoko.

²⁶ Kisi olaŋ oluwere gi cal ma pomo thoko rinda ma kanzu ma tic paka Rwoth oyido omiyo Musa or.

²⁷ Jotimo satere ri Aron gi wote,

²⁸ jungin, palere ma nanga mafoth,

²⁹ thol ma pier jo ma nanga mafoth kodi yer rombo manyabululu, manyarangi ariŋo kodi m'obokere m'okwoy paka Rwoth oyido omiyo Musa or.

³⁰ Aka jotimo sen ma sangaria maleŋ gi zahabu ngil, aka jondik'iye ni, “Leŋo ri Rwoth.”

³¹ Jotweyo i junga g'adasa manyabululu paka Rwoth omiyo Musa or.

Cowo tic

³² Ameno tic je ma Wema Maleŋ orumo. Joisiraili jotimo kisi gimoro paka Rwoth oyido omiyo Musa or.

³³ Jokelo bongi Musa Wema gi gigipiny mere, siragetere mere, miangin mere, yen ariwa mere, asu mere gi pende je.

³⁴ Giumo ma yer rombo m'owir m'obokere, giumo ma yer diel kodi nangin ma liero.

³⁵ Kakan ma Cikirok m'oketh'iye telin mapando ario, gute mere kodi giumo.

³⁶ Meza gi gigipiny mere kodi mugat maleŋ m'imiyo Were.

³⁷ Raŋaw tala ma zahabu mangil, talin mere gi gigipiny mere je, kodi mo ma talin.

³⁸ Migam ma zahabu, mo ma wiro, buban maŋwe kur kodi nangin ma liero i dhiot ma Wema.

³⁹ Migam ma ywel gi kicungwo mere ma ywel, gute gi gigipiny mere je kodi kalaya ma lwok gi pende je.

⁴⁰ Nangin ma liero ma diedipo, gute mere kodi pende je, nanga ma liero i waŋkac ma diedipo gi thondhe mere, loce ma Wema kodi gigipiny ma oro i Wema je.

⁴¹ Ruk m'otimi mafoth ma jocway ri Were i wi migam joruko i Kabedo Maleŋ nangin maleŋ ri Aron jacway ri Were i wi migam gi wote.

⁴² Joisiraili oyido jotimo tic je paka Rwoth owodho or ri Musa.

⁴³ Musa okaŋasa kisi gimoro aka oneno ni oyido jotimo je paka Rwoth oyido owodho or. Ameno omiyo jo silwany.