Kitawo mar'ario mapa Musa m'ilwoŋo ni Wok 22 - KITAWO MALEŊ

Cik ma mako kwoŋ cul

¹ “Ka nyatoro okwalo dhiaŋ kosa rombo to neko kosa tana, go ripo culo dhok abic ri dhiaŋ acel, gi rombo aŋwen ri rombo acel. Go ripo culo, aka ka kinyal wotana go paka ŋeca.

² K'onwaŋ gine go munyo fodi kwo, kosa obedi dhiaŋ, kosa punda, kosa rombo, go woculi ario i kawaŋ acel.”

³ “K'onwaŋ jakwo turo ot wor t'ineko, ŋat'oneko go no kibedi janek.

⁴ To k'otimere odieceŋ, ŋat'oneko go bedo jabanja ma neki.”

⁵ “Ka nyatoro oloko ndelo kosa ndelo vini kakwath, kosa ogony ogwaŋe pere to jo cemo i ndelo pa ŋatiman, go ripo culo wok kwoŋ gimaber ma ndelo pere gi ndelo vini pere.”

⁶ “Ka nyatoro ocwiny mac i ndelo pere to mako kudhin ŋey wolaki i ndelo pa ŋatiman to waŋo ŋano madongo kosa m'okec otwey, ŋat'ocwinyo mac ripo culo gima mac owaŋo.”

⁷ “Ka nyatoro omiyo jager pere kano rigo pesa kosa lim moro je, t'ikwalo wok i ot pere, jakwo no k'omaki ripo culo dirio.

⁸ To ka k'omaki jakwo, iripo kelo ŋat'oyido kuro gigipiny i kalamo wokwoŋere nike go k'okwalo gigipiny pa nyawote.”

⁹ “K'obedi piem moro je ma mako kwoŋ lim, obedi dhiaŋ, punde, rombo, nangin kosa gimoro je m'orwenyo, wokel ji ma joosere i kalamo. Ŋata Were othum rigo banja bino culo nyawote dirio.”

¹⁰ “Ka nyatoro oyere kuro ri jager pere punda, dhiaŋ, rombo, kosa le moro je, to le no tho kosa wumiya, kosa onyaga, aka oyido ongoye ŋata neno,

¹¹ kwoŋirok ruwaŋ Rwoth bino nyutho k'inen go k'okwalo le. Won le ripo yeyo kwoŋirok, aka ŋat'oyido kuro kiripi culo.

¹² To k'okwal le wok bongi go, go ripo culo won mere.

¹³ K'inen ogwaŋe madudi joneko, weyi go wokel m'odoŋ paka jakony, aka cul wokiri wobedi ri gim'ogwaŋe madudi joneko.”

¹⁴ “Ka nyatoro okwayo le pa jager pere, to miyo litho kosa tho ma won mere ongoye, go ripo culo.

¹⁵ To k'inen won mere oyido nitie, go kiripi culo. K'oyido opangisa, cul ma kipangisa romo.”

Cik kwoŋ kula gi dini

¹⁶ “Ka jacwo oweco gi nyako mambula aka oyido fodi ongoye gi ombego to nindo gine, go ripo culo nywom to nywomo go.

¹⁷ To ka ba nyako okwero go nywomo nyako, go ripo culo ba nyako nywom ma ripo gi nyako mambula.”

¹⁸ “Neki win dhako ma jathieth.”

¹⁹ “Neki win jacwo ma nindo g'ogwaŋ.”

²⁰ “Reyi win woko ŋata miyo cowirok ri were man ma kiweno an.”

²¹ “Wikiri witer japath marac, kosa widiy go, kole win bende oyido wibedo jopath i piny Misir.

²² Wikiri wicandi citho kosa nyithindho kic.

²³ Ka winocandi jo to joywak ran, adieri abino winjo ywak pajo,

²⁴ aka keme paran bino liel t'aneko win i lweny. Mon mewin jobino doŋ citho aka nyithindho mewin kic.”

²⁵ “Ka wikopa pesa ri ji paran ma jocandi, wikiri wicalo jokikopa t'imiyo go culo gi magowa.

²⁶ Ka nyatoro osinga rin nanga to ciko nike laculin, iripo dwoko rigo nanga mafodi waŋceŋ k'opodho

²⁷ kwoŋbedo meno obedo gium pere ma go nitie gine kende. Aŋo man ma go onindi iye? Ka go oywaki ran ri kony, Abino winjo rupiri Abedo jakisa.”

²⁸ “Ikir'iluw marac kwoŋ Were kosa ilami jatel pa ji perin.”

²⁹ “Miyan win cowirok mewin ma ŋano, vini, kodi mo mewin ka jocek.” “Miyan win okayin mewin.

³⁰ Miyan win okayin pa dhok gi rombo mewin. Weyi win jowobedi gi yok gin ma ndelo abirio, aka i ndelo mar'aboro wimiyan jo.”

³¹ “Wibedo ji paran, riameno wikiri wicam le m'ogwaŋ madudi oneko, kwanyo woko bol win ri gwokere.”