Kitawo mar'ario mapa Musa m'ilwoŋo ni Wok 37 - KITAWO MALEŊ

Timo Kakan ma Cikirok

¹ Bezalel otimo Kakan ma Cikirok wok kwoŋ mbawo kasia, boro inci piero aŋwen g'abic, laco inci piero ario g'abirio, kodi ŋawirok inci piero ario g'abirio.

² Oumo iye gi woko kodi zahabu macil aka ofuyo thoko gi zahabu.

³ Bezalel otimo petin ma tiŋo ma zahabu aka orwako jo i tiende aŋwen gi petin ario i kisi thenge.

⁴ Bezalel otimo gute ma tiŋo wok kwoŋ mbawo kasia, aka oumo gi zahabu,

⁵ to rwako jo i petin i kisi thengi Kakan ma Cikirok.

⁶ Bezalel otimo giumo gi zahabu macil, inci piero aŋwen g'abic i boro kodi inci piero ario g'abirio i laco.

⁷ Bezalel otimo cwec ma jobwombi gin ario gi zahabu m'ocadhi,

⁸ acel ri kisi gike ma giumo. Bezalel otimo jo ŋey jowotimi adec acel giumo.

⁹ Cwec ma jobwombi gin joŋiyere karo giumo, aka bwombi gin oyare umo.

Timo meza ri Mugat m'imiyo Were

¹⁰ Bezalel otimo meza wok kwoŋ mbawo kasia, boro inci piero adek g'aucel, laco inci apar g'aboro, kodi ŋawirok inci piero ario g'abirio.

¹¹ Oumo gi zahabu macil aka ofuyo thoko gi zahabu.

¹² Bezalel otimo miango ma inci adek i laco thoko meza aka ofuyo miango gi zahabu thoko.

¹³ Bezalel otimo petin aŋwen gi zahabu ma tiŋo aka oketho jo i kisi sonda aŋwen, i tiendi meza.

¹⁴ Petin aŋwen ma mako gute ma tiŋo meza oketho cegin gi miango.

¹⁵ Bezalel otimo gute gi mbawo kasia aka oumo gi zahabu.

¹⁶ Otimo gigipiny ma zahabu macil ri meza, sendere, kikopere, agwatin kodi atewe ma oro k'ikonjo vini.

Raŋaw tala

¹⁷ Bezalel otimo raŋaw tala gi zahabu macil. Otimo pende kodi kore mere gi zahabu m'ocadhi, kiri gi mawuwin mere.

¹⁸ Jange aucel jokare i thenge, adek i kisi thenge.

¹⁹ Kisi acel kwoŋ jange aucel oyido nitie gi mawuwin adek ma cale mawuwa ma yath m'ilwoŋo ni alimond,

²⁰ Kor raŋaw tala oyido nitie mawuwin aŋwen macale mawuwa ma yath alimond gi jange kodi thiwe.

²¹ Oyido nitie mawuwa acel kama kisi mawuwin adek jowok'iye i kore.

²² Mawuwin, jange, kodi raŋaw tala je otim gi zahabu m'ocadhi.

²³ Bezalel otimo talin abirio ri raŋaw tala, aka otimo lew gin gi siniyin gi zahabu macil.

²⁴ Bezalel ooro kilo piero adek g'abic ma zahabu timo raŋaw tala kodi gigipiny mere je.

Timo migam ma waŋo buban

²⁵ Bezalel otimo meza wok kwoŋ mbawo kasia ma waŋo buban. Oyido obedo inci apar g'aboro i boro, inci apar g'aboro i laco kodi inci piero aŋwen g'abic i ŋawirok. Tunge aŋwen i kisi sonda oyido obedo tim acel gine.

²⁶ Oumo wiye, thenge aŋwen je, kodi tunge je gi zahabu macil to fuyo gi zahabu thoko.

²⁷ Bezalel otimo petin ario ma zahabu ma tiŋo aka oriwo i gike ario mako gute ma tiŋo gine.

²⁸ Bezalel otimo gute gi mbawo kasia aka oumo jo gi zahabu.

Timo mo ma wiro gi buban

²⁹ Bezalel bende otimo mo ma wiro kodi buban maŋwe kur m'oruw gi mo maŋwe kur.