Kitawo mar'ario mapa Musa m'ilwoŋo ni Wok 35 - KITAWO MALEŊ

Cik ma Sabato

¹ Musa olwoŋo kweth pa Joisiraili je aka owaco rijo ni, “Me a gima Rwoth omiyo win cik timo.

² Winitie gi ndelo aucel ma timo tic, to ndelo mar'abirio leŋ, ndelo ma cikirok ma ywomirok m'omiyan Rwoth. Nyatoro m'otimi tic moro je i ndelo no woneki.

³ Wikiri wicwiny kada mac i pecin mewin i ndelo ma sabato.”

Mic ma Wema Maleŋ

⁴ Musa owaco ri Joisiraili ni, “Me a gima Rwoth owodho or ni witim.

⁵ Keli win ri Rwoth mic. Kisi ŋata nitie gi cunye m'amiyo, weyi wokel mic ri Rwoth ma zahabu, feza, kosa ywel,

⁶ nanga mafoth, yer rombo manyabululu, manyarangi ariŋo, kodi m'obokere, nanga m'otimi gi yer diel.

⁷ Yer wod rombo m'owir gi rangi m'obokere, pien diegi kodi mbawo kasia,

⁸ mo ma talin, gigipiny ma jonitie gi kur ri mo ma wir kodi ri buban maŋwe mamit.

⁹ Telin m'obokere obokere kodi telin ma ketho law pa jadwoŋ pa jocway ri Were i wi migam kodi i mugowa ma ketho giŋeyo mito pa Were.”

Gigipiny ma jondijo jolatimo ri Wema Maleŋ

¹⁰ “Aka weyi cwo ma jondijo je kwoŋ win jowobin jowotimi kisi gima Rwoth owodho or ni wotim.

¹¹ Wema, giumo mere kodi giumo ma woko, siragetere mere gi miangin mere, yen ariwa, asu mere kodi pende je.

¹² Kakan ma Cikirok, gute mere, giumo mere kodi nanga ma geŋo.

¹³ Meza, gi gute mere, gigipiny mere je kodi mugat m'imiyo Were.

¹⁴ Raŋaw tala ri lero kodi gigipiny mere, talin kodi mo pajo.

¹⁵ Migam ma waŋo buban gi gute mere mo ma wiro, buban maŋwe kur mamit, kodi nanga ma geŋo dhiot ma Wema.

¹⁶ Migam ma waŋo mic, kodi kicungwo mere, gute mere, gigipiny mere, kalaya ma lwok kodi pende je.

¹⁷ Nangin ma liero ri diedipo, gute kodi pende mere, nanga ma liero ri waŋkac ma diedipo,

¹⁸ loci ma Wema kodi ma diedipo gi thondhe mere.

¹⁹ Ruk m'okwoy maŋon ma jocway ri Were i wi migam joripo ruko ka jotiyo i Kabedo Maleŋ, ruk maleŋ ri Aron jacway ri Were i wi migam kodi ri wote.”

Ji jokelo mic pajo

²⁰ Kenyo Joisiraili joeye bongi Musa.

²¹ Kisi nyatoro ma cunye ogudo okelo ri Rwoth mic ma timo Wema Maleŋ. Jokelo kisi gim'oyido mitere aora i lamo kodi ma kwoyo ruk pa jocway ri Were i wi migam.

²² Ameno jobino cwo gi mon je, aka jokelo gigipiny ma cale kikweso, milomin, petin, thiwino, pogin kodi gigipiny m'otimi gi zahabu kweth aka jomiyo ri Rwoth.

²³ Kisi nyatoro m'oyido nitie gi nanga mafoth, yer rombo manyabululu, manyarangi ariŋo, kodi m'obokere, nanga m'otimi gi yer diel, pien wod rombo m'owir gi rangi m'obokere, kosa pien diel okelo.

²⁴ Kisi nyatoro m'oyido nyalo okelo mic ma feza kosa ywel ri Rwoth, aka jono m'oyido jonitie gi mbawo kasia aora moro je jokelo.

²⁵ Mon je ma jondijo ma kwoco acingi, jokelo uzi nangin mafoth kodi uzi manyabululu, manyarangi ariŋo, kodi yer rombo m'obokere, ma jokwoyo.

²⁶ Bende jotimo uzi ma yer diel.

²⁷ Jotel jokelo telin m'obokere obokere, kodi telin ma ketho i law pa jocway ri Were i wi migam kodi i mugowa ma ketho giŋeyo mito pa Were,

²⁸ gigipiny maŋwe kur gi mo ri talin, mo ma wiro, kodi buban maŋwe kur.

²⁹ Joisiraili je ma cuny gin oywayo jo jokelo gimoro je ri tic ma Rwoth oyido omiyo Musa or timo.

Jotic ma timo Wema Maleŋ

³⁰ Musa owaco ri Joisiraili ni, “Neni, Rwoth oyero Bezalel wod pa Uri, aka nyakwar Nun wok i nono pa Benyamin.

³¹ Were opoŋo go gi Cuny pa Were aka omiyo go ndijo, nyalo kodi niaŋ ri kisi tic ma pac,

³² ma kidonya kodi timo jo gi zahabu, feza, kodi ywel,

³³ ma ŋado telin ma ketho, ma payo mbawin kodi tic man je ma pac.

³⁴ Rwoth bende omiyo go Oholiab wod pa Ahisamak wok i nono pa Dan, nyalo ma fonjo ji man bende ndijo pajo.

³⁵ Rwoth omiyo jo ndijo ma kisi nger tic ma timere gi jopac, jokwoco, kodi ji ma jokedo nangin mafoth, manyabululu, manyarangi ariŋo, kodi yer rombo m'obokere, kodi nangin man. Jonigi nyalo ma timo kisi nger tic aka jondijo ma kidonya.”