Kitawo mar'ario mapa Musa m'ilwoŋo ni Wok 20 - KITAWO MALEŊ

Or apar

¹ Were oluwo gi Musa wac me je,

² “An abedo Rwoth Were mewin, m'owodho win wok i lowo ma Misir kam'oyido wibed'iye ŋecin.”

³ “Wikiri wibedi gi werin man je kwanyowoko an.”

⁴ “Wikiri witim cal ma gimoro je manitie i polo kosa i piny, kosa i pi i pendi piny ri wiwegi.

⁵ Wikiri wikule piny rijo, kosa wilam jo, kwoŋbedo An, Rwoth Were mewin, ajanyeko. Akelo gir'acula kwoŋ jono ma jodakan kodi kwoŋ nyikway jo, kiri i luse pajo mar'adek gi mar'aŋwen.

⁶ T'anyutho mar paran makiwire ri luse ganin pa ji ma jomaran aka joluwo or paran.”

⁷ “Wikiri wikwoŋere gi nyingi Rwoth ri gimarac, kole abino miyo gir'acula ri ŋata oro nyingan marac.”

⁸ “Poyi win ndelo ma Sabato, aka wikuri maleŋ.

⁹ Winitie gi ndelin aucel ma timo tic mewin je,

¹⁰ to ndelo mar'abirio obedo ndelo pa Rwoth Were mewin. I ndelo no wongoye ŋata wotim tic; win, nyithindho, ŋecin, ogwaŋe mewin, kosa japath ma bedo i piny mewin.

¹¹ I ndelo aucel An, Rwoth, acweyo polo gi piny, nam gi gima nitie iye je, to aywomere i ndelo mar'abirio. Riameno Rwoth omiyo ndelo ma Sabato silwany to loko maleŋ.”

¹² “Wor benin gi yokin, ŋey winyal kiyindira ma hongo malac i lowo ma Rwoth Were mewin miyo win.”

¹³ “Ikir'ineki.”

¹⁴ “Ikir'itim cot.”

¹⁵ “Ikir'ikwal.”

¹⁶ “Ikir'icwoki dhok nyatoro ma nono.”

¹⁷ “Ikir'iwanya ot pa nyawotin; ikir'iwanya cege, ŋecin pere, dhok pere, kosa punde pere, kosa kisi gima go nitie gine je.”

Ji jobedo gi lworo

¹⁸ Munyo ji jowinjo mwoc pa koth gi dwondi gwara to joneno lithkoth gi yiro ma wok i got, jokirin gi lworo to jocungo gi bor.

¹⁹ Jowaco ri Musa ni, “Luw gi wan aka wawinji, to k'iweyo Were luwo gi wan wabino tho.”

²⁰ Musa odwoko ni, “Wikiri wilwor; kole Were obino temo win kodi miyo win winjo go, ŋey wikiri witim reco.”

²¹ To ji jomedere cungo gi bor, aka Musa kende ama ocore cegin gi pondeponde m'opoto bongi Were.

Cik ma mako kwoŋ Migame

²² Rwoth omiyo Musa or waco ri Joisiraili ni, “Witieko neno nger ma An, Rwoth, aluwo iye gi win wok i polo.

²³ Wikiri witim werin mewin ma feza kosa zahabu to wilamo medo i wi an.

²⁴ Geti ran win migam ma lowo to wimiyan iye cowirok mewin awaŋa kodi ma siem, ma rombo mewin, kodi megikwe. Kisi kamoro je m'anokethi riwin ma laman, alabino t'amiyo win silwany.

²⁵ To ka wigeto ran migam ma telin, wikiri wigeti gi telin m'opay, kwoŋbedo ka wioro ringa i iye wimiyo kiripi kodan.

²⁶ Wikiri wigeti ran migam manitie madala ma idho, ka witimo, wibino thangere ka w'idho madala.”